പട്ന: ബീഹാറിലെ ആലിനഗര് മണ്ഡലത്തില് വിജയകിരീടം ചൂടിയ ബിജെപിയുടെ 20കാരിയായ സ്ഥാനാര്ത്ഥി മൈഥിലി താക്കൂര് പറയുന്നു- ആലിനഗറിന്റെ പേര് സീതാനഗര് എന്നാക്കി മാറ്റും. മിഥില പ്രദേശത്തില് ഉള്പ്പെടുന്ന പ്രദേശമാണ് ആലിനഗര്. മിഥില ഒരു കാലത്ത് സീതാദേവിയുടെ പിതാവ് ജനകമഹാരാജാവ് ഭരിച്ചിരുന്ന സ്ഥലമാണ്. ആലിനഗറിന് സീതാദേവിയുടെ പേര് നല്കുമെന്ന് തെരഞ്ഞെടുപ്പ് പ്രചാരണകാലത്ത് തന്നെ മൈഥിലി താക്കൂര് നല്കിയ ഉറപ്പായിരുന്നു.
മൈഥിലി താക്കൂര് മിഥിലയുടെ രാജകുമാരിയാകും എന്ന ബിജെപിയുടെ കണക്കുകൂട്ടലാണ് ശനിയാഴ്ച വോട്ടെണ്ണലില് കണ്ടത്. 11000ല് പരം വോട്ടുകളുടെ ഭൂരിപക്ഷത്തിനാണ് മൈഥിലി താക്കൂര് വിജയിച്ചത്. ആര്ജെഡിയുടെ പരിചയസമ്പന്നനായ ബിനോദ് മിശ്രയെയാണ് രാഷ്ട്രീയപാരമ്പര്യം അവകാശപ്പെടാനില്ലാത്തെ മൈഥിലി വന്ഭൂരിപക്ഷത്തിന് മലര്ത്തിയടിച്ചത്. 2020ല് വികാസ് ശീല് പാര്ട്ടിക്ക് (വിഐപി) വേണ്ടി മത്സരിച്ച മിശ്രിലാല് യാദവ് 4000 വോട്ടുകള്ക്ക് ജയിച്ച മണ്ഡലമാണ് ആലി നഗര്.ഇക്കുറി വികാസ് ശീല് പാര്ട്ടി തേജസ്വി യാദവിന്റെ ആര്ജെഡിയുടെ സഖ്യകക്ഷിയായിരുന്നു. അതിനാല് ആര്ജെഡിയുടെ മണ്ഡലത്തിലെ പരിചിതമുഖമായ ബിനോദ് മിശ്ര മണ്ഡലം പിടിക്കുമോ എന്ന ആശങ്കയുണ്ടായിരുന്നു. ബ്രാഹ്മണര്, യാദവര്, മുസ്ലിങ്ങള് എന്നീ സമുദായങ്ങളാണ് ഈ മേഖലയിലെ പ്രധാന വോട്ടര്മാര്.പൊതുവേ ആര്ജെഡിയെ പിന്തുണയ്ക്കുന്നവരാണ് യാദവരും മുസ്ലിങ്ങളും. എന്നിട്ടും മൈഥിലി 11000ല് പരം വോട്ടുകള്ക്ക് ജയിച്ചു കയറി എന്നത് നിസ്സാര വിജയമല്ല. ഈ മണ്ഡലത്തിലെ മീന്പിടുത്തകുടുംബക്കാരായ നിഷാദരുടെ വോട്ടുകള് മൈഥിലിക്ക് കിട്ടിയെന്നാണ് കണക്കാക്കുന്നത്.
ഒരു രാഷ്ട്രീയപാരമ്പര്യവുമില്ലാത്ത കുടുംബത്തിലെ പെണ്കുട്ടി മിഥിലയുടെ അഭിമാനമായി ജയിച്ച് കയറി വരുമെന്ന അമിത് ഷായുടെ പ്രവചനം ശരിയായി. ലാലുപ്രസാദ് യാദവിന്റെ കാട്ടുനീതി ഭരണകാലത്ത് ബീഹാര് വിട്ട് ഓടിപ്പോകേണ്ടിവന്ന ആളാണ് മൈഥിലി താക്കൂറിന്റെ പിതാവ്. ഇപ്പോള് അദ്ദേഹം മകളിലൂടെ ബീഹാറിന്റെ മണ്ണിലേക്ക് മടങ്ങിയെത്തി എന്നത് കാലത്തിന്റെ കാവ്യനീതി.
തെരഞ്ഞെടുപ്പ് പ്രചാരണകാലത്ത് തന്നെ മൈഥിലി താക്കൂര് നല്കിയ ഉറപ്പായിരുന്നു.
അയോധ്യക്ഷേത്രോദ്ഘാടന വേളയില് മൈഥിലി പാടിയ ഗാനം സമൂഹമാധ്യമങ്ങളില് ഹിറ്റായിരുന്നു. തെരഞ്ഞെടുപ്പ് പ്രചാരണക്കാലത്ത് ഭോജ്പുരി ഗാനങ്ങളിലുൂടെ സ്ത്രീഹൃദയം കവരുകയായിരുന്നു മൈഥിലി താക്കൂര് എന്ന ഗായിക. ഇവരുടെ രാഷ്ട്രീയത്തിന്റെ പരിചയക്കുറവിനെ പരിഹസിച്ച് കോണ്ഗ്രസ് , ആര്ജെഡി, എന്ജിഒ പിആര് ഏജന്സികള് പല വീഡിയോകളും പ്രചരിപ്പിക്കാന് ശ്രമിച്ചിരുന്നു. എന്നാല് ജനം ഈ കുതന്ത്രങ്ങളെ തള്ളിക്കളഞ്ഞു.
