പാലക്കാട്: ലൈംഗിക ആരോപണവിധേയനായ കോണ്ഗ്രസ് എംഎല്എ രാഹുല് മാങ്കൂട്ടത്തിലിനൊപ്പം വേദി പങ്കിടില്ലെന്ന പ്രഖ്യാപനം ലംഘിച്ച് സിപിഎം മന്ത്രിമാരായ വി ശിവന് കുട്ടിയും എംബി രാജേഷും. സംസ്ഥാന സ്കൂള് ശാസ്ത്രമേളയുടെ ഔദ്യോഗിക ഉദ്ഘാടന ചടങ്ങിലാണ് മൂവരും ഒരുമിച്ച് പങ്കെടുത്തത്. അതേസമയം രാഹുല് പരിപാടിയില് പങ്കെടുത്തതില് പ്രതിഷേധിച്ച് പാലക്കാട് നഗരസഭ കൗണ്സിലറും വികസനകാര്യ സ്റ്റാന്ഡിങ് കമ്മിറ്റി ചെയര്പേഴ്സനുമായ മിനി കൃഷ്ണകുമാര് വേദിയില് നിന്ന് ഇറങ്ങിപ്പോയി.
സംസ്ഥാന സ്കൂള് ശാസ്ത്രമേളയുടെ ഔദ്യോഗിക ഉദ്ഘാടനം മന്ത്രി വി.ശിവന്കുട്ടി നിര്വഹിച്ചു. 14 ജില്ലകളില് നിന്നായി പതിനായിരത്തോളം ശാസ്ത്ര പ്രതിഭകളാണ് പങ്കെടുക്കുന്നത്.
ശാസ്ത്രം, ഗണിതം, ഐടി, പ്രവൃത്തി പരിചയം, സാമൂഹ്യശാസ്ത്രം, വൊക്കേഷണല് വിഭാഗങ്ങളിലാണ് മത്സരങ്ങള്. മാനുവല് പരിഷ്കരിച്ച ശേഷമുള്ള സമ്പൂര്ണ ശാസ്ത്രമേള ആറ് വേദികളിലായാണ് നടക്കുന്നത്.
അടുത്ത വര്ഷം മുതല് ശാസ്ത്രമേളയ്ക്ക് സ്വര്ണക്കപ്പ് ഏര്പ്പെടുത്തുമെന്ന് മന്ത്രി പറഞ്ഞു. സമ്മാനത്തുകയും വര്ധിപ്പിക്കും.
