കോട്ടയം: രാഷ്ട്രപതിയുടെ കേരള സന്ദര്‍ശനത്തോടനുബന്ധിച്ച്
23ന് ഉച്ചയ്‌ക്ക് 1 മണി മുതല്‍ രാത്രി 7 മണി വരെയും, 24 ന് രാവിലെ 6 മണി മുതല്‍ 11 വരെയും കോട്ടയം ടൗണ്‍ വഴി പോകേണ്ട വാഹനങ്ങള്‍ക്ക് ഗതാഗത നിയന്ത്രണം ഏര്‍പ്പെടുത്തി. മാത്രമല്ല, 23 ന് ഉച്ചയ്‌ക്ക് 12 മണി മുതല്‍ രാത്രി7 മണി വരെയും 24 ന് വെളുപ്പിന് 12.30 മുതല്‍ ഉച്ചയ്‌ക്ക് 12 വരെയും റോഡ് അരികുകളിലും ജംഗ്ഷനുകളിലും പാര്‍ക്കിംങ്ങും, തട്ടുകട ഉള്‍പ്പടെയുള്ള വഴിയോര വാണിഭങ്ങളും, ഓട്ടോ, ടാക്‌സി സ്റ്റാന്‍ഡുകളിലെ പാര്‍ക്കിംഗും നിരോധിച്ചിട്ടുണ്ട്.
വാഹന നിയന്ത്രണം ഇപ്രകാരമാണ്: മൂവാറ്റുപുഴ, കടുത്തുരുത്തി ഭാഗങ്ങളില്‍ നിന്നും വരുന്ന ചങ്ങനാശ്ശേരി ഭാഗത്തേക്ക് പോകേണ്ട വാഹനങ്ങള്‍ പട്ടിത്താനം ജംക്ഷനില്‍ നിന്നും തിരിഞ്ഞ് ഏറ്റുമാനൂര്‍-മണര്‍കാട് ബൈപ്പാസ്, പുതുപ്പള്ളി വഴി പോകണം.
ചങ്ങനാശ്ശേരി ഭാഗത്തുനിന്നും ഏറ്റുമാനൂര്‍ ഭാഗത്തേക്ക് പോകേണ്ട വാഹനങ്ങള്‍ ചങ്ങനാശ്ശേരി ടൗണില്‍നിന്നും കുരിശുംമൂട്, തെങ്ങണ, ഞാലിയാകുഴി, പുതുപ്പള്ളി, മണര്‍കാട്-ഏറ്റുമാനൂര്‍ ബൈപ്പാസ് വഴി പോകണം.
മെഡിക്കല്‍ കോളേജ് ഭാഗത്തുനിന്നും കോട്ടയം ടൗണിലേക്ക് പോകേണ്ട പ്രൈവറ്റ് ബസുകള്‍ വട്ടമൂട് പാലം കയറി തിരുവഞ്ചൂര്‍ വഴി പോകണം. തിരുവഞ്ചൂര്‍ മുതല്‍ വട്ടമൂട് വരെയുള്ള ഭാഗംവണ്‍വേ ആയിരിക്കും.
ചിങ്ങവനം ഭാഗത്തുനിന്നും കോട്ടയം ടൗണിലേക്ക് പോകേണ്ട വാഹനങ്ങള്‍ മാവിളങ്ങ് ജംക്ഷനില്‍ നിന്നും തിരിഞ്ഞ് പാക്കില്‍, പൂവന്‍തുരുത്ത്, കടുവാക്കുളം, നാല്‍ക്കവല വഴി പുതുപ്പള്ളിയെത്തി പോകണം.
ചങ്ങനാശ്ശേരി ഭാഗത്തുനിന്നും കോട്ടയത്തേക്ക് വരുന്ന കെഎസ്ആര്‍ടിസി ബസുകള്‍ പുളിമൂട് ജംക്ഷനില്‍നിന്നും തിരിഞ്ഞ് സ്റ്റാന്റിലേക്ക് പോകണം.
