ചെന്നൈ: മലയാളികളുടെ സ്വന്തം സഞ്ജു സാംസൺ രാജസ്ഥാൻ റോയൽസിൽ നിന്നും ചെന്നൈ സൂപ്പർ കിംഗ്സിലേക്ക്. From God’s Own Country to Lion’s Own Den! 💛 സ്വാഗതം, സഞ്ജു! എന്നായിരുന്നു സഞ്ജുവിന്റെ പോസ്റ്റർ പങ്കുവച്ച് ചെന്നൈ കുറിച്ചത്. സൂപ്പർതാരം രവീന്ദ്ര ജഡേജ, സാം കറൻ എന്നീ മുൻനിര താരങ്ങൾക്ക് പകരമാണ് സഞ്ജുവിനെ ചെന്നൈ എടുത്തിരിക്കുന്നത്. പകരം ഇവർ രണ്ട് പേരും രാജസ്ഥാൻ റോയൽസിലേക്ക് പോവും.
സഞ്ജു സാംസണ് 2021 മുതല് രാജസ്ഥാനെ നയിക്കുന്നുണ്ട്. ആ വര്ഷം ടീമിനെ ഫൈനലിലെത്തിക്കുകയും ചെയ്തു. ജഡേജയാവട്ടെ, 2012 മുതല് സിഎസ്കെയുടെ കൂടെയുണ്ട്. ടീമിന്റെ മൂന്ന് കിരീടനേട്ടങ്ങളിൽ പങ്കാളിയുമാണ്. സഞ്ജുവിനെ സംബന്ധിച്ച് ഇതൊരു നല്ല നീക്കമാണെന്ന് തന്നെയാണ് വിലയിരുത്തൽ. പ്രത്യേകിച്ച് വരും വർഷങ്ങളിൽ മഹേന്ദ്ര സിംഗ് ധോണി എന്ന അതികായൻ ക്രിക്കറ്റിനോട് വിടപറയുമ്പോൾ മഞ്ഞക്കുപ്പായത്തിൽ ചെന്നൈ ടീമിനെ നയിക്കാനും ഗ്ലൗ അണിയാനും ഏറ്റവും യോഗ്യനാവും സഞ്ജു സാംസൺ.
സഞ്ജു സാംസൺ ഫ്രാഞ്ചൈസി വിട്ടെന്ന് ഔദ്യോഗികമായി സ്ഥിരീകരിച്ച് രാജസ്ഥാൻ റോയൽസും രംഗത്ത് എത്തി. രാവിലെ 10 മണിയോടെയാണ് ഒഫീഷ്യൽ പേജുകളിൽ ഇതു സംബന്ധിച്ച പോസ്റ്റ് ക്ലബ്ബ് പങ്കുവച്ചത്. “രാജസ്ഥാന്റെ നീലക്കുപ്പായത്തിൽ ഒരു പയ്യനായാണ് നിങ്ങൾ വന്നത്. ഇന്ന് ഞങ്ങൾ വിട പറയുന്നത് ക്യാപ്ടനോടും നേതാവിനോടും ഞങ്ങളുടെ സ്വന്തം ചേട്ടനോടുമാണ്. പ്രിയപ്പെട്ട സഞ്ജു സാംസൺ, എല്ലാത്തിനും നന്ദി,” രാജസ്ഥാൻ റോയൽസ് എക്സിൽ കുറിച്ചു.
കഴിഞ്ഞ രണ്ട് സീസണുകളിലായി പ്ലേ ഓഫ് പോലും എത്താതെ പാതിവഴിയിൽ വീണ ചെന്നൈ സൂപ്പർ കിംഗ്സിന് സഞ്ജുവിന്റെ വരവ് നല്ല രീതിയിൽ ഗുണം ചെയ്യുമെന്നാണ് കൂടുതൽ പേരും അഭിപ്രായപ്പെടുന്നത്. സഞ്ജുവിന്റെ വരവ് ഒന്നല്ല രണ്ട് രീതിയിൽ ചെന്നൈക്ക് ഗുണകരമാവും എന്നാണ് മുൻ ഇന്ത്യൻ താരം കൂടിയായി ചേതേശ്വർ പൂജാര പറയുന്നത്.
