രാജാക്കാട്: പഠനത്തോടൊപ്പം ഹരിത ഭംഗിയിലും പൂകൃഷിയിലും ആനന്ദം കണ്ടെത്തുന്ന വിദ്യാര്ത്ഥികളും അധ്യാപകരും നാടിനാകെ മാതൃകയാകുകയാണ് രാജാക്കാട് പഴയ വിടുതിയിലെ ഗവ. യുപി സ്കൂള്. ഹരിത കേരളത്തിന്റെ നിരവധി അവാര്ഡുകളും ഈ സരസ്വതീ കേന്ദ്രത്തെ തേടി എത്തിയിട്ടുണ്ട്. അവര് അവരുടെ ആഗ്രഹവും ഇഛാശക്തിയും പ്രവൃത്തിയില് നടപ്പിലാക്കുകയാണ് പൂകൃഷിയിലൂടെ ചെയ്യുന്നത്.
വിദ്യാലയ വളപ്പില് സ്ഥിരമായി വിഷരഹിതമായ പച്ചക്കറികള് കൃഷി ചെയ്തു വരുന്നതും ശ്രദ്ധേയമാണ്. സ്കൂളിലെ ഉച്ച ഭക്ഷണത്തിന് ഇതേ പച്ചക്കറികള് തന്നെയാണ് ഉപയോഗപ്പെടുത്തുന്നതും. അതിന് പുറമെയാണ് ആണ്കുട്ടികളും പെണ്കുട്ടികളും ഒത്തൊരുമയോടെ പൂക്കളേയും പരിപാലിക്കുന്നത്. സ്കൂള് പരിസരത്ത് ചെണ്ടുമല്ലി കൃഷി ചെയ്ത് പൂക്കളുടെ ഉദ്യാനം തീര്ക്കുന്നതും ഇവരുടെ ടൈം ടേബിളില് ഉള്പ്പെട്ടതാണ്.
മുകളില് നീലാകാശമാണെങ്കില് താഴെ ഞങ്ങളുടെ സ്കൂള് വളപ്പില് മഞ്ഞപ്പട്ടു വിരിക്കാന് പൂ കൃഷിയിലൂടെ ശ്രമിക്കുകയാണെന്ന് കുട്ടികളും അധ്യാപകരും പറയുന്നു. പഠനത്തോടൊപ്പം മനസിന് കുളിര്മ്മയേകാന് ഇത് വളരെ സഹായമാണെന്ന് ഇവര് വിശ്വസിക്കുന്നു. മേഖലയിലെ പ്രധാന വിനോദ സഞ്ചാര കേന്ദ്രങ്ങളിലെത്തുന്ന സഞ്ചാരികള് സ്കൂള് വളപ്പിലെത്തി വീഡിയോയും സെല്ഫിയും എടുക്കുന്നതും പതിവായിട്ടുണ്ട്. കുട്ടികളുടെ ഇതു പോലുള്ള പ്രവര്ത്തനങ്ങള്ക്ക് ഹെഡ് മാസ്റ്റര് ആസാദ് സാറും, അധ്യാപകനായ ജോഷി സാറും നേതൃത്വം കൊടുക്കുമ്പോള് മറ്റധ്യാപകരും പിടിഎയും പൂര്ണ്ണ പിന്തുണയുമായി കൂടെയുണ്ട്.
ഈ വിദ്യാലയത്തിലെ പ്രവര്ത്തനം മറ്റുള്ള വിദ്യാലയങ്ങള്ക്കും മാതൃകയാക്കാവുന്നതാണ്.
