കോഴിക്കോട്: ശബരിമല തീര്ത്ഥാടത്തിനെത്തുന്ന അന്യസംസ്ഥാന അയ്യപ്പ ഭക്തരുടെ വാഹനങ്ങള് ലക്ഷ്യം വച്ച് സംസ്ഥാനത്തിന്റെ വിവിധ ഭാഗങ്ങളില് ചെക്ക് പോസ്റ്റ് സ്ഥാപിക്കുന്നത് വിശ്വാസികളോടുള്ള കടുത്ത വെല്ലുവിളിയാണെന്ന് കേരളാ ക്ഷേത്ര സംരക്ഷണ സമിതി സംസ്ഥാന പ്രസിഡന്റ് മുല്ലപ്പള്ളി കൃഷ്ണന് നമ്പൂതിരി.
മോട്ടോര് വാഹന വകുപ്പിന്റെ അതിര്ത്തി ചെക്ക് പോസ്റ്റുകളെല്ലാം മൂന്ന് മാസത്തിനുള്ളില് അടച്ചുപൂട്ടുമെന്ന് ഗതാഗത മന്ത്രി ഏതാനും മാസം മുമ്പ് പ്രഖ്യാപിച്ചിരുന്നു. ഇത് മറച്ചുപിടിച്ച്, ശബരിമല തീര്ത്ഥാടനകാലം കഴിയുന്നതുവരെ ചെക്ക് പോസ്റ്റ് ഏര്പ്പെടുത്താനുള്ള നീക്കം അയ്യപ്പ ഭക്തരോടും അതുവഴി ഹൈന്ദവ സമൂഹത്തോടുമുള്ള സര്ക്കാറിന്റെ അവഗണനയാണ്. ശബരിമലയിലെത്തുന്ന ലക്ഷക്കണക്കിന് ഭക്തജനങ്ങള്ക്ക് അടിസ്ഥാന സൗകര്യങ്ങള് ഒരുക്കാത്തതില് ഹൈക്കോടതിയില് നിന്ന് കടുത്ത വിമര്ശനം നേരിട്ട സര്ക്കാര് അതു പരിഹരിക്കാതെ ശബരിമല തീര്ത്ഥാടകരെ പിഴുതെടുക്കാനുള്ള നീക്കമാണ് നടത്തുന്നത്. ഈ സമീപനത്തില് നിന്നും അധികൃതര് പിന്മാറണമെന്ന് അദ്ദേഹം പ്രസ്താവനയിലൂടെ അറിയിച്ചു.
