പട്ന: ബീഹാറിലെ ഏറ്റവും പ്രായം കുറഞ്ഞ എംഎല്എയാകുകയാണ് നാടോടി ഗായിക മൈഥിലി ഠാക്കൂര്. അലിനഗര് മണ്ഡലത്തില് നിന്നാണ് ബിജെപി സ്ഥാനാര്ത്ഥിയായ മൈഥിലി ഠാക്കൂര് വിജയിച്ചത്. പ്രധാനമന്ത്രി നരേന്ദ്ര മോദിയുടെ പ്രസംഗത്തില് ആകൃഷ്ടയായാണ് 25കാരി ജനസേവനത്തിന് ഇറങ്ങിയത്.
മധുബനി ജില്ലയിലെ ബെനിപട്ടിയാണ് സ്വദേശം. ബീഹാറിന്റെ നാടോടി സംസ്കാരം പാട്ടുകളിലൂടെ ലോകത്തെ അറിയിക്കുന്നവരാണ് മൈഥിലിയും സഹോദരന്മാരും. നാടോടി, ഭക്തിഗാനങ്ങളിലൂടെ സോഷ്യല് മീഡിയയിലും താരമാണ്. 2024ല് മൈഥിലിയുടെ പാട്ടുകളെ പ്രധാനമന്ത്രി മന് കി ബാത്തില് പ്രശംസിച്ചിരുന്നു. ഹിന്ദി, ഭോജ്പുരി, പഞ്ചാബി, ഇംഗ്ലീഷ് ഗാനങ്ങള് പാടുന്ന മൈഥിലി ‘മിഥിലയുടെ സാംസ്കാരിക ശബ്ദം’ എന്നാണ് അറിയപ്പെടുന്നത്.
മിഥിലാഞ്ചല് മേഖലയില് സ്വാധീനം ഉറപ്പിക്കാനും യുവ വോട്ടര്മാരെ സ്വാധീനിക്കാനുമുള്ള ബിജെപിയുടെ തന്ത്രപരമായ നീക്കമാണ് അലിനഗറില് വിജയം കണ്ടത്. ഇന്സ്റ്റയില് മാത്രം 6.3 മില്യന് ഫോളോവേഴ്സാണ് മൈഥിലിക്കുള്ളത്.
2008ലാണ് അലിനഗര് നിയമസഭാ മണ്ഡലം രൂപീകരിച്ചത്. 2010ല് നടന്ന ആദ്യ നിയമസഭാ തെരഞ്ഞെടുപ്പിലും 2015ലും വിജയിച്ചത് ആര്ജെഡിയുടെ അബ്ദുള് ബാരി സിദ്ദിഖിയാണ്. 2020 ല് വികാസ് ശീല് ഇന്സാന് പാര്ട്ടിയുടെ മിസ്രി ലാല് യാദവ് നേടിയ അട്ടിമറി വിജയം ആര്ജെഡിയെ ഞെട്ടിച്ചു. മണ്ഡലം തിരിച്ചുപിടിക്കാനുള്ള ശ്രമങ്ങള് ആര്ജെഡി തുടരുന്നതിനിടെയാണ് മൈഥിലി ഠാക്കൂറിനെ ഇറക്കി ബിജെപിയുടെ അപ്രതീക്ഷിത നീക്കം.
