ആലപ്പുഴ: പൗരത്വഭേദഗതി നിയമം, വഖഫ് ബില് തുടങ്ങിയവയുടെ പേരില് നാട്ടില് കലാപത്തിന് ശ്രമിച്ച നിരോധിത മുസ്ലീം മതഭീകരവാദ സംഘടനായ പോപ്പുലര്ഫ്രണ്ട്, പലസ്തീന് ഐക്യദാര്ഢ്യത്തിന്റെ മറവില് മതവികാരം ആളിക്കത്തിക്കാന് ശ്രമിക്കുന്നു. അടുത്ത് വരുന്ന തെരഞ്ഞെടുപ്പുകളിലെ നേട്ടത്തിനായി സിപിഎമ്മും, കോണ്ഗ്രസും അടക്കമുള്ള പാര്ട്ടികള് ഇതിന് ഒത്താശ ചെയ്യുന്നു.
മുസ്ലീം കോര്ഡിനേഷന് കമ്മറ്റി, മഹല്ല കോര്ഡിനേഷന് കമ്മറ്റി തുടങ്ങി വ്യത്യസ്ത പേരുകളില് സംഘടിപ്പിക്കുന്ന പലസ്തീന് ഐക്യദാര്ഢ്യ പരിപാടികളില് മുന്നിരയില് മുഖ്യധാരാ മുസ്ലീം സംഘടനകളാണെങ്കിലും നിയന്ത്രണം നിരോധിത പിഎഫ്ഐ പ്രവര്ത്തകര്ക്കും, എസ്ഡിപിഐക്കാര്ക്കുമാണ്.
ഇത്തരം യോഗങ്ങളിലും, ജാഥകളിലും ഉയരുന്ന മുദ്രാവാക്യങ്ങള് പലപ്പോഴും ഭാരത വിരുദ്ധവും കേന്ദ്ര സര്ക്കാര് വിരുദ്ധവുമാണ്. മതത്തിന്റെ പേരില് സംഘടിപ്പിക്കുന്ന പരിപാടികള് വളരെ ആസൂത്രിതമായി ബിജെപിക്കും, കേന്ദ്രസര്ക്കാരിനും എതിരായി ഇത്തരം സംഘടനകള് വഴിതിരിച്ചുവിടുകയാണ്. ആലപ്പുഴ ജില്ലയിലടക്കം സംഘടിപ്പിച്ച പരിപാടികളുടെ പൊതുസവിശേഷത ബിജെപി, സംഘപരിവാര് വിരുദ്ധതയാണ്. ഇത്തരം സമീപനങ്ങള് ആളിക്കത്തിക്കുന്ന സമീപനമാണ് പരിപാടികളില് പിന്തുണയുമായെത്തുന്ന കോണ്ഗ്രസ്, സിപിഎം നേതാക്കള് സ്വീകരിക്കുന്നത്.
ആലപ്പുഴയില് കോണ്ഗ്രസ് നേതാവ് കെ.സി. വേണുഗോപാലും, സിപിഎം എംഎല്എമാരും കേന്ദ്രസര്ക്കാരിനും ബിജെപിക്കും എതിരെ കുപ്രചാരണം അഴിച്ചുവിട്ട് മുസ്ലീം മതവികാരം ആളിക്കത്തിക്കുന്ന പ്രസംഗങ്ങളാണ് നടത്തിയത്. കൊച്ചുകുട്ടികളെ വരെ പങ്കെടുപ്പിച്ചായിരുന്നു പ്രകടനങ്ങള്. മുന്പ് കൊച്ചുകുട്ടിയെ കൊണ്ട് ഹിന്ദുക്കള്ക്കും, ക്രൈസ്തവര്ക്കും എതിരെ കൊലവിളി മുദ്രാവാക്യം വിളിപ്പിച്ചതും ആലപ്പുഴയിലായിരുന്നു. കൊച്ചുകുട്ടികളെയും സ്ത്രീകളെയും വ്യാപകമായി രംഗത്തിറക്കി അതിവൈകാരികത സൃഷ്ടിച്ച് മതവികാരം ആളിക്കത്തിക്കാന് ചില സംഘടനകള് ബോധപൂര്വം ശ്രമിക്കുമ്പോള് ഇതിന് മുഖ്യധാരാ സംഘടനകള് ഒത്താശ ചെയ്യുകയാണെന്നാണ് വിമര്ശനം.
ഇത്തരം പ്രവര്ത്തികളുടെ തുടര്ച്ചയായി പിഎഫ്ഐയുടെയും, എസ്ഡിപിഐയുടെ ശക്തി കേന്ദ്രങ്ങളില് പലസ്തീന് പതാകകള് വ്യാപകമായി ഉയര്ത്തി പ്രകോപനം സൃഷ്ടിക്കുന്നു. ആലപ്പുഴ നഗരത്തില് എന്ഐഎ ഇടപെട്ട് അടച്ചുപൂട്ടിയ പിഎഫ്ഐ ജില്ലാ ഓഫീസ് പ്രവര്ത്തിച്ചിരുന്ന കെട്ടിടത്തിന് സമീപമുള്ള കെട്ടിടങ്ങളിലും റോഡികളിലും വ്യാപകമായി പലസ്തീന് പതാക ഉയര്ന്നിട്ടുണ്ട്.
ജില്ലയുടെ തെക്കന് പ്രദേശങ്ങളായ ആദിക്കാട്ടുകുളങ്ങര, നൂറനാട്, ചാരുംമൂട്, അമ്പലപ്പുഴയിലെ കാക്കാഴത്തും, കുറവന്തോടും പലസ്തീന് പതാകകള് ഉയര്ത്തി. കാക്കാഴം പുതുക്കുളങ്ങര ക്ഷേത്രത്തിന് സമീപത്തെ മരത്തിലും കുറവന്തോട് ജങ്ഷന് പടിഞ്ഞാറുമാണ് പലസ്തീന്റെ പതാകകള് ഉയര്ത്തിയത്. മത തീവ്രവാദ സംഘടനകള്ക്ക് സ്വാധീനമുള്ള മേഖലകള് കേന്ദ്രീകരിച്ച് രാജ്യവിരുദ്ധ പ്രവര്ത്തനങ്ങള് നടക്കുന്നതായി ആരോപണം ഉയര്ന്നിരുന്നു. ഇതിനു പിന്നാലെയാണ് വിവിധ സ്ഥലങ്ങളില് പലസ്തീന്റെ പതാകകള് ഉയര്ത്തി തുടങ്ങിയത്.
അതിനിടെ ആസൂത്രിതമായി നിരോധിത മതഭീകരവാദ സംഘടനയായ പിഎഫ്ഐയുടെയും എസ്ഡിപിഐയുടെയും നേതാക്കളും പ്രവര്ത്തകരും വിവിധ മഹല്ലുകമ്മറ്റികള് പിടിച്ചടക്കാന് ശ്രമിക്കുന്നതും പലയിടത്തും സംഘര്ഷത്തിനിടയാക്കുന്നു. ഇവരുടെ നീക്കങ്ങളെ എതിര്ക്കുന്നവരെ ഭീഷണിപ്പെടുത്തുകയും കായികമായി നേരിടുകയും ചെയ്യുന്നതായും പരാതികള് ഉയരുന്നു.
