തിരുവനന്തപുരം: ഹൈക്കോടതി വിധിയുടെ പശ്ചാത്തലത്തില് മുനമ്പം ജനതയുടെ റവന്യൂ അധികാരങ്ങള് എത്രയും വേഗം പുന:സ്ഥാപിക്കാന് സംസ്ഥാന സര്ക്കാര് തയ്യാറാവണമെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് ആവശ്യപ്പെട്ടു. ഹൈക്കോടതി വിധി സംസ്ഥാന സര്ക്കാരിനും വഖഫ് ബോര്ഡിനും വലിയ തിരിച്ചടിയാണ്. 1950 ല് ഫാറൂഖ് കോളജിന് ഇഷ്ടദാനമായി ലഭിച്ച വസ്തുവിനെ വഖഫ് ആയി കാണാനാവില്ല എന്ന് വിധിയിലൂടെ ഹൈക്കോടതി വ്യക്തമാക്കിയിരിക്കുകയാണ്. മുനമ്പം ജനതയുടെ വിഷയത്തില് തുടക്കം മുതല് ബിജെപി സ്വീകരിച്ചിരിക്കുന്ന നിലപാട് ഇതാണ്. മുനമ്പത്ത് വഖഫ് ബോര്ഡിന് അവകാശമൊന്നുമില്ലെന്ന് കോടതി തീര്പ്പുകല്പ്പിച്ച സാഹചര്യത്തില് ജസ്റ്റിസ് സി.എന്. രാമചന്ദ്രന് കമ്മീഷനും ഇനി പ്രസക്തിയില്ല. 69 വര്ഷങ്ങള്ക്ക് മുമ്പ് മുനമ്പത്തുകാര്ക്ക് ലഭിച്ച ഭൂമി വഖഫ് ബോര്ഡ് അവകാശവാദം ഉന്നയിച്ച ഉടന് വിട്ടു നല്കിയ സര്ക്കാര് നടപടി ന്യായീകരണമില്ലാത്തതാണ്.
പാവപ്പെട്ട മുനമ്പം ജനതയുടെ പ്രശ്നങ്ങള്ക്ക് പരിഹാരമായി അവരുടെ ഭൂമിയുടെ മേലുള്ള റവന്യൂ അധികാരങ്ങള് തിരിച്ചുകൊടുക്കാന് മുഖ്യമന്ത്രി പിണറായി വിജയന് ഇനിയെങ്കിലും തയ്യാറാവണമെന്നും രാജീവ് ചന്ദ്രശേഖര് പറഞ്ഞു.
ശബരിമല പോലൊരു പുണ്യഭൂമിയില് പോലും കൊള്ള നടത്തുന്ന രാഷ്ട്രീയം കേരളത്തില് ഇതാദ്യമാണെന്ന് എന്ഡിഎ യോഗത്തില് സംസാരിക്കവേ അദ്ദേഹം പറഞ്ഞു. അഴിമതി, കൊള്ള, പ്രീണനം എന്നിവ മാത്രമാണ് കേരളത്തില് നടക്കുന്നത്. വര്ഷങ്ങളായുള്ള എല്ഡിഎഫ് – യുഡിഎഫ് ഭരണത്തിന്റെ ഫലമായി രാജ്യത്ത് ഏറ്റവും കൂടുതല് വിലക്കയറ്റമുള്ള സംസ്ഥാനമായി കേരളം മാറിയിരിക്കുന്നു. രാജ്യത്ത് ഏറ്റവും ഉയര്ന്ന തൊഴിലില്ലായ്മയും കേരളത്തിലാണ്. ഇത് സംസ്ഥാനത്തെ യുവാക്കളുടെ ഭാവി ആശങ്കയിലാക്കിയിരിക്കുന്നു.
കേരളത്തിലെ ജനങ്ങള്ക്ക് മതിയായിരിക്കുന്നു. നിലവിലെ രാഷ്ട്രീയ സംസ്കാരത്തില് ഒരു മാറ്റമാണ് അവര് ആവശ്യപ്പെടുന്നത്. വാഗ്ദാനങ്ങള്ക്കും മുദ്രാവാക്യങ്ങള്ക്കുമപ്പുറം വാക്കു പാലിക്കുന്നൊരു മുന്നണിയെയാണ് അവര്ക്കാവശ്യമെന്നും ബിജെപി സംസ്ഥാന അധ്യക്ഷന് പറഞ്ഞു.
