ഇസ്ലാമബാദ് :വാളെടുത്തവന് വാളാല് എന്ന് പറഞ്ഞതുപോലെയായി പാകിസ്ഥാന്റെ കാര്യം. താലിബാന് മന്ത്രിയുടെ ഇന്ത്യാ സന്ദര്ശന വേളയില് ഭീകരവാദത്തിന്റെ പേരില് അഫ്ഗാനിസ്ഥാനെതിരെ ഭീഷണി മുഴക്കേണ്ടി വന്ന ഗതികേടിലാണ് പാക് പ്രതിരോധ മന്ത്രി ഖ്വാജ അസിഫ്. ഇന്ത്യയ്ക്കെതിരെ തുടര്ച്ചയായി ഭീകരാക്രമണങ്ങള് നടത്തുന്ന, ഭീകരരെ ഇന്ത്യയുടെ അതിര്ത്തി കടത്തിവിട്ട് അക്രമം നടത്തുന്ന പാകിസ്ഥാന് അതേ ഭീകരവാദം ഭീഷണിയായിരിക്കുകയാണ്. താലിബാന് വിദേശമന്ത്രി അമിര് ഖാന് മുത്താഖി ഇന്ത്യ സന്ദര്ശിക്കുന്ന വേളയില് തന്നെയാണ് പാകിസ്ഥാന് പ്രതിരോധമന്ത്രി ഖ്വാജാ ആസിഫിന്റെ താലിബാനെതിരായ ഭീഷണി പുറത്തുവന്നിരിക്കുന്നത്.
ടെഹ്രീക് ഇ താലിബാന് പാകിസ്ഥാന് (ടിടിപി) എന്ന താലിബാന് സര്ക്കാരിന്റെ അനുഗ്രഹാശിസ്സുകളോടെ പാകിസ്ഥാനില് പ്രവര്ത്തിക്കുന്ന ഈ ഭീകരവാദ സംഘടന തുടര്ച്ചയായി പാകിസ്ഥാന് സര്ക്കാരിന് തലവേദന സൃഷ്ടിക്കുകയാണ്. തുടര്ച്ചയായ ബോംബ് സ്ഫോടനങ്ങളില് നിരവധി പാക് സൈനികരാണ് കൊല്ലപ്പെടുന്നത്. ഖൈബര് പക്തൂണ്ക്വായില് കഴിഞ്ഞ ദിവസം പാക് സൈന്യവുമായ ഏറ്റുമുട്ടലില് ഒരു പാക് മേജറും ലഫ്. കേണലും ഉള്പ്പെടെ കൊല്ലപ്പെട്ടിരുന്നു. പാകിസ്ഥാനിലെ ഖൈബര് പക്തൂണ്ഖ്വായിലും ബലൂചിസ്ഥാനിലും ആണ് താലിബാന് പിന്തുണയുള്ള ടിടിപിയുടെ ആക്രമണങ്ങള് ശക്തമായി നടക്കുന്നത്. ഇതിനെതിരെ കഴിഞ്ഞ ദിവസങ്ങളില് പാകിസ്ഥാന് ശക്തമായി ടിടിപി ഭീകരവാദികള് ഒളിച്ചുതാമസിക്കുന്നതായി കരുതുന്ന പ്രദേശങ്ങളില് ബോംബാക്രമണം നടത്തിയിരുന്നു. ഇതില് 19 ടിടിപി ഭീകരവാദികള് കൊല്ലപ്പെട്ടു. ഇതിന് പിന്നാലെ തെഹ്റീക് ഇ താലിബാന് പാകിസ്ഥാന്റെ ഭീകരവാദികളുടെ കേന്ദ്രങ്ങള് ആക്രമിക്കുന്നതിന്റെ ഭാഗമായി ഒക്ടോബര് 9ന് പാകിസ്ഥാന് കാബൂളില് വ്യോമാക്രമണം നടത്തിയിരുന്നു. എന്നാല് അഫ്ഗാന്റെ മണ്ണില് പാകിസ്ഥാന് ആക്രമണം നടത്തരുതെന്ന മുന്നറിയിപ്പുമായി താലിബാന് വക്താവ് സബീബുള്ള മുജാഹിദ് പ്രതികരിച്ചിട്ടുണ്ട്.
“ഇനി മതി….ക്ഷമയ്ക്ക് അതിരുണ്ട്…..” – തുടര്ച്ചയായി പാകിസ്ഥാനില് ബോംബ് സ്ഫോടനങ്ങള് ഉണ്ടാക്കുന്ന താലിബാന് സര്ക്കാരിനെതിരെ പാക് മന്ത്രി ഖ്വാജ അസിഫ് പ്രതികരിച്ചത് ഇങ്ങിനെയാണ്. 2021ന് ശേഷം താലിബാനും പാകിസ്ഥാന് സര്ക്കാരും തമ്മിലുള്ള ബന്ധം വഷളായിക്കൊണ്ടിരിക്കുകയാണ്. “ഭീകരവാദം അവസാനിപ്പിച്ചില്ലെങ്കില് വന്നാശം നേരിടേണ്ടിവരും”- ഇതാണ് പാക് പ്രതിരോധമന്ത്രി ഖ്വാജ ആസിഫിന്റെ താലിബാനെതിരായ ഭീഷണി. പാകിസ്ഥാനും അഫ്ഗാനിസ്ഥാനും ഇടയിലുള്ള അതിര്ത്തിരേഖയായ ഡ്യൂറണ്ട് രേഖയെച്ചൊല്ലി താലിബാനും പാകിസ്ഥാനും തമ്മില് അഭിപ്രായഭിന്നതയുണ്ട്. പാകിസ്ഥാനിലേക്ക് നുഴഞ്ഞു കയറുന്ന അഫ്ഗാന് അഭയാര്ത്ഥികളെ അഫ്ഗാനിസ്ഥാനിലേക്ക് തന്നെ ബലമായി പാക് സൈന്യം തള്ളിനീക്കാന് ശ്രമിക്കുന്നതുമായി ബന്ധപ്പെട്ടും ഇരുരാജ്യങ്ങളും തമ്മില് സംഘര്ഷം നിലനില്ക്കുന്നുണ്ട്.
