തിരുവനന്തപുരം: വിജയത്തിലേക്ക് കുറുക്കുവഴികളില്ല എന്ന സന്ദേശം സ്വന്തം ജീവിതത്തിലൂടെ തെളിയിച്ച വ്യക്തിത്വമാണ് കെഎസ്എഫ്ഇ സ്പെഷ്യല്‍ ഗ്രേഡ് അസിസ്റ്റന്റായ സോജ സിയ. കോട്ടയം സ്വദേശിനിയായ സോജ, കൗമാരത്തില്‍ കൈവിട്ട സ്വപ്‌നം 35-ാം വയസില്‍ തിരികെപിടിച്ച്, ഇപ്പോള്‍ 47-ാം വയസില്‍ 5370 മീറ്റര്‍ ഉയരത്തിലുള്ള ഖാര്‍ദുംഗ് ലാ ചലഞ്ച് പൂര്‍ത്തിയാക്കി ലോകത്തിലെ ഏറ്റവും കടുപ്പമേറിയ അള്‍ട്രാ മാരത്തണ്‍ വിജയിച്ച ആദ്യ മലയാളി വനിതയായി. സോജയുടെ ഖാര്‍ദുംഗ് ലാ ലക്ഷ്യം കെഎസ്എഫ്ഇ സ്പോണ്‍സര്‍ ചെയ്തതാണ്. ചലഞ്ച് വിജയകരമായി പൂര്‍ത്തിയാക്കിയ സോജയെ ധനകാര്യമന്ത്രി കെ. എന്‍. ബാലഗോപാല്‍ അഭിനന്ദിച്ചു.
സാധാരണഗതിയില്‍ തന്നെ അതിതീവ്ര കാലാവസ്ഥയാണ് ചലഞ്ച് നടക്കുന്ന പ്രദേശങ്ങളില്‍. അത്തരം ഒരു പ്രദേശത്ത് മാരത്തണ്‍ സമയബന്ധിതമായി ഓടി പൂര്‍ത്തിയാക്കുക എന്നത് കായികമായി അങ്ങേയറ്റം വെല്ലുവിളികള്‍ നിറഞ്ഞതാണ്. സോജയുടെ ശ്രമങ്ങള്‍ക്കും, പരിപൂര്‍ണ പിന്തുണ നല്‍കി
ഒപ്പം നിന്ന കെഎസ്എഫ്ഇക്കും മന്ത്രി അഭിനന്ദനങ്ങള്‍ അറിയിച്ചു. മന്ത്രിയുടെ ചേംബറില്‍ നടന്ന ചടങ്ങില്‍ സോജയെ പുരസ്‌കാരം നല്‍കി ആദരിച്ചു.
കെഎസ്എഫ്ഇ ചെയര്‍മാന്‍ കെ. വരദരാജന്‍, എംഡി ഡോ. എസ്. കെ. സനില്‍ തുടങ്ങിയവര്‍ പങ്കെടുത്തു. സോജയുടെ കായികയാത്രക്ക് കോരുത്തോട് സികെഎം സ്‌കൂളിലെ അത്‌ലറ്റിക്സ് പരിശീലനത്തിലൂടെയായിരുന്നു ആരംഭം. ദ്രോണാചാര്യ അവാര്‍ഡ് ജേതാവായ കെ.പി. തോമസ് മാഷിന്റെ ശിഷ്യയാണ് അവര്‍. എന്നാല്‍ കോളേജ് കാലത്ത് ഉണ്ടായ സൈക്കിള്‍ അപകടം ഓട്ടം താല്‍ക്കാലികമായി അവസാനിപ്പിച്ചു. വിവാഹശേഷം തിരുവനന്തപുരത്ത് താമസം മാറിയ സോജയ്‌ക്ക്, മകന്റെ സൈക്ലിങ് താല്‍പര്യം പഴയ സ്വപ്‌നങ്ങള്‍ വീണ്ടും ഉണര്‍ത്തി.
2015 മുതല്‍ കഠിനമായ പരിശീലനത്തിലൂടെ ശരീരം കായികക്ഷമതയിലേക്ക് തിരികെ കൊണ്ടുവന്നു. പിന്നീട് കെഎസ്എഫ്ഇ രവിപുരം ബ്രാഞ്ചില്‍ ജോലി ലഭിച്ചതോടെ കൊച്ചിയിലെ തെരുവുകളും മഹാരാജാസ് ഗ്രൗണ്ടും സോജയുടെ പരിശീലന മേഖലയായി. ചെറിയ ഓട്ടങ്ങളില്‍ നിന്ന് തുടങ്ങി മലനാട് അള്‍ട്രാ റണ്‍, നാവികസേന മാരത്തണ്‍, ഏഷ്യന്‍ മാസ്റ്റേഴ്സ് മീറ്റ് (മലേഷ്യ) തുടങ്ങി വിവിധ വേദികളില്‍ നേട്ടങ്ങള്‍ കരസ്ഥമാക്കി. മലേഷ്യയിലെ ഏഷ്യന്‍ മീറ്റില്‍ 1500 മീറ്ററില്‍ വെള്ളി മെഡലും നേടി. കൊവിഡ് കാലത്ത് യൂട്യൂബ് ചാനലിലൂടെ കായിക വിശേഷങ്ങള്‍ പങ്കുവെച്ച സോജ, പിന്നീട് 600 കിലോമീറ്റര്‍ സൈക്ലിങ് (തൃച്ചി – ധനുഷ്‌കോടി) പൂര്‍ത്തിയാക്കി. നിലവില്‍ കെഎസ്എഫ്ഇ പൂജപ്പുര ബ്രാഞ്ചിലെ സ്പെഷ്യല്‍ ഗ്രേഡ് അസിസ്റ്റന്റും ഐടെന്‍ റണ്ണേഴ്സ് ക്ലബ്ബിലെ അംഗവുമാണ്. ഖാര്‍ദുംഗ് ലാ ചലഞ്ച് (72 കി.മീ., 5370 മീറ്റര്‍ ഉയരം) 14 മണിക്കൂര്‍ സമയപരിധിക്കുള്ളില്‍ പൂര്‍ത്തിയാക്കി സോജ സിയ ഈ നേട്ടം കൈവരിക്കുന്ന ആദ്യ മലയാളി വനിതയായി.
പരേതയായ ഹസീനയും സിയാവുദ്ദീനുമാണ് സോജയുടെ മാതാപിതാക്കള്‍. ഭര്‍ത്താവ് ഷാംനാദ്, മകന്‍ അസീം ഷാ എന്നിവര്‍ പൂര്‍ണ പിന്തുണ നല്‍കി.
