തിരുവനന്തപുരം: നവംബര് ഒന്നിന് സംസ്ഥാന സര്ക്കാര് സംഘടിപ്പിച്ചിരിക്കുന്ന അതിദരിദ്ര്യ വിമുക്ത പ്രഖ്യാപന പരിപാടിയില് പങ്കെടുക്കരുതെന്ന് അഭ്യര്ത്ഥിച്ച് മോഹന്ലാലിനും മമ്മൂട്ടിക്കും കമല്ഹാസനും സെക്രട്ടേറിയറ്റിനു മുന്നില് സമരം ചെയ്യുന്ന ആശാപ്രവര്ത്തകര് കത്തയച്ചു. അതിദരിദ്ര വിമുക്ത പ്രഖ്യാപനം വലിയ നുണയാണെന്നും കത്തില് പറയുന്നു.
ഞങ്ങള് നെഞ്ചില് കൈവച്ച് പറയുകയാണ്. ഞങ്ങളുടെ തുച്ഛവേതനം വര്ദ്ധിപ്പിക്കാതെ അതിദരിദ്ര വിമുക്ത പ്രഖ്യാപനം എന്നത് ഒരു വലിയ നുണയാണ്. പരിപാടയില് പങ്കെടുക്കരുത്… ഇടത് സര്ക്കാരിന്റെ കാപട്യമാണ് ഈ പരിപാടി. ഇതില് പങ്കെടുക്കുക വഴി ആ വലിയ നുണയുടെ പ്രചാരകരായി താരങ്ങളും മാറും എന്നതിനാല് വിട്ടുനില്ക്കണം.
ദിവസ വേതനം 233 രൂപയെന്ന തുച്ഛമായ തുക മാത്രമാണ് തങ്ങള്ക്ക് ലഭിക്കുന്നത്. ജോലി ചെയ്യാന് ഏറ്റവും കുറഞ്ഞത് 100 രൂപയെങ്കിലും ദിവസേന ചെലവഴിക്കേണ്ടി വരുന്ന തങ്ങളുടെ കൈവശം അവശേഷിക്കുന്ന തുക കൊണ്ട് എങ്ങിനെയാണ് കുടുംബം പുലര്ത്തുക? നിത്യച്ചെലവുകള്ക്കായിപോലും കടം വാങ്ങേണ്ടി വരുന്നു. കടഭാരമേറി ജീവിതംതന്നെ അവസാനിപ്പിക്കേണ്ട സ്ഥിതിയിലാണ് ഏറെപ്പേരും. പലര്ക്കും കിടപ്പാടമില്ല. ഭര്ത്താവും മാതാപിതാക്കളും മാറാരോഗികളായവരുമുണ്ട്. ജീവിത ദുരിതങ്ങള് ശ്വാസംമുട്ടിക്കുന്ന ഘട്ടത്തിലാണ് ഞങ്ങള് സെക്രട്ടേറിയറ്റ് നടയില് രാപകല് സമരവുമായി എത്തിയതെന്നും കത്തില് പറയുന്നു.
പ്രാഥമിക ആവശ്യങ്ങള്ക്ക് പോലും സൗകര്യമില്ലാതെ സ്ത്രീകള് തെരുവില് കഴിയുക എന്നത് ഒരു ദിവസത്തേക്കുപോലും ചിന്തിക്കാന് സാധിക്കില്ല. കോരിച്ചൊഴിയുന്ന മഴയില് ഒരു ടാര്പാളിന് ഷീറ്റ് പോലും തലയ്ക്കു മുകളില് പിടിക്കുന്നത് സര്ക്കാര് വിലക്കി.
മൂന്ന് നേരം ഭക്ഷണം കഴിക്കാനില്ലാത്ത, മക്കളെ പഠിപ്പിക്കാന് കഴിയാത്ത, മാരക രോഗം വന്നാല് അതിജീവിക്കാന് കെല്പ്പില്ലാത്ത, കടക്കെണിയില് കുടുങ്ങിയ അതിദരിദ്രരാണ് ഞങ്ങള് ആശമാര്. 233 രൂപ ദിവസവേതനം വാങ്ങുന്ന ഞങ്ങള്, 26,125 ആശമാര് കൂടിയുള്ള ഈ കേരളം അതിദരിദ്ര്യ മുക്തമല്ല, കത്തില് പറയുന്നു.
സര്ക്കാരിന്റെ ആ വലിയ നുണയുടെ പ്രചാരകരാകാതെ പരിപാടിയില് നിന്ന് വിട്ടുനില്ക്കണം എന്നാണ് നടന്മാരോടുള്ള ആശമാരുടെ അഭ്യര്ത്ഥന. ഒപ്പം സെക്രട്ടറിയേറ്റ് പടിക്കല് വന്ന് തങ്ങളെ കാണണം എന്നും ആശമാര് ഉള്ളുലഞ്ഞെഴുതുന്ന തുറന്ന കത്തില് ആവശ്യപ്പെടുന്നു.
