തിരുവനന്തപുരം: ആശാ സമരത്തെ അപമാനിച്ചവര്ക്ക് വോട്ട് നല്കരുതെന്ന അഭ്യര്ത്ഥനയുമായി ആശപ്രവര്ത്തകര് പ്രചരണം തുടങ്ങിയതോടെ വെട്ടിലായി സിപിഎം.
കേരള ആശ ഹെല്ത്ത് വര്ക്കേഴ്സ് അസോസിയേഷന്റെ നേതൃത്വത്തിലാണ് ആശമാര് സംസ്ഥാന വ്യാപകമായി വീടു വീടാന്തരം ക്യാമ്പയിന് നടത്തുന്നത്.
പ്രതിദിനം ലഭിക്കുന്ന 233 രൂപ വേതനം കൊണ്ട് ഒരു കുടുംബത്തിന് പട്ടിണിയില്ലാതെ ജീവിക്കാന് കഴിയില്ല. എല്ഡിഎഫിന്റെ തെരഞ്ഞെടുപ്പ് പ്രകടനപത്രികയില് വാഗ്ദാനം ചെയ്ത മിനിമം കൂലിയായ 700 രൂപ നല്കാമെന്ന് പറഞ്ഞ് പറ്റിച്ചെന്നും പ്രചരണം നടത്തുന്നു. ആര്ഭാടങ്ങള് ഒന്നും കുറയ്ക്കാത്ത സര്ക്കാര് തങ്ങളുടെ കാര്യം വരുമ്പോള് പണമില്ലെന്ന മറുപടിയാണ് നല്കുന്നത്. ഇത് വേതനം വര്ദ്ധിപ്പിച്ച് തരാതിരിക്കുന്നതിനു വേണ്ടിയാണെന്ന് ആശമാര് പറയുന്നു.
മിനിമം വേതനത്തോടൊപ്പം മറ്റ് സംസ്ഥാനങ്ങളില് നല്കുന്നതുപോലെ അഞ്ച് ലക്ഷം രൂപ വിരമിക്കല് ആനുകൂല്യം നല്കണമെന്ന ആവശ്യം ന്യായമാണെന്ന് പൊതുസമൂഹം അംഗീകരിച്ചിട്ടും മന്ത്രി വീണാ ജോര്ജ് ഇത് സംബന്ധിച്ച് ചര്ച്ച പോലും നടത്താതെ ഒഴിഞ്ഞു മാറി. സംസ്ഥാന സര്ക്കാരും സര്ക്കാരിനുവേണ്ടി കുഴലൂതുന്ന ചില ട്രേഡ് യൂണിയന് നേതാക്കളും സമരം അനാവശ്യമാണെന്നും തിരുവനന്തപുരത്തല്ല ദല്ഹിയിലാണ് സമരം നടത്തേണ്ടതെന്നും ആവര്ത്തിച്ചു പറയുകയായിരുന്നു.
സംസ്ഥാന സര്ക്കാര് നടത്തുന്ന പ്രചാരണത്തിന്റെ പൊള്ളത്തരം നിശിതമായി തുറന്നു കാട്ടപ്പെട്ടതില് വിറളിപൂണ്ട സര്ക്കാരും അതിന്റെ പിആര് സോഷ്യല് മീഡിയ സംഘവും സര്ക്കാര് അനുകൂല വിലാസം ട്രേഡ് യൂണിയനുകള് നേതാക്കളും അസഭ്യവും അശ്ലീലവും കൊണ്ട് സമരനേതൃത്വത്തെയും ആശമാരെ ഒന്നടങ്കവും അപമാനിക്കാന് ശ്രമിച്ചതായും ഇവര് പറയുന്നു.
