ടെല് അവീവ്: യൂറോപ്പിലുടനീളം ഹമാസ് ശൃംഖല വളര്ത്തിയെടുക്കുന്നുണ്ടെന്ന് ഇസ്രയേലിന്റെ രഹസ്യാന്വേഷണ വിഭാഗം മൊസാദ് വെളിപ്പെടുത്തി. ഭീകര സംഘടനയായ ഹമാസുമായി ബന്ധമുള്ളവരെ യൂറോപ്യന് രാജ്യങ്ങളുടെ സഹായത്തോടെ അറസ്റ്റ് ചെയ്തെന്നും നിരവധി ആയുധങ്ങള് കണ്ടെത്തിയെന്നും മൊസാദ് വ്യക്തമാക്കി. ജര്മനി, ഓസ്ട്രിയ തുടങ്ങിയ രാജ്യങ്ങളില് റെയ്ഡുകള് നടന്നു.
യൂറോപ്പിലെ ഇസ്രയേല് പൗരന്മാരെയും സ്ഥാപനങ്ങളെയും ആക്രമിക്കാനായിരുന്നു ലക്ഷ്യം. നിര്ദേശം ലഭിച്ചാലുടന് ആക്രമണം നടത്താനായിരുന്നു പദ്ധതി.
കഴിഞ്ഞ സപ്തംബറില് വിയന്നയില് നിന്ന് ആയുധങ്ങളും സ്ഫോടകവസ്തുക്കളും ഓസ്ട്രിയയുടെ സ്റ്റേറ്റ് സെക്യൂരിറ്റി ആന്ഡ് ഇന്റലിജന്സ് ഡയറക്ടറേറ്റ് (ഡിഎസ്എന്) പിടിച്ചെടുത്തതിനെ തുടര്ന്നാണ് ഹമാസ് ശൃംഖലകളെപ്പറ്റിയുള്ള അന്വേഷണം യൂറോപ്പില് ആരംഭിച്ചത്. കണ്ടെത്തിയ ആയുധങ്ങളും മറ്റും ഹമാസ് പ്രവര്ത്തകനായിരുന്ന മുഹമ്മദ് നയീമിന്റേതാണെന്ന് പിന്നീട് സ്ഥിരീകരിച്ചു. ഇയാള്ക്ക് ഹമാസിന്റെ മുതിര്ന്ന നേതാവ് ഖലീല് അല്- ഹയ്യയുയുമായി അടുത്ത ബന്ധമുണ്ടായിരുന്നതായി ഔദ്യോഗിക വൃത്തങ്ങള് പറയുന്നു.
