മുംബൈ: ലഷ്കര് ഇ ത്വയിബ ഭീകരര് 2008ല് മുംബൈയില് നടത്തിയ ഭീകരാക്രമണത്തില് 166 പേര് കൊല്ലപ്പെട്ടിട്ടും അന്നത്തെ കോണ്ഗ്രസ് സര്ക്കാര് അതിന് പകരം വീട്ടാത്തത് കോണ്ഗ്രസിന്റെ തകര്ച്ചയ്ക്ക് കാരണമായെന്ന് ദേശീയ സുരക്ഷാഗാര്ഡ് കമാന്റോ ആയ സുരേന്ദര് സിങ്ങ്. ഭീകരാക്രമണം നേരിടാന് രൂപീകരിച്ച പ്രത്യേക പരിശീലനം നേടിയ കേന്ദ്രസേനാവിഭാഗമാണ് ദേശീയ സുരക്ഷാ ഗാര്ഡ് അഥവാ എന്എസ് ജി. മുംബൈയില് 12 ഇടത്ത് തുടര്ച്ചയായി സ്ഫോടനം നടത്തി പാകിസ്ഥാനിലെ പത്തോളം ലഷ്കര് ഭീകരര് നടത്തിയ ആക്രമണത്തിനെതിരെ പൊരുതിയ ദേശീയ സുരക്ഷാ ഗാര്ഡായിരുന്നു സുരേന്ദര് സിങ്ങ്. അന്ന് ഒമ്പത് ഭീകരരെ വധിച്ചു. ഒരാളെ ജീവനോടെ പിടിച്ചു. ജിവനോടെ പിടിച്ച അജ്മല് കസബിനെ യെര്വാദ ജയിലില് പിന്നീട് തൂക്കിലേറ്റി.
കഴിഞ്ഞ ദിവസം മുംബൈ ഭീകരാക്രമണത്തിന്റെ 17ാം വാര്ഷികച്ചടങ്ങില് സുരേന്ദര് സിങ്ങ് കോണ്ഗ്രസിനെതിരെ നടത്തിയ ഈ പ്രസ്താവന വൈറലാണ്. അതേ സമയം പഹല്ഗാമില് 26 ഇന്ത്യന് ടൂറിസ്റ്റുകളെ പട്ടാപ്പകല് വെടിവെച്ച് കൊന്നതിനെതിരെ മോദി സര്ക്കാര് ഓപ്പറേഷന് സിന്ദൂറിലൂടെ പകരം വീട്ടുകയും ചെയ്തുവെന്നും സുരേന്ദര് സിങ്ങ് പ്രസ്താവിച്ചിരുന്നു.
മുംബൈയില് നടന്ന ചടങ്ങില് സുരേന്ദര് സിങ്ങിന്റെ പ്രസംഗത്തിലെ ഒരു വിവാദഭാഗം ഇങ്ങിനെ:”ആ ഓര്മ്മകള് ഒരിയ്ക്കലും മായാത്തതാണ്. 17 വര്ഷമായെങ്കിലും അതേക്കുറിച്ച് ഓര്ക്കുമ്പോള് നട്ടെല്ലിലൂടെ ഒരു വിറയല് കടന്നുപോകും. നിറയെ മൃതദേഹങ്ങള്, കൊച്ചുകുട്ടികള്, ധീരസൈനികര്, സ്ത്രീകള്…എല്ലാവരേയും ഞാന് ആദരവോടെ ഓര്ക്കുന്നു. എങ്കിലും ആ ആക്രമണത്തില് നമ്മള് എന്താണ് നേടിയത്? ജീവനോടെ പിടികൂടിയ അജ് മല് കസബിനെ തൂക്കിലേറ്റിയത് കൊണ്ട് തീര്ക്കാവുന്നതായിരുന്നില്ല അത്. പാകിസ്ഥാന് തിരിച്ചടി നല്കുന്നതില് അന്നത്തെ സര്ക്കാര് ഒന്നും ചെയ്തില്ല.”
സുരേന്ദര് സിങ്ങിന്റെ പ്രസംഗത്തിലെ അടുത്ത ഭാഗം കോണ്ഗ്രസിനെ ശരിക്കും വെട്ടിലാക്കുന്നതായിരുന്നു:”ഓപ്പറേഷന് സിന്ദൂറിലൂടെ ഇപ്പോഴത്തെ സര്ക്കാര് പാകിസ്ഥാന് ശക്തമായ മറുപടി നല്കി. 2008ലും മുംബൈ ഭീകരാക്രമണത്തില് രാജ്യം പാകിസ്ഥാനെ ആക്രമിക്കുമെന്നാണ് ആഗ്രഹിച്ചത്. എന്നിട്ടും അന്നത്തെ കോണ്ഗ്രസ് സര്ക്കാര് ഒന്നും ചെയ്തില്ല. പാകിസ്ഥാന് ഇന്ത്യ മറുപടി നല്കുമെന്ന് അന്ന് ആ ക്രൂരകൃത്യം കണ്ട ലോകരാഷ്ട്രങ്ങലെല്ലാം ആഗ്രഹിച്ചു. കോണ്ഗ്രസ് സര്ക്കാര് അന്ന് ഒന്നും ചെയ്തില്ല. പാകിസ്ഥാനെ അവര് ആക്രമിച്ചില്ല. ശക്തമായ യാതൊരു മറുപടിയും നല്കിയില്ല.അതുകൊണ്ടാണ് ജനം കോണ്ഗ്രസ് സര്ക്കാരിനെ വേരോടെ പിഴുതെറിഞ്ഞത്. “
