ഭീകരതയെ ജീവിതം കൊണ്ട് പ്രതിരോധിച്ച താമിയുടെ ഓര്‍മയില്‍ ജാനകിയുടെ പോരാട്ടം

മലപ്പുറം: ഇടതൂര്‍ന്ന നരബാധിച്ച മുടികള്‍. ലളിതമായ വസ്ത്രധാരണം. നടപ്പിലും ശബ്ദത്തിലും ഊര്‍ജ്വസ്വലത. ജം ഇയ്യത്തുല്‍ ഇസ്ഹാനിയ സംഘടനയിലെ ഭീകരവാദികള്‍ തിരുവോണത്തലേന്ന് കൊലപ്പെടുത്തിയ മഠത്തില്‍ താമിയുടെ ഭാര്യ ജാനകി.

മലപ്പുറം വളാഞ്ചേരി നഗരസഭയിലെ 26-ാം ഡിവഷനില്‍ എന്‍ഡിഎ സ്ഥാനാര്‍ത്ഥിയായി വോട്ടഭ്യര്‍ത്ഥിക്കുകയാണ് ജാനകി. ചെറുപ്പത്തില്‍ വിധവയായ അവര്‍ തളരാതെ, തകരാതെ മക്കളെയും ജീവിതത്തെയും ചേര്‍ത്തുപിടിച്ച് മുന്നേറി. അതിന്റെ തുടര്‍ച്ചയാണ് തെരഞ്ഞെടുപ്പ് പോരാട്ടം.

ഒപ്പമുള്ളവര്‍ക്ക് ആത്മവിശ്വാസം പകര്‍ന്നും കേന്ദ്ര സര്‍ക്കാരിന്റെ വികസന കാഴ്‌ച്ചപ്പാട് ലളിതമായ ഭാഷയില്‍ വോട്ടര്‍മാരില്‍ അവതരിപ്പിച്ചുമാണ് തൊഴുവന്നൂര്‍ മഠത്തില്‍ വീട്ടില്‍ ജാനകിയുടെ പ്രചാരണം. മതമൗലികവാദികളുടെ തിട്ടൂരത്തിന് വഴങ്ങാതെ ദേശീയതയോട് ചേര്‍ന്ന് നിന്നതിന്റെ ഒറ്റക്കാരണത്തിനാണ് 30 വര്‍ഷങ്ങള്‍ക്ക് മുമ്പ്, നന്നെ ചെറുപ്രായത്തില്‍ ജാനകിക്ക് ഭര്‍ത്താവിനെ നഷ്ടപ്പെട്ടത്. പറക്കമുറ്റാത്ത നാലു കുഞ്ഞുങ്ങളെ വളര്‍ത്തി വലുതാക്കാനുള്ള കരുത്ത് പകര്‍ന്നത് ജീവിതപങ്കാളിയായിരുന്ന താമിയുടെ ഓര്‍മ്മയും അദ്ദേഹം പിന്തുടര്‍ന്ന ആദര്‍ശ ബോധത്തിന്റെ വെളിച്ചവുമായിരുന്നു. ജാനകിയുടെ പോരാട്ടം അതിന്റെ തുടര്‍ച്ചയാണ്.

1996 ആഗസ്റ്റ് 25 ജാനകിക്ക് ഒരിക്കലും മറക്കാനാവാത്തതും ഭയപ്പെടുത്തുന്നതുമായ ദിനമാണ്. ജോലി കഴിഞ്ഞ് വീട്ടില്‍ എത്തിയ താമി കുളികഴിഞ്ഞ് ബിജെപിയുടെ കണ്‍വെന്‍ഷനില്‍ പങ്കെടുക്കാന്‍ വീട്ടില്‍ നിന്ന് ഇറങ്ങിയതായിരുന്നു. തിരുവോണ സദ്യക്കുള്ള പച്ചക്കറി വാങ്ങിവരാമെന്നായിരുന്നു ഇറങ്ങുമ്പോള്‍ ഭാര്യയെ ഓര്‍മ്മിപ്പിച്ചത്. എന്നാല്‍ ജീവിതത്തിലെ സന്തോഷം മുഴുവന്‍ ആ യാത്രപറയലിലൂടെ അവസാനിച്ചുപോയി.

ബിജെപി കണ്‍വെന്‍ഷന്‍ കഴിഞ്ഞ് മടങ്ങും വഴി ജം ഇയ്യത്തുല്‍ ഇസ്ഹാനിയ ഭീകരര്‍ താമിയെ നിഷ്ഠൂരമായി ആക്രമിച്ച് വധിക്കുകയായിരുന്നു. പിന്നീട് താമിയുടെ കൊലപാതകത്തിലെ പ്രതികളെ ക്രൈംബ്രാഞ്ചിന്റെ പ്രത്യേക സംഘം ചോദ്യം ചെയ്യവെയാണ് 1995 ആഗസ്ത് 18ന് വാഹനാപകടത്തില്‍ മരിച്ചെന്ന് കരുതിയ ബിജെപി പ്രവര്‍ത്തകനായ മോഹനചന്ദ്രന്റേതും ജം ഇയ്യത്തുല്‍ ഇസ്ഹാനിയ ആസൂത്രണം ചെയ്ത കൊലപാതകമാണെന്ന് വെളിപ്പെടുന്നത്.

താമി മരിക്കുമ്പോള്‍ മൂത്തമകള്‍ സുഷീലയ്‌ക്ക് 11 വയസ്സുമാത്രമായിരുന്നു പ്രായം. തുടര്‍ന്നുള്ള ജീവിതവഴിയില്‍ റവന്യൂവകുപ്പില്‍ ലാന്‍ഡ് ട്രിബ്യൂണല്‍ സെക്ഷനില്‍ ലഭിച്ച ജോലിയായിരുന്നു കുട്ടികളെ വളര്‍ത്താനും പഠിപ്പിക്കാനും ജാനകിക്ക് തുണയായത്. ജോലിയില്‍ നിന്ന് വിരമിച്ച ജാനകി ഇപ്പോള്‍ സജീവ ബിജെപി പ്രവര്‍ത്തകയാണ്. സുഷീല, സുമിത്ര (അധ്യാപിക, ചോറ്റൂര്‍ ഗവ.എല്‍പി സ്‌കൂള്‍), സുദീഷ് (ഡിസൈനര്‍), സുഭാഷ് (കെല്‍ട്രോണ്‍) എന്നിവര്‍ മക്കളാണ്.