ആലപ്പുഴ: ജില്ലയിലെ നൂറനാട് ആസ്ഥാനമായി പ്രവര്‍ത്തിക്കുന്ന ഇന്‍ഡോ ടിബറ്റന്‍ ബോര്‍ഡര്‍ പോലീസ് (ഐടിബിപി) 27ാം ബറ്റാലിയന്‍, വിശിഷ്ടമായ ഓപ്പറേഷണല്‍ നേട്ടങ്ങള്‍ക്കും ജനസേവന പ്രവര്‍ത്തനങ്ങള്‍ക്കുമായി മികച്ച ആന്റി നക്സല്‍ ബറ്റാലിയനുള്ള ട്രോഫി നേടി.
കേരളത്തിലാണ് ആസ്ഥാനമെങ്കിലും, 27-ാം ഐടിബിപി ബറ്റാലിയന്‍ മഹാരാഷ്‌ട്രയിലെ ഗഡ്ചിരോളിയും ചത്തിസ്ഗഡിലെ കാങ്കേറുമായി അതിര്‍ത്തി പങ്കിടുന്ന, വെല്ലുവിളികളും അപകടങ്ങളും നിറഞ്ഞ മൊഹലാമാന്‍പൂര്‍ മേഖലയിലാണ് തന്ത്രപ്രധാനമായി വിന്യസിച്ചിരിക്കുന്നത്. 2026 മാര്‍ച്ചിനുള്ളില്‍ നക്സല്‍ ഭീഷണി പൂര്‍ണമായും ഇല്ലാതാക്കാന്‍ കേന്ദ്രസര്‍ക്കാര്‍ ലക്ഷ്യമിടുന്ന സാഹചര്യത്തില്‍, ഈ യൂണിറ്റിന്റെ സംഭാവന നിര്‍ണായകമാണ്. 2025 ആഗസ്റ്റില്‍ നടന്ന ഒരു പ്രധാന ഏറ്റുമുട്ടലില്‍, 27-ാം ബറ്റാലിയന്‍ രണ്ട് മുതിര്‍ന്ന നക്സല്‍ നേതാക്കളായ വിജയ് റെഡ്ഢി (സ്റ്റേറ്റ് സോണല്‍ കമ്മിറ്റി അംഗം), ലോകേഷ് സലാമി (രാജ്നന്ദ്ഗാവ് – കാങ്കേര്‍ ബോര്‍ഡര്‍ ഡിവിഷന്‍ സെക്രട്ടറി) എന്നിവരെ വധിച്ചത് വലിയ വിജയമായി കണക്കാക്കപ്പെടുന്നു.
ചത്തീസ്ഗഡിലെ ഓപ്പറേഷനുകള്‍ക്ക് പുറമേ, നൂറനാട് ആസ്ഥാനമായ ഈ ബറ്റാലിയന്‍ ദുരന്തനിവാരണ, രക്ഷാപ്രവര്‍ത്തനങ്ങള്‍ക്കും മുന്‍ സിഎപിഎഫ് സേനാംഗങ്ങളുടെ ക്ഷേമ പ്രവര്‍ത്തനങ്ങള്‍ക്കും പ്രധാന കേന്ദ്രമായി പ്രവര്‍ത്തിച്ചുവരുന്നു.
ജമ്മു കാശ്മീരിലെ ഉധംപൂരില്‍ നടന്ന ഐടിബിപി സ്ഥാപകദിന പരേഡില്‍ ഐടിബിപി ഡയറക്ടര്‍ ജനറല്‍ പ്രവീണ്‍ കുമാറില്‍ നിന്ന് കമാണ്ടന്റുമാരായ വിവേക് കുമാര്‍ പാന്‍ഡെയും ബുദ്ധിപ്രകാശ് ബഡായയുമാണ് ട്രോഫി ഏറ്റുവാങ്ങിയത്.
