പന്തളം: ശബരിമല- മാളികപ്പുറം ക്ഷേത്രത്തിലെ മേല്ശാന്തിമാരെ ഇത്തവണ നറുക്കെടുക്കുക പന്തളം കൊട്ടാരത്തിലെ കശ്യപ് വര്മയും മൈഥിലി കെ. വര്മ്മയും. പന്തളം കൊട്ടാരം വലിയ തമ്പുരാന് തിരുവോണം നാള് രാമവര്മ്മ രാജ ആണ് ഇരുവരുടേയും പേരുകള്ക്ക് അംഗീകാരം നല്കിയത്. 2011ലെ സുപ്രീംകോടതി ഉത്തരവ് പ്രകാരമാണ് കുട്ടികളെ മേല്ശാന്തി നറുക്കെടുപ്പിനായി പന്തളം കൊട്ടാരം വലിയ തമ്പുരാന് നിയോഗിക്കുന്നത്.
ശബരിമല മേല്ശാന്തിയെ നറുക്കെടുക്കുന്ന കശ്യപ് വര്മ്മ പന്തളം നടുവിലെ മാളിക കൊട്ടാരത്തില് മുന് രാജപ്രതിനിധി പ്രദീപ് കുമാര് വര്മ്മയുടെ മകള് പൂജ വര്മ്മ (കൃഷ്ണവിലാസം കൊട്ടാരം, മാവേലിക്കര വലിയ കൊട്ടാരം) – ശൈലേന്ദ്ര വര്മ്മ (പാലിയക്കര കൊട്ടാരം, തിരുവല്ല) ദമ്പതികളുടെ മകനാണ്. നെതര്ലന്ഡ്സിലെ അല്മേര് ഡിജിറ്റാലിസ് പ്രൈമറി സ്കൂള് അഞ്ചാം ക്ലാസ് വിദ്യാര്ത്ഥി ആണ്. സഹോദരി ചിന്മയി വര്മ്മ.
മാളികപ്പുറം മേല്ശാന്തിയെ നറുക്കെടുക്കുന്ന മൈഥിലി കെ. വര്മ്മ പന്തളം മുണ്ടയ്ക്കല് കൊട്ടാരത്തിലെ മുന് രാജപ്രതിനിധി രാഘവവര്മ്മയുടെ മകള് ശ്രുതി ആര്. വര്മ്മ – കേരള വര്മ്മ സി.കെ. (ചാഴൂര് കോവിലകം) ദമ്പതികളുടെ മകളാണ്. ബെംഗളൂരു സംഹിത അക്കാദമി സ്കൂളില് നാലാം ക്ലാസ് വിദ്യര്ത്ഥിനിയാണ് മൈഥിലി. സഹോദരന് മാധവ് കെ. വര്മ്മ.
പന്തളം കൊട്ടാരം വലിയ തമ്പുരാന്റെയും വലിയ തമ്പുരാട്ടിയുടെയും അനുഗ്രഹം വാങ്ങി ഒക്ടോ. 17ന് ഉച്ചക്ക് തിരുവാഭരണ മാളികയുടെ മുന്പില് വെച്ച് കെട്ടുനിറച്ച് വലിയ കോയിക്കല് ക്ഷേത്രത്തില് ദര്ശനത്തിനു ശേഷം സംഘം പ്രതിനിധികളുടെയും രക്ഷിതാക്കളുടെയും ഒപ്പം സന്നിധാനത്തേക്ക് തിരിക്കുമെന്ന് സെക്രട്ടറി എം.ആര്. സുരേഷ് വര്മ്മ അറിയിച്ചു.
