മലപ്പുറത്തേത് മതാധിപത്യമാണെന്നും മലപ്പുറത്തെ കുറിച്ചുള്ള മുൻ പരാമർശത്തിൽ താൻ ഉറച്ചുനിൽക്കുന്നതായും ആവർത്തിച്ച് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ. മുസ്ലീങ്ങളുടെ മതപരിപാടികൾ നടക്കുന്ന സ്ഥലത്ത് ഇതര വിഭാഗങ്ങളുടെ ഒരു കടപോലും തുറക്കാൻ അനുവദിക്കില്ലെന്നും പലരും പലതും പറയാത്തത് ഭയന്നിട്ടാണെന്നും തനിക്ക് ഭയമില്ലെന്നും അദ്ദേഹം പറഞ്ഞു.
റംസാൻ കാലത്തെ ഓർമ്മിപ്പിച്ചാണ് വെള്ളാപ്പള്ളിയുടെ പ്രതികരണം. മുസ്ലീം വിഭാഗത്തിന്റെ താല്പര്യങ്ങൾക്കനുസരിച്ചേ മറ്റു മത വിഭാഗങ്ങൾക്ക് അവിടെ ജീവിക്കാനാവൂ എന്നും, ഇനിയഥവാ ആരെങ്കിലും കട തുറന്നാൽ അവരെ കൂട്ടത്തോടെ ചെന്ന് ഭീഷണിപ്പെടുത്തി കട അടപ്പിക്കുമെന്നും വെള്ളാപ്പള്ളി പറഞ്ഞു.
കോൺഗ്രസ് എന്ന പാർട്ടിയെ മുസ്ലീം ലീഗ് വിഴുങ്ങിയെന്നും കോൺഗ്രസ് പാർട്ടിയിൽ ആരെയെങ്കിലും ചേർക്കണമെങ്കിൽ പാണക്കാട്ട് പോയി അനുവാദം വാങ്ങണമെന്നും വെള്ളാപ്പള്ളി പരിഹസിച്ചു. ഒരു ദേശീയ മാധ്യമത്തോടാണ് വെള്ളാപ്പള്ളിയുടെ പ്രതികരണം.
