കോഴിക്കോട്: രസതന്ത്രത്തില്‍ പിഎച്ച്ഡി ബിരുദം നേടിയ ആനി സ്റ്റെഫി കോഴിക്കോട് എരഞ്ഞിപ്പാലത്തെ രാഷ്‌ട്രീയ രസതന്ത്രത്തില്‍ വിജയം നേടാനുള്ള നിയോഗത്തിലാണ്. ജവഹര്‍ നഗറിലെ ഓരോ വീട്ടിലും വോട്ടുചോദിച്ചു ചെല്ലുമ്പോള്‍ വീട്ടുകാര്‍ രാഷ്‌ട്രീയക്കാരിയായിട്ടല്ല ആനിയെ സ്വീകരിക്കുന്നത്, അവരുടെ വീട്ടിലെ ഒരംഗം എന്ന നിലയിലാണ്.
എരഞ്ഞിപ്പാലം ജനറല്‍ വാര്‍ഡാണ്. എതിരാളികള്‍ രണ്ടു മുന്നണികളുടേയും പ്രമുഖരും. എന്നാല്‍ തികഞ്ഞ ആത്മവിശ്വാസത്തിലാണ് ആനി സ്റ്റെഫി. ‘ ഞാന്‍ പുറത്തു നിന്ന് മത്സരിക്കാനെത്തിയ സ്ഥാനാര്‍ത്ഥിയല്ല, ഈ നാട്ടുകാരിയാണ്. ആ സ്‌നേഹം ഇവിടെ എനിക്ക് ലഭിക്കുന്നുണ്ട്’ ആനി സ്റ്റെഫി പറയുന്നു. മഹിളാമോര്‍ച്ച ജില്ലാ സോഷ്യല്‍ മീഡിയ കണ്‍വീനറായ ആനി പ്രോവിഡന്‍സ് കോളജ്, ദേവഗിരി കോളജ്, എന്നിവിടങ്ങളിലെ വിദ്യാഭ്യാസത്തിന് ശേഷം മദ്രാസ് ലയോള കോളജില്‍ നിന്ന് രസതന്ത്രത്തില്‍ ബിരുദാനന്തരബിരുദം നേടി. തുടര്‍ന്ന് കാലിക്കറ്റ് സര്‍വ്വകലാശാലയില്‍ നിന്ന് രസതന്ത്രത്തില്‍ ഗവേഷണ ബിരുദം നേടിയതിന്‌ശേഷം ഒരു ബഹുരാഷ്‌ട്ര കമ്പനിയില്‍ ബിസിനസ് ഇന്റലിജന്‍സ് ഓപ്പറേഷന്‍സ് തസ്തികയില്‍ ജോലി ചെയ്യുന്നു.
നല്ലൊരു പാട്ടുകാരികൂടിയായ ആനി സ്റ്റെഫി തെരഞ്ഞെടുപ്പ് രംഗത്തായിരുന്നില്ലെങ്കില്‍ ഇപ്പോള്‍ കരോള്‍ ഗാനം സംവിധാനം ചെയ്യുന്ന തിരക്കിലായിരിക്കുമായിരുന്നു. കെസിവൈഎം സ്റ്റേറ്റ് സെനറ്റ് മെമ്പര്‍ എന്ന ചുമതലവഹിച്ചിരുന്ന ആനിയുടെ തെരഞ്ഞെടുപ്പ് പ്രചാരണത്തിന് വലംകൈയായി അച്ഛന്‍ ജോയി വളവിലുമുണ്ട്. ബിജെപിയുടെ സിറ്റി ജില്ലാ വൈസ് പ്രസിഡന്റാണ് അദ്ദേഹം. മത്സരത്തിനിറങ്ങുമ്പോള്‍ അമ്മ സാലി ജോയിയുടെ നല്ല പിന്തുണയുമുണ്ടെന്ന് ആനി പറയുന്നു. എരഞ്ഞിപ്പാലം ഡിവിഷന്റെ യഥാര്‍ത്ഥ പ്രശ്‌നങ്ങള്‍ അറിയാവുന്ന ആനിക്ക് നിറയെ സ്വപ്‌നങ്ങളുണ്ട്. യുവത്വത്തിന്റെ പ്രതീക്ഷകളും. ”എരഞ്ഞിപ്പാലം ഡിവിഷന്റെ പ്രശ്‌നങ്ങള്‍ക്ക് പ്രത്യേകതയുണ്ട്. കോര്‍പ്പറേഷന്റെ പൊതു പ്രകടന പത്രികകൊണ്ട് പരിഹരിക്കാവുന്നതല്ല അത് അഭ്യസ്തവിദ്യരായ യുവാക്കള്‍ക്ക് തൊഴിലവസരങ്ങള്‍ സൃഷ്ടിക്കണം. വൃദ്ധരായ മാതാപിതാക്കള്‍ മാത്രമുള്ള വീടുകള്‍ നിരവധിയാണ്. അനേകം വീടുകള്‍ ഒഴിഞ്ഞു കിടക്കുന്നു. ശാന്തമായ എരഞ്ഞിപ്പാലം ഡിവിഷന്റെ തെരുവകള്‍ ഭരിക്കുന്നത് തെരുവ് നായകളാണ്.” പ്രശ്‌നങ്ങള്‍ അനവധി. അത് പരിഹരിക്കാന്‍ നിശ്ചയദാര്‍ഢ്യമുള്ള ഭരണാധികാരികളുണ്ടാകണമെന്ന് ആനി സ്റ്റെഫി പറയുന്നു.
നരേന്ദ്ര മോദി സര്‍ക്കാരിന്റെ വികസന സമീപനങ്ങളില്‍ ആകൃഷ്ടയായ യുവതയുടെ പ്രതിനിധിയാണ് ആനി സ്റ്റെഫി. അവരുടെ ഓരോ നീക്കത്തിലും ആ ആത്മവിശ്വാസം പ്രതിഫലിക്കുന്നുണ്ട്. അത് വോട്ടാകുമെന്ന പ്രതീക്ഷയില്‍ തന്നെയാണ് എന്‍ഡിഎയുടെ ഈ യുവ സ്ഥാനാര്‍ത്ഥി. മികവുറ്റ സ്ഥാനാര്‍ത്ഥികളെ നിയോഗിച്ച ബിജെപിയുടെ പ്രതീക്ഷയ്‌ക്ക് തിളക്കമേറ്റുന്നതാണ് എരഞ്ഞിപ്പാലത്തെ പുതിയ രാഷ്‌ട്രീയ രസതന്ത്രം.
ജന്മഭൂമി ഓണ്‍ലൈന്‍