ചെന്നൈ: ടിവികെ നേതാവും നടനുമായ വിജയ് ഒരു ശവവണ്ടി ഓടിക്കുന്ന ചിത്രം പങ്കുവെച്ച് ഡിഎംകെ നേതാവ് അമുതരശന്. തിരഞ്ഞെടുപ്പ് ചിഹ്നം തേടുന്ന ടിവികെയ്ക്ക് ‘അമരര് ഊര്ത്തി’ (ശവവണ്ടി) ആയിരിക്കും ശരിയായ ചോയ്സ് എന്ന് അമുതരശന് തന്റെ ട്വീറ്റില് പരിഹസിച്ചു. കരൂര് ദുരന്തത്തില് മരിച്ചവരുടെ ബന്ധുക്കള്ക്ക് എല്ലാ പിന്തുണയും പ്രഖ്യാപിക്കുകയും അവരെ മഹാബലിപുരത്തെത്തിച്ച് നേരില് കാണുകയും ആശ്വസിപ്പിക്കുകയും ചെയ്ത വിജയ് യുടെ നടപടിയാണ് സംസ്ഥാനത്തെ ഭരണകക്ഷിയായ ഡിഎംകെയുടെ നേതാവിനെ ഇത്തരമൊരു ട്വീറ്റിന് പ്രേരിപ്പിച്ചത്. എന്നാല് അമുതരശന്റെ ട്വീറ്റ് ക്രൂരമായിപ്പോയെന്നും ദുരന്തത്തില് മരിച്ചവരോടുള്ള അപമാനമായെന്നും ഡിഎംകെയില് നിന്നുതന്നെ വിമര്ശനമുയര്ന്നു. രാഷ്ട്രീയ മാന്യതയില്ലാത്ത കക്ഷിയെന്ന നിലയ്ക്ക് ഡിഎംകെയില് നിന്ന് ഇതിനപ്പുറം പ്രതീക്ഷിക്കുന്നില്ലെന്നാണ് ഒരു ടിവികെ നേതാവ് പ്രതികരിച്ചത്.
