പൊന്‍കുന്നം, കാഞ്ഞിരപ്പള്ളി, മുണ്ടക്കയം ഭാഗങ്ങളിലേക്ക് പോകേണ്ട കെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംക്ഷനിലെത്തി അവിടെനിന്നും കെ.കെറോഡ്, കളക്ടറേറ്റ് ജംഗ്ഷന്‍, കഞ്ഞിക്കുഴി, മണര്‍കാട് വഴി പോകണം.
എറണാകുളം, തൃശൂര്‍ ഭാഗങ്ങളിലേക്ക് പോകേണ്ടകെഎസ്ആര്‍ടിസി ബസുകള്‍ ഐഡ ജംഗ്ഷന്‍, പുളിമൂട് ജംഗ്ഷന്‍ വഴി ശീമാട്ടി റൗണ്ട് ചുറ്റി സെന്‍ട്രല്‍ ജംക്ഷനിലെത്തി അവിടെനിന്നും കെ.കെറോഡ്, കളക്ടറേറ്റ് ജംഗ്ഷന്‍, കഞ്ഞിക്കുഴി, മണര്‍കാട്, ഏറ്റുമാനൂര്‍ വഴി പോകണം.
ആലപ്പുഴ, ചേര്‍ത്തല ഭാഗങ്ങളില്‍നിന്നും കോട്ടയം ടൗണിലേക്ക് പോകേണ്ട വാഹനങ്ങള്‍ ബണ്ട് റോഡില്‍നിന്നും തിരിഞ്ഞ് ഇടയാഴം, കല്ലറ, നീണ്ടൂര്‍ വഴി പോകണം.
ചേര്‍ത്തല ഭാഗത്തുനിന്നും കുമരകത്തേക്ക് വരുന്ന ബസുകള്‍ മണിയാപറമ്പ് റോഡ് ജംക്ഷനില്‍ സര്‍വീസ് നിര്‍ത്തി തിരികെപോകണം.
വൈക്കം-കുമരകം റോഡെ വരുന്ന കോട്ടയം ഭാഗത്തേക്ക് പോകേണ്ട വാഹനങ്ങള്‍ ഇടയാഴം ജംക്ഷനില്‍നിന്നും തിരിഞ്ഞ് കല്ലറ, നീണ്ടൂര്‍ വഴി പോകണം.
മെഡിക്കല്‍ കോളേജ് ഭാഗത്തുനിന്നും എറണാകുളം, മൂവാറ്റുപുഴ ഭാഗങ്ങളിലേക്ക് പോകേണ്ട വാഹനങ്ങള്‍ മെഡിക്കല്‍ കോളേജ് കുരിശുപള്ളി ജംക്ഷനില്‍നിന്നും അമ്മഞ്ചേരി, യൂണിവേഴ്‌സിറ്റി, അതിരമ്പുഴ വഴി അതിരമ്പുഴ ഉപ്പുപുര ജംക്ഷനിലെത്തി ഇടത്തേക്ക് തിരിഞ്ഞ് കോട്ടമുറി, ആനമല വഴി കാണക്കാരി അമ്പലം ജംക്ഷനിലെത്തി പോകണം.
കല്ലറ, നീണ്ടൂര്‍ ഭാഗങ്ങളില്‍നിന്നും പനമ്പാലം വഴി കോട്ടയം ടൗണിലേക്ക് പോകേണ്ട വാഹനങ്ങള്‍ കുടമാളൂര്‍ കുരിശുപള്ളി ജംക്ഷനില്‍നിന്നും തിരിഞ്ഞ് പുളിഞ്ചുവട്, കുമാരനല്ലൂര്‍ മേല്‍പ്പാലം വഴി പോകണം.
ചിങ്ങവനം ഭാഗത്തുനിന്നും കോട്ടയം ടൗണിലേക്ക് വരുന്ന പ്രൈവറ്റ് ബസുകള്‍ കോടിമത സ്റ്റാന്റില്‍ സര്‍വീസ് അവസാനിപ്പിച്ച് തിരികെ പോകണം.
ദിവാന്‍ കവലയില്‍ നിന്നും കഞ്ഞിക്കുഴി ഭാഗത്തേക്ക് വാഹനങ്ങള്‍ പോകുവാന്‍ പാടില്ല.
