ന്യൂദല്ഹി:ഇന്ത്യയുടെ ഉപഗ്രഹങ്ങള് വിദേശഉപഗ്രഹങ്ങളെ ഷട്ടറിട്ട് മറയ്ക്കുന്നതിനാല് അവയ്ക്ക് ഇന്ത്യയുടെ ചിത്രങ്ങള് എടുക്കാന് കഴിയുന്നില്ലെന്ന് പാകിസ്ഥാനില് വിമര്ശനമുയരുന്നു. അതല്ലെങ്കില് ഇന്ത്യയില് പാകിസ്ഥാന് നടത്തിയ പല ആക്രമണങ്ങളുടെയും ഉപഗ്രഹചിത്രങ്ങള് പുറത്തുവിട്ടേനെ എന്ന് പാകിസ്ഥാന്റെ സ്ട്രാറ്റജിക് പ്ലാന്സ് ഡിവിഷന്റെ പുതിയ അവകാശവാദം. എന്നാല് പാകിസ്ഥാന്റെ ഈ തൊടുന്യായത്തെ ചിരിച്ചുതള്ളുകയാണ് ഇന്ത്യ.
കാരണം ഇന്ത്യയുടെ മേല് പാകിസ്ഥാന് കാര്യമായി ആക്രമണങ്ങള് നടത്താന് കഴിഞ്ഞില്ലെന്ന് മാത്രമല്ല ഓപ്പറേഷന് സിന്ദൂറില് പാകിസ്ഥാന്റെ ഒമ്പത് വ്യോമബേസുകളും പാകിസ്ഥാനകത്തെ ഭീകരവാദ കേന്ദ്രങ്ങളെയും ഇന്ത്യ തകര്ക്കുകയും ചെയ്തിരുന്നു. ഓപ്പറേഷന് സിന്ദൂറിന് ശേഷം പാകിസ്ഥാനില് ആക്രമണം നടത്തിയതിന്റെ വ്യക്തമായ ഉപഗ്രഹചിത്രങ്ങള് ഇന്ത്യ പുറത്തുവിടുകയും ചെയ്തിരുന്നു. ഇതിലെ ജാള്യത മറയ്ക്കാനാണ് പാകിസ്ഥാന്റെ സ്ട്രാറ്റജിക് പ്ലാന്സ് ഡിവിഷന് പുതിയ തൊടുന്യായം നിരത്തുന്നത്.
എന്നാല് ഇന്ത്യയില് നടത്തിയ പല ആക്രമങ്ങളുടെയും ചിത്രങ്ങള് പാകിസ്ഥാന് പുറത്തുവിടാന് കഴിയാതിരുന്നത് ഇന്ത്യ വിദേശഉപഗ്രഹങ്ങളെ ഷട്ടറിട്ട് മറച്ചതിനാലാണെന്നാണ് പാകിസ്ഥാന്റെ സ്ട്രാറ്റജിക് പ്ലാന്സ് ഡിവിഷന്റെ അവകാശവാദം. അതല്ലെങ്കില് ഇന്ത്യയുടെ മേല് പാകിസ്ഥാന് നടത്തിയ ആക്രമണത്തിന്റെ ഉപഗ്രഹചിത്രങ്ങള് പകര്ത്തിയേനെ എന്നാണ് പാകിസ്ഥാന് സര്ക്കാര് വക്താക്കള് പറയുന്നത്. അതേ സമയം ഇന്ത്യയുടെ ഉപഗ്രഹങ്ങള് പാകിസ്ഥാനിലെ സ്ഥലങ്ങളെല്ലാം കൃത്യമായി പകര്ത്തുന്നതില് നൂറു ശതമാനവും വിജയിച്ചെന്നും പാകിസ്ഥാന് പറയുന്നു.
വിദേശ രാജ്യങ്ങളിലെ സര്ക്കാര് ഉടമസ്ഥതയിലുള്ള ഉപഗ്രഹങ്ങളെ മാത്രമല്ല, വിദേശരാജ്യങ്ങളുടെ സ്വകാര്യ ഉപഗ്രങ്ങളെയും ഫലപ്രദമായി ഇന്ത്യയ്ക്ക് ഷട്ടറിട്ട് മറയ്ക്കാന് കഴിഞ്ഞതിനാല് ഈ വിദേശ ഉപഗ്രഹങ്ങള്ക്ക് ഒന്നിനും യുദ്ധസമയത്തെ ഇന്ത്യയുടെ ഭൂവിഭാഗങ്ങള് പകര്ത്താന് സാധിച്ചില്ലെന്നാണ് പാകിസ്ഥാന്റെ സ്ട്രാറ്റജിക് പ്ലാന്സ് ഡിവിഷന് വിശദീകരിക്കുന്നത്. എന്നാല് ഇത് ആനമണ്ടത്തരമാണെന്നും അങ്ങിനെ ഉപഗ്രഹങ്ങളെ ചിത്രമെടുക്കുന്നതില് നിന്നും മറയ്ക്കാന് കഴിയില്ലെന്നും ബഹിരാകാശ വിദഗ്ധര് ചൂണ്ടിക്കാട്ടുന്നു. ഇന്ത്യയെ ആക്രമിക്കാന് കഴിഞ്ഞില്ലെങ്കിലും, ഇന്ത്യയ്ക്ക് യുദ്ധത്തില് കനത്ത നാശം ഉണ്ടാക്കാന് പാകിസ്ഥാന് സാധിച്ചിരുന്നുവെന്ന് അവിടുത്തെ ജനങ്ങളെ ബോധിപ്പിക്കാനുള്ള പാകിസ്ഥാന്റെ പുതിയ തന്ത്രമാണിതെന്ന് ഇന്ത്യ വിശ്വസിക്കുന്നു.
