പാരീസ്: ഫ്രാൻസിലെ ഗ്വാഡലൂപ്പിലെ സെയ്ന്റ്-ആനിൽ ആൾക്കൂട്ടത്തിലേക്ക് ഒരാൾ കാർ ഇടിച്ചുകയറ്റിയ സംഭവത്തിൽ 10 മരണം. ക്രിസ്മസ് പരിപാടിയുടെ ഒരുക്കങ്ങൾക്കായി ഒത്തുകൂടിയ ആളുകൾക്കിടയിലേക്കാണ് കാർ പാഞ്ഞ് കയറിയത്. സംഭവത്തിൽ ഏകദേശം 10 പേർക്ക് പരിക്കേറ്റു. പരിക്കേറ്റവരെ ആശുപത്രിയിൽ പ്രവേശിപ്പിച്ചു, മൂന്ന് പേരുടെ നില ഗുരുതരമാണെന്ന് പറയപ്പെടുന്നു.
അപകടമാണോ അതോ ഏതെങ്കിലും തരത്തിലുള്ള ആക്രമണമാണോ എന്നതിനെക്കുറിച്ച് ഇതുവരെ ഒരു വിവരവും വെളിപ്പെടുത്തിയിട്ടില്ല. റേഡിയോ കരാബെ ഇന്റർനാഷണൽ (ആർസിഐ) ഗ്വാഡലൂപ്പിന്റെ റിപ്പോർട്ട് അനുസരിച്ച് ടൗൺ ഹാളിനും പള്ളിക്കും മുന്നിലുള്ള ഷോൽച്ചർ സ്ക്വയറിലാണ് സംഭവം നടന്നത്. വാഹനമോടിക്കുന്നതിനിടെ ഡ്രൈവർക്ക് ആരോഗ്യപ്രശ്നങ്ങൾ അനുഭവപ്പെട്ടിരിക്കാമെന്ന് സംഭവസ്ഥലത്തെ ദൃക്സാക്ഷികളെ ഉദ്ധരിച്ച് ആർസിഐ റിപ്പോർട്ട് പറഞ്ഞു.
എന്നിരുന്നാലും ഈ അഭിപ്രായം ഇതുവരെ അധികൃതർ സ്ഥിരീകരിച്ചിട്ടില്ല. പ്രതിയെ പോലീസ് അറസ്റ്റ് ചെയ്തിട്ടുണ്ട്. അറസ്റ്റ് ചെയ്യുന്നതിനിടെ പ്രതി “അല്ലാഹു അക്ബർ” എന്ന് വിളിച്ചു പറഞ്ഞതായി ദൃക്സാക്ഷികൾ പറഞ്ഞു. കൊലപാതകശ്രമത്തിന് അന്വേഷണം ആരംഭിച്ചിട്ടുണ്ട്. പ്രതി ഇപ്പോഴും പോലീസ് കസ്റ്റഡിയിലാണ്.
അതേ സമയം അഗ്നിശമന സേനാംഗങ്ങൾ, പാരാമെഡിക്കുകൾ, പോലീസ് ഉദ്യോഗസ്ഥർ എന്നിവരെ സംഭവസ്ഥലത്ത് വിന്യസിച്ചിട്ടുണ്ട്. നഗര മേയറും എത്തി ഇരകളെ സഹായിക്കാൻ ഉടൻ തന്നെ ഒരു ക്രൈസിസ് ടീമിനെ സജീവമാക്കി. വാഹനത്തിന്റെ ഡിക്കിയിൽ നിന്ന് പോലീസ് ഗ്യാസ് കാനിസ്റ്ററുകൾ കണ്ടെത്തിയിട്ടുണ്ട്.
യൂറോപ്പിലെ മുൻ ആക്രമണങ്ങൾ
കഴിഞ്ഞ വർഷം ക്രിസ്മസിന് ഏതാനും ദിവസങ്ങൾക്ക് മുമ്പ് കിഴക്കൻ ജർമ്മനിയിലെ മാഗ്ഡെബർഗിൽ തിരക്കേറിയ ഒരു ക്രിസ്മസ് മാർക്കറ്റിലേക്ക് ഒരു കാർ ഇടിച്ചുകയറി 100 പേർ കൊല്ലപ്പെടുകയും കുറഞ്ഞത് 68 പേർക്ക് പരിക്കേൽക്കുകയും ചെയ്തു. പിന്നീട് ഡ്രൈവറെ അറസ്റ്റ് ചെയ്തു. 2006 ൽ ആദ്യമായി ജർമ്മനിയിലെത്തിയ 50 വയസ്സുള്ള ഒരു സൗദി ഡോക്ടറാണ് പ്രതിയെന്ന് ജർമ്മൻ വാർത്താ ഏജൻസിയായ ഡിപിഎ തിരിച്ചറിഞ്ഞു.
