പാലക്കാട്: വീട്ടിലിരുന്ന് ഓണ്ലൈനായി ഷെയര് ട്രേഡിങ് ചെയ്ത് പണമുണ്ടാക്കാമെന്ന് പറഞ്ഞ് പാലക്കാട് ശേഖരീപുരം സ്വദേശിയില് നിന്നും 45,83,165 രൂപ തട്ടിയെടുത്ത ബംഗാള് സ്വദേശി അറസ്റ്റില്.
ബംഗാള് ഹുഗ്ലി സ്വദേശിയായ ദീപു കുണ്ടു(36) എന്നയാളെയാണ് ബെംഗളൂരുവില് നിന്ന് പാലക്കാട് സൈബര് പോലീസ് പിടികൂടിയത്. ജൂലൈ മുതലാണ് തട്ടിപ്പുകാര് ഇരയെ ഫേസ് ബുക്ക് വഴിയും തുടര്ന്ന് വാട്സ് ആപ്പ് വഴിയും നിരന്തരം ബന്ധപ്പെട്ടത്. വീട്ടിലിരുന്ന് ഓണ്ലൈനായി ഷെയര്ട്രേഡിങ് ചെയ്ത് വലിയ വരുമാനമുണ്ടാക്കാമെന്ന് വാഗ്ദാനം ചെയ്തു. തുടര്ന്ന് ചെറിയ തുകകള് നിക്ഷേപിച്ച് ലാഭം നല്കി വിശ്വാസം നേടിയെടുത്തു. തുടര്ന്ന് ഭീമമായ തുക നിക്ഷേപിപ്പിച്ച് തട്ടിയെടുക്കുകയായിരുന്നു. സൈബര് പോലീസിന്റെ അന്വേഷണത്തിനിടെ പ്രതിയുടെ ബെംഗളൂരുവിലുള്ള ബാങ്കിലേക്ക് 14 ലക്ഷംരൂപ മാറ്റിയതായി കണ്ടെത്തി. ഈ തുക ഉടന് മറ്റുഅക്കൗണ്ടുകളിലേക്കും മാറ്റി. ഇതോടെ പ്രതിയെ പിന്തുടര്ന്ന് ബെംഗളൂരുവില് നിന്ന് പിടികൂടുകയായിരുന്നു.
വെസ്റ്റ് ബംഗാള് സ്വദേശിയായ പ്രതി കഴിഞ്ഞ രണ്ടുവര്ഷമായി ബെംഗളൂരുവിലാണ് താമസം. ദിവസേന കോടിക്കണക്കിന് രൂപയാണ് പ്രതിയുടെ അക്കൗണ്ട് വഴി ട്രാന്സ്ഫര് ചെയ്യുന്നത്. പ്രതിക്കെതിരെ മഹാരാഷ്ട്ര, കര്ണാടക, മധ്യപ്രദേശ്, പഞ്ചാബ്, വെസ്റ്റ് ബംഗാള്, ഗുജറാത്ത്, തമിഴ്നാട്,തെലുങ്കാന എന്നിവിടങ്ങളിലായി സമാനമായ 18ളം പരാതികള് നിലവിലുണ്ട്. ഡിസിആര്ബി ഡിവൈഎസ്പി എം. പ്രസാദിന്റെ നേതൃത്വത്തില് സൈബര് ക്രൈം ഇന്സ്പെക്ടര് ടി.ശശികുമാര്, പോലീസ് ഇന്സ്പെക്ടര്മാരായ ഡി. ഷെബീബ് റഹ്മാന്, ബൈജു സി.എല്ദോ, എസ് സിപിഒമാരായ എബ്രഹാം ടി. വര്ഗീസ്, സിപിഒമാരായ മുഹമ്മദ് ഫാസില്, യു.സുബിന്, പി.കെ.ശരണ്യ, വി.ഉല്ലാസ് എന്നിവരുള്പ്പെട്ട സംഘമാണ് കേസന്വേഷിച്ചത്.
