തിരുവനന്തപുരം: പേരാമ്പ്രയില്‍ പൊലീസ് ലാത്തിച്ചാര്‍ജില്‍ ഷാഫി പറമ്പില്‍ എംപിക്ക് പരിക്കേറ്റതില്‍ പ്രതിഷേധം ശക്തമാക്കി കോണ്‍ഗ്രസ്.സംസ്ഥാന വ്യാപകമായി രാത്രിയും പ്രതിഷേധങ്ങള്‍ നടക്കുകയാണ്.
തിരുവനന്തപുരത്ത് സെക്രട്ടേറിയറ്റിലേക്ക് യൂത്ത് കോണ്‍ഗ്രസ് രാത്രി നടത്തിയ പ്രകടനത്തില്‍ സംഘര്‍ഷമുണ്ടായി. പൊലീസ് ലാത്തി വീശി.ആലപ്പുഴയില്‍ പ്രവര്‍ത്തകര്‍ ദേശീയ പാത ഉപരോധിച്ചു.
കോഴിക്കോടും വയനാട്ടിലും കോണ്‍ഗ്രസ് പ്രതിഷേധ പ്രകടനങ്ങള്‍ നടന്നു കണ്ണൂര്‍ നഗരത്തിലും തലശേരിയിലും യൂത്ത് കോണ്‍ഗ്രസ് പ്രകടനം നടത്തി. നാദാപുരം ടൗണില്‍ സംസ്ഥാന പാത ഉപരോധിച്ചു.പാലക്കാട്ടും യൂത്ത് കോണ്‍ഗ്രസ് പ്രതിഷേധം സംഘടിപ്പിച്ചു. കൊച്ചിയില്‍ രണ്ടിടങ്ങളിലാണ് പ്രതിഷേധം നടന്നത്.
തൃശൂരില്‍ സ്വരാജ് റൗണ്ടിലേക്ക് പ്രതിഷേധവുമായി എത്തിയ പ്രവര്‍ത്തകര്‍ സിപിഎം പോസ്റ്ററുകള്‍ കീറാന്‍ ശ്രമിച്ചതോടെ പൊലീസുമായി സംഘര്‍ഷമുണ്ടായി. കൊല്ലം ചവറയില്‍ യൂത്ത് കോണ്‍ഗ്രസ് ബ്ലോക്ക് കമ്മിറ്റി ചവറ പോലീസ് സ്റ്റേഷന് മുന്നില്‍ പ്രതിഷേധം സംഘടിപ്പിച്ചു.
ശനിയാഴ്ച ബ്ലോക് തലങ്ങളില്‍ പ്രതിഷേധം സംഘടിപ്പിക്കാനാണ് കോണ്‍ഗ്രസ് തീരുമാനം.
ഷാഫി പറമ്പിലിന് മൂക്കിന്റെ എല്ലിന് പൊട്ടലുണ്ടെന്ന് കോഴിക്കോട് ഡി സി സി പ്രസിഡന്റ് പറഞ്ഞു. അഞ്ച് ദിവസത്തെ വിശ്രമം ഡോക്ടര്‍മാര്‍ നിര്‍ദ്ദേശിച്ചു.
