അമരാവതി: ശ്രീസത്യസായി ബാബയുടെ ജന്മശതാബ്ദി ആഘോഷങ്ങളില് പങ്കെടുക്കാന് പ്രധാനമന്ത്രി നരേന്ദ്ര മോദി ഇന്നലെ രാവിലെ ആന്ധ്രാപ്രദേശിലെ പുട്ടപര്ത്തിയിലെത്തി.
പുട്ടപര്ത്തി വിമാനത്താവളത്തിലെത്തിയ പ്രധാനമന്ത്രിയെ ആന്ധ്രാപ്രദേശ് മുഖ്യമന്ത്രി എന്. ചന്ദ്രബാബു നായിഡു, ഉപമുഖ്യമന്ത്രി പവന് കല്യാണ്, മാനവ വിഭവശേഷി മന്ത്രി നര ലോകേഷ്, ശ്രീസത്യസായി സെന്ട്രല് ട്രസ്റ്റ് മാനേജിങ് ട്രസ്റ്റി ആര്.ജെ. രത്നാകര് എന്നിവര് ചേര്ന്ന് സ്വീകരിച്ചു. തുടര്ന്ന് പ്രധാനമന്ത്രി മോദി പ്രശാന്തിനിലയത്തിലെത്തി ശ്രീസത്യസായി ബാബയുടെ മഹാസമാധിയില് പ്രാര്ത്ഥന നടത്തി. പുരോഹിതരുടെ വേദ ശ്ലോക ആലാപനത്തിനിടയില് അദ്ദേഹം ശ്രീസത്യസായി ബാബയുടെ സ്വര്ണ പ്രതിമയില് പ്രത്യേക പൂജകള് നടത്തുകയും അല്പ നേരം ധ്യാനിക്കുകയും ചെയ്തു.
പ്രശാന്തിനിലയത്തില് വെച്ച് ട്രസ്റ്റ് അംഗങ്ങളുമായി സംവദിച്ച ശേഷം അദ്ദേഹം ശതാബ്ദി ആഘോഷങ്ങളുടെ പ്രധാനവേദിയായ ഹില് വ്യൂ സ്റ്റേഡിയത്തിലേക്ക് പോയി. അവിടെ ജന്മശതാബ്ദി ആഘോഷങ്ങളില് പ്രധാനമന്ത്രി നരേന്ദ്ര മോദിയോടൊപ്പം ക്രിക്കറ്റ് ഇതിഹാസം സച്ചിന് ടെണ്ടുല്ക്കര്, മുന് ലോക സുന്ദരിയും പ്രശസ്ത ബോളിവുഡ് നടിയുമായ ഐശ്വര്യ റായ് ബച്ചന്, കേന്ദ്രമന്ത്രിമാരായ റാം മോഹന് നായിഡു കിഞ്ചരാപു, ജി. കിഷന് റെഡ്ഡി എന്നിവരും പങ്കെടുത്തു.
പരിപാടിയില്, ജാതി, മതം, ഐക്യം എന്നിവയെക്കുറിച്ച് ഐശ്വര്യ റായ് സംസാരിച്ചു. ‘നമ്മുടെ ബഹുമാന്യനായ പ്രധാനമന്ത്രി നരേന്ദ്ര മോദിജി, നിങ്ങള്ക്ക് ഞാന് ഹൃദയംഗമമായ നന്ദി അറിയിക്കുന്നു. നിങ്ങളുടെ ഇവിടത്തെ സാന്നിധ്യം ഈ ശതാബ്ദി ആഘോഷത്തിന് പവിത്രതയും പ്രചോദനവും നല്കുന്നു’, ഐശ്വര്യാ റായ് പറഞ്ഞു. പ്രസംഗത്തിന് ശേഷം ഐശ്വര്യ റായ് പ്രധാനമന്ത്രിയുടെ കാല് തൊട്ടു വണങ്ങി.
പരിപാടിയുടെ ഭാഗമായി, ശ്രീസത്യസായി ബാബയുടെ ജീവിതത്തെയും ദര്ശനങ്ങളെയും ആദരിച്ചുകൊണ്ടുള്ള സ്മാരക നാണയവും തപാല് സ്റ്റാമ്പുകളും മോദി പുറത്തിറക്കി. വര്ണാഭമായ സാംസ്കാരിക പരിപാടികളോടെയാണ് ശതാബ്ദി ആഘോഷങ്ങള് ആരംഭിച്ചത്. സത്യസായി സെന്ട്രല് ട്രസ്റ്റ് നടത്തുന്ന വിദ്യാഭ്യാസ സ്ഥാപനങ്ങളില് നിന്നുള്ള നൂറുകണക്കിന് വിദ്യാര്ത്ഥികള് പരിപാടിയില് പങ്കെടുത്തു. ജന്മശതാബ്ദി ആഘോഷങ്ങള്ക്ക് ശേഷം പ്രധാനമന്ത്രി ദക്ഷിണേന്ത്യന് കാര്ഷിക ഉച്ചകോടിയില് പങ്കെടുക്കാന് കോയമ്പത്തൂരിലേക്ക് പോയി.
