കോട്ടയം: കേരള സ്കൂള് കായികമേളയില് സീനിയര് ആണ്കുട്ടികളുടെ പോള്വോള്ട്ടില് പോളില്ലാത്തതിനാല് മത്സരിക്കാനാകാതെ നിറകണ്ണുകളുമായി പിന്മാറിയ ഇടുക്കി മാങ്കടവ് സ്വദേശി അലന് ഷിബോയിക്ക് പോള് സംഭാവന ചെയ്യാന് പാചക കുലപതി പഴയിടം മോഹനന് നമ്പൂതിരി.
‘അലന്റെ കണ്ണീരിന് ആര് ഉത്തരം പറയും’ എന്ന തലവാചകത്തില് ഈ 28ന് ജന്മഭൂമി പ്രസിദ്ധീകരിച്ച വാര്ത്ത ശ്രദ്ധയില്പ്പെട്ട പഴയിടം അലനു പോള് വാങ്ങിക്കൊടുക്കാന് തയാറാകുകയായിരുന്നു. കൂടാതെ സ്പോര്ട്സ് കിറ്റും നല്കും. ഇതിന് 1.25 ലക്ഷം രൂപയോളം പഴയിടം ചെലവഴിക്കും. അമേരിക്കയില് നിന്ന് ഇറക്കുമതി ചെയ്യുന്ന മികച്ച ഗുണ നിലവാരമുള്ള പോള്, ഒന്നര മാസത്തിനുള്ളില് അലനു ലഭിക്കത്തക്ക വിധമാണ് ഓര്ഡര് ചെയ്തിരിക്കുന്നത്. അവന്റെ മുന്നോട്ടുള്ള യാത്രയില് ഇത് വലിയ പ്രചോദനമാകുമെന്നും ഉത്തരവാദിത്തത്തോടെ തന്റെ മേഖലയില് തിളങ്ങാന് ഉപകരിക്കുമെന്നും അലന്റെ പരിശീലകന് അമല് ജോര്ജ് ജന്മഭൂമിയോട് പറഞ്ഞു.
എത്ര നന്ദി പറഞ്ഞാലും മതിയാകാത്ത കാര്യമാണ് പഴയിടം തിരുമേനിയും അലന്റെ വേദന കായിക പ്രേമികളിലെത്തിച്ച മാധ്യമങ്ങളും ചെയ്തതെന്ന് അലന്റെ അച്ഛന്റെ സഹോദരന് സിനോജ് പറഞ്ഞു. അടിമാലി എസ്എന്ഡിപി ഹയര് സെക്കന്ഡറി സ്കൂള് പ്ലസ് വണ് വിദ്യാര്ത്ഥിയായ അലന് ഷിബോയി 10-ാം ക്ലാസ് വരെ ഇടുക്കി മാങ്കടവ് കാര്മല് മാതാ സ്കൂളിലായിരുന്നു. മത്സരത്തില് പങ്കെടുക്കാന് അലന് ഇടുക്കിയില് നിന്ന് ഒറ്റയ്ക്കു പോരുമ്പോള് പോളായി ഉപയോഗിക്കുന്ന തന്റെ മുളന്തണ്ട് എടുത്തിരുന്നില്ല.
അലന്റെ പെര്ഫോമന്സ് കാണാന് പരിശീലകന് അമല് ജോര്ജ് എത്തിയപ്പോഴാണ് അവന് മത്സരത്തിനിറങ്ങാത്തത് ശ്രദ്ധിച്ചതും പോളില്ലെന്നറിയുന്നതും. മറ്റൊരു അത്ലറ്റിന്റെ പക്കല് നിന്ന് പോള് സംഘടിപ്പിച്ച് കോച്ച് എത്തുമ്പോഴേക്കും സമയം കഴിഞ്ഞിരുന്നു. ചെസ്റ്റ് നമ്പര് വിളിച്ചപ്പോള് നിസഹായനായി നിറമിഴികളോടെയിരിക്കുന്ന അലന്റെ ചിത്രം കായികമേള കണ്ട എല്ലാവരെയും മുറിപ്പെടുത്തുന്നതായിരുന്നു.
ഒന്നര ലക്ഷത്തോളം ചെലവിട്ട് പോള് വാങ്ങാനുള്ള വരുമാനം അച്ഛന് ഷിബോയിക്കോ അമ്മ ആശയ്ക്കോ ഇല്ലെന്ന് അലന് നന്നായറിയാം. ‘എനിക്ക് ലഭിച്ച ഈ സഹായം ഞാന് ഒരിക്കലും മറക്കില്ല. ഉത്തരവാദിത്തത്തോടെ പോള്വോള്ട്ടില് മികച്ച താരമാകാന് നന്നായി ശ്രമിക്കും’ അലന് ജന്മഭൂമിയോട് പറഞ്ഞു. ‘എന്നെ സഹായിച്ച പഴയിടം സാറിന് എന്റെ ഹൃദയം നിറഞ്ഞ നന്ദി’, അലന് പറഞ്ഞു.
അലന്… സര്ക്കാര് അനാസ്ഥയുടെ ഇര; ഈ കണ്ണീരിന് ആര് ഉത്തരം പറയും?
ജന്മഭൂമി ഓണ്ലൈന്