കോഴിക്കോട്: ഭരണമാറ്റം മാത്രമല്ല ഭരണശൈലിയിലെ മാറ്റം കൂടിയാണ് ബിജെപി കേരളത്തില് നടപ്പാക്കാനാഗ്രഹിക്കുന്നതെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് പറഞ്ഞു. പ്രസ്ക്ലബ് സംഘടിപ്പിച്ച ‘തദ്ദേശം 2025 മീറ്റ് ദ ലീഡര്’ പരിപാടിയില് സംസാരിക്കുകയായിരുന്നു അദ്ദേഹം.
പ്രവര്ത്തിക്കുന്ന സര്ക്കാരാണ് ആവശ്യം. വികസനത്തെക്കുറിച്ചുള്ള നല്ല ആസൂത്രണവും സമയബന്ധിതമായ നിര്വഹണവും ഉണ്ടാകണം. ബിജെപിയെ സംബന്ധിച്ച് ഈ തെരഞ്ഞെടുപ്പ് സെമിഫൈനലോ ക്വാര്ട്ടര് ഫൈനലോ അല്ല. ഫൈനല് മത്സരം തന്നെയാണ്. എല്ലാം ശരിയാക്കുമെന്ന് പറഞ്ഞവര് ഒന്നും ശരിയാക്കിയില്ല എന്നതാണ് കേരളാനുഭവം. കാഴ്ച്ചപ്പാടില്ലാത്ത, കഴിവില്ലാത്ത, അഴിമതി നിറഞ്ഞ ഭരണത്തില് നിന്നുള്ള മാറ്റമാണ് ബിജെപി ആഗ്രഹിക്കുന്നത്. വികസനത്തെക്കുറിച്ചുള്ള കൃത്യമായ പദ്ധതിയും നടപ്പാക്കിയത് സംബന്ധിച്ച പ്രതിവര്ഷ അവലോകനവും ജനങ്ങളുടെ മുമ്പാകെ വെക്കും. 21,065 വാര്ഡുകളില് ബിജെപി മത്സരിക്കുന്നുണ്ട്.
കേരളത്തിലെ വികസനപ്രവര്ത്തനങ്ങളില് 95 ശതമാനവും കേന്ദ്രപദ്ധതികളാണ്. ഏറ്റവും കൂടുതല് വിലക്കയറ്റം കേരളത്തിലാണ്. കടംവാങ്ങി പെന്ഷന് നല്കുന്ന സര്ക്കാറാണ് കേരളത്തിലുള്ളത്. നാടിന്റെ വികസന സാധ്യതകളെ പ്രയോജനപ്പെടുത്താന് കഴിയാത്ത സര്ക്കാരാണ് ഭരിക്കുന്നത്.
കേന്ദ്രസര്ക്കാര് ആവിഷ്കരിച്ച ലേബര് കോഡുകള് തൊഴിലാളികള്ക്ക് അനുകൂലമാണ്. ഇക്കാര്യത്തില് ആരുമായും ബിജെപി സംവാദത്തിന് തയാറാണ്. തൊഴില് രംഗത്ത് തൊഴിലാളികള്ക്കനുകൂലമായ സമൂല പരിഷ്കരണമാണ് ഇതുകൊണ്ട് ലക്ഷ്യമാക്കുന്നത്. ബിജെപിയെ തടയാന് ഇടതും വലതും ഒന്നിക്കുന്നു. തിരുവനന്തപുരം കോര്പ്പറേഷനി
ല് അടക്കം ഈ അടവാണ് യുഡിഎഫ് പ്രയോഗിക്കുന്നത്. ബിജെപിയെ പരാജയപ്പെടുത്താന് മതവര്ഗീയ ശക്തികളുമായി യുഡിഎഫ് കൂട്ടുകൂടുകയാണ്. വെല്ഫെയര് പാര്ട്ടിയുമായി പല ജില്ലകളിലും അവര് പരസ്യ സഖ്യത്തിലാണ്. ഭരണഘടനയേയും ജനാധിപത്യത്തെയും അംഗീകരിക്കാത്ത മുസ്ലിം വര്ഗീയ ശക്തികളുമായാണ് കോണ്ഗ്രസ് കൂട്ടുകൂടുന്നത്. ഈ തെരഞ്ഞെടുപ്പില് ബിജെപി വന്മുന്നേറ്റം സൃഷ്ടിക്കും.
കണ്ണൂര് ജില്ലയിലെ ചില പ്രദേശങ്ങളില് സിപിഎമ്മിന് എതിരെ മത്സരിക്കാനാവാത്ത തരത്തില് മറ്റു രാഷ്ട്രീയ പാര്ട്ടികളെ ഭീഷണിപ്പെടുത്തുകയാണ്. ഞെട്ടിക്കുന്ന സാഹചര്യമാണിത്. എതിരില്ലാതെ തെരഞ്ഞെടുക്കപ്പെടുകയല്ല, ഭീഷണിപ്പെടുത്തി മത്സരത്തില് നിന്ന് മാറ്റുകയാണ്. ഈ സാഹചര്യം ഇനി അനുവദിക്കില്ല. അദ്ദേഹം പറഞ്ഞു. പ്രസ്സ് ക്ലബ് പ്രസിഡന്റ് ഇ.പി. മുഹമ്മദ് അധ്യക്ഷനായി. സെക്രട്ടറി പി.കെ. സജിത്ത്, ബിജെപി സിറ്റി ജില്ലാ പ്രസിഡന്റ് അഡ്വ. കെ.പി. പ്രകാശ്ബാബു എന്നിവര് പങ്കെടുത്തു.
