ന്യൂദല്ഹി: രാജ്യത്തെ ബാങ്കുകളിലും റെഗുലേറ്റര്മാരുടെ പക്കലുമായി അവകാശികളില്ലാതെ 1.84 ലക്ഷം കോടി രൂപയുടെ സാമ്പത്തിക ആസ്തികള് ഉണ്ടെന്ന് കേന്ദ്ര ധനകാര്യമന്ത്രി നിര്മലാ സീതാരാമന്. സാമ്പത്തിക ആസ്തികള് യഥാര്ത്ഥ അവകാശികള്ക്ക് ലഭിക്കുന്നുണ്ടെന്ന് ഉദ്യോഗസ്ഥര് ഉറപ്പാക്കണമെന്ന് നിര്മല സീതാരാമന് ആവശ്യപ്പെട്ടു.
‘നിങ്ങളുടെ പണം, നിങ്ങളുടെ അവകാശം’ എന്ന മൂന്നുമാസത്തെ പ്രചാരണ പരിപാടിക്ക് തുടക്കം കുറിച്ച് ഗുജറാത്തില് സംസാരിക്കുകയായിരുന്നു മന്ത്രി. ബാങ്ക് നിക്ഷേപങ്ങള്, ഇന്ഷുറന്സ്, പ്രൊവിഡന്റ് ഫണ്ട്, ഓഹരികള് എന്നിവയുടെ രൂപത്തിലാണ് 1.84 ലക്ഷം കോടി രൂപയുടെ സാമ്പത്തിക നിക്ഷേപങ്ങള് ബാങ്കുകളിലും റെഗുലേറ്റര്മാരുടെ പക്കലുമായി അവകാശികളില്ലാതെ കിടക്കുന്നതെന്നും കേന്ദ്ര ധനമന്ത്രി പറഞ്ഞു.
അവകാശികളില്ലാത്ത പണം ബാങ്കുകളിലോ ആര്ബിഐയിലോ നിക്ഷേപക ഫണ്ടുകളിലോ ഉണ്ട്. ആ ഫണ്ടുകളുടെ യഥാര്ത്ഥ ഉടമകളെയും അവകാശികളെയും കണ്ടെത്തി പണം അവര്ക്ക് കൈമാറണം. ഡിഎഫ്എസ് (സാമ്പത്തിക സേവന വകുപ്പ്) പ്രകാരം 1,84,000 കോടി രൂപ അവിടെയുണ്ട്. അത് തികച്ചും സുരക്ഷിതമാണെന്ന് ഉറപ്പുനല്കാന് കഴിയും. ശരിയായ രേഖകളുമായി നിങ്ങള്ക്ക് എപ്പോള് വേണമെങ്കിലും വരാം. പണം നിങ്ങള്ക്ക് നല്കും. സര്ക്കാര് അതിന്റെ സൂക്ഷിപ്പുകാരാണ്. അത് ബാങ്ക് വഴിയോ സെബി വഴിയോ, മറ്റേതെങ്കിലും ഏജന്സി വഴിയുമാകാം. പക്ഷേ അത് സുരക്ഷിതമായി അവിടെയുണ്ട്’ നിര്മല സീതാരാമന് പറഞ്ഞു.
ഉദ്ഗം എന്ന പോര്ട്ടല് (അവകാശികളില്ലാത്ത നിക്ഷേപങ്ങള് കണ്ടെത്താനുള്ള പോര്ട്ടല്) ആര്ബിഐ ഉണ്ടാക്കിയിട്ടുണ്ട്. അവകാശികളില്ലാത്ത നിക്ഷേപം ഒരിടത്തുനിന്ന് മറ്റൊരിടത്തേക്ക് മാറിക്കൊണ്ടിരിക്കുകയാണ്. നിങ്ങള് അത് ആവശ്യപ്പെടുന്ന നിമിഷം നിങ്ങള്ക്ക് അത് ലഭിക്കും, നിര്മലാ സീതാരാമന് കൂട്ടിച്ചേര്ത്തു.
