ആലപ്പുഴ: ജാതിചിന്തകള്‍ ഉപേക്ഷിച്ച് ഒന്നിച്ചുനിന്നില്ലെങ്കില്‍ കേരളത്തില്‍ ഹൈന്ദവ ജനത ഇല്ലാതാകുന്ന സ്ഥിതിയുണ്ടാകുമെന്ന് എസ്എന്‍ഡിപിയോഗം ജനറല്‍ സെക്രട്ടറി വെള്ളാപ്പള്ളി നടേശന്‍. യുഎഇയിലെ എസ്എന്‍ഡിപി യോഗം സേവനം നേതൃസംഗമം ഓണ്‍ലൈനിലൂടെ ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തിലെ ജാതിയാതനക്കെതിരായ ആദ്യ മഹാസമരമായ വൈക്കം സത്യഗ്രഹത്തിന് നൂറ് വര്‍ഷം പൂര്‍ത്തിയായി. ജാതിവിവേചനത്തിന്റെ കോട്ടകളെ തകര്‍ത്തെറിഞ്ഞതില്‍ വൈക്കം സത്യഗ്രഹത്തിന്റെ പങ്ക് പുതിയ തലമുറ തിരിച്ചറിയണം. അവര്‍ണന്റെ ക്ഷേത്രപ്രവേശനത്തിനായി അരങ്ങേറിയ 603 ദിനങ്ങള്‍ നീണ്ട പോരാട്ടം സമാപിച്ചതിന്റെ ശതാബ്ദി ദിനത്തിലാണ് ഈ നേതൃസംഗമം നടക്കുന്നത്. നൂറുവര്‍ഷം മുമ്പ് സവര്‍ണ മാടമ്പിത്തരത്തിനെതിരെ സമരം ചെയ്യാന്‍ പിന്നാക്ക, പട്ടികവിഭാഗക്കാര്‍ക്കൊപ്പം മന്നത്ത് പത്മനാഭന്‍ ഉള്‍പ്പടെയുള്ള നേതാക്കള്‍ അണിനിരന്നെന്നും വെള്ളാപ്പള്ളി ചൂണ്ടിക്കാട്ടി.
ഇന്ന് കേരളത്തിലെ സാമൂഹ്യജീവിതത്തില്‍ ജാതി, മത വിവേചനങ്ങള്‍ പുതിയ രീതിയില്‍ കൂടുതല്‍ രൂക്ഷതയോടെ തിരിച്ചുവരുന്നുണ്ട്. പിന്നാക്ക, പട്ടികവിഭാഗങ്ങളെ മുഖ്യധാരയിലേക്കെത്തിക്കാനുള്ള സംവരണം പോലുള്ള നടപടികള്‍ ഇന്നും ലക്ഷ്യം കണ്ടിട്ടില്ല. മതതീവ്രവാദം ശക്തിപ്രാപിക്കുന്നത് കേരളത്തിന് ഭീഷണിയാണ്. പൊതുവിഭവങ്ങള്‍ ജനസംഖ്യാനുപാതികമായി പങ്കുവയ്‌ക്കുന്നതിന് പകരം ചില സംഘടിത മതവിഭാഗങ്ങള്‍ വോട്ടുബാങ്കിന്റെ ബലത്തില്‍ ഇത് തട്ടിയെടുക്കുന്നു. ഗള്‍ഫ് നാടുകളില്‍ എസ്എന്‍ഡിപി യോഗത്തിന്റെ സാന്നിദ്ധ്യം മലയാളികള്‍ക്കാകെ ഗുണം ചെയ്യുന്നുണ്ട്. പ്രവാസികളുടെ സ്വപ്‌നങ്ങള്‍ ചേര്‍ത്തെടുത്താണ് കേരളത്തിന്റെ വികസനയാത്ര. അവരുടെ ജീവിത കഥകളാണ് ഇന്ന് ”ഗ്ലോബല്‍ കേരള” എന്ന ആശയത്തിന് ജീവന്‍ പകരുന്നത്. കേരളത്തിന്റെ മുന്നേറ്റം പ്രവാസികളുടെ വിയര്‍പ്പിന്റെ ബലത്തിലാണെന്നും വെള്ളാപ്പള്ളി പറഞ്ഞു.
എസ്എന്‍ഡിപി യോഗം യുഎഇ കോ ഓര്‍ഡിനേറ്ററും പന്തളം യൂണിയന്‍ പ്രസിഡന്റുമായ അഡ്വ. സിനില്‍ മുണ്ടപ്പള്ളി അധ്യക്ഷനായി. യുഎഇയിലെ ഒന്‍പത് യൂണിയന്‍ ഭാരവാഹികള്‍, ബോര്‍ഡ് അംഗങ്ങള്‍ എന്നിവര്‍ പങ്കെടുത്തു.
