കോട്ടയം: ചൂടും ചൂരും നിറഞ്ഞ വാര്‍ത്തകളുടെ ലോകത്തു നിന്ന് കോട്ടയം ജില്ലയിലെ അയ്‌മനം പഞ്ചായത്തിലെ 20-ാം വാര്‍ഡില്‍ എന്‍ഡിഎ സ്ഥാനാര്‍ത്ഥിയായി മത്സരത്തിന് ഇറങ്ങുമ്പോള്‍ വൈഷ്ണവിക്ക് ഇത് വേറിട്ട അനുഭവം.
വാര്‍ത്തകളിലൂടെ അയ്‌മനത്തെ ജനങ്ങള്‍ കാലങ്ങളായി അനുഭവിക്കുന്ന ദുരിതങ്ങളെ അധികാര കേന്ദ്രങ്ങളുടെ ശ്രദ്ധയിലേക്ക് എത്തിച്ചിട്ടുള്ള വൈഷ്ണവി സി.എസ്. ജന്മഭൂമി കോട്ടയം യൂണിറ്റിലെ സബ് എഡിറ്ററാണ്.
ബിരുദാനന്തര ബിരുദശേഷം പത്രപ്രവര്‍ത്തനത്തിന്റെ തുടക്കം കലാകൗമുദിയിലായിരുന്നു. നാല് വര്‍ഷമായി ജന്മഭൂമിക്ക് ഒപ്പമാണ്. അയ്‌മനം പഞ്ചായത്തിന്റെ വിവിധ ഭാഗങ്ങളില്‍ ജനങ്ങള്‍ നേരിടുന്ന നിരവധി പ്രശ്‌നങ്ങള്‍ നേരത്തേതന്നെ വൈഷ്ണവിയുടെ ഹൃദയത്തെ സ്പര്‍ശിച്ചിട്ടുള്ളതാണ്. പലപ്പോഴായി താനുയര്‍ത്തിയിട്ടുള്ള പ്രശ്‌നങ്ങളുടെ പരിഹാരത്തിനായി നേരിട്ട് പ്രവര്‍ത്തിക്കണമെന്ന ആഗ്രഹമാണ് രാഷ്‌ട്രീയ പ്രവേശനത്തിന് പിന്നിലെന്ന് വൈഷ്ണവി പറയുന്നു. കേന്ദ്ര സര്‍ക്കാര്‍ പദ്ധതികളും ആനുകൂല്യങ്ങളും കൂടുതല്‍ ജനങ്ങളിലേക്ക് എത്തിക്കുക എന്നതാണ് പ്രധാന ലക്ഷ്യം.
കോഴിക്കോട് സ്വദേശിയായ വൈഷ്ണവി വിവാഹത്തിന് ശേഷമാണ് കോട്ടയത്ത് എത്തിയത്. പരിപ്പ് കൊണ്ടൂപറമ്പില്‍ കൃഷ്ണനുണ്ണിയുടെ ഭാര്യയാണ് വൈഷ്ണവി.
