ഗുവാഹത്തി: വിഖ്യാത ആസാമീസ് ഗായകന് സുബീന് ഗാര്ഗിന്റെ മരണത്തില് ഫെസ്റ്റിവല് സംഘാടകനും ഗായകന്റെ മാനേജര്ക്കും പ്രത്യേക അന്വേഷണ സംഘം സമന്സ് അയച്ചു. സിംഗപ്പൂരിലെ നോര്ത്ത് ഈസ്റ്റ് ഫെസ്റ്റിവലിന്റെ സംഘാടകനായ ശ്യാംകനു മഹന്ത, ഗായകന്റെ മാനേജരായ സിദ്ധാര്ത്ഥ ശര്മ്മ എന്നിവര്ക്കാണ് സിംഗപ്പൂരിലെ ഭാരത എംബസി വഴി സമന്സ് അയച്ചത്. ഇരുവരും ഒക്ടോബര് ആറിനകം അന്വേഷണസംഘത്തിന് മുന്പാകെ ഹാജരാകണമെന്നാണ് സമന്സില് പറയുന്നത്.
യാച്ച് പാര്ട്ടിയില് ഗാര്ഗിനൊപ്പം ഉണ്ടായിരുന്ന ആസാമില് നിന്നുള്ള പന്ത്രണ്ടോളം പേര്ക്കും അന്വേഷണത്തില് സഹകരിക്കാന് സമന്സ് അയച്ചു.
ഇതിനിടെ ഗായകന്റെ മരണം അന്വേഷിക്കണമെന്ന് ആവശ്യപ്പെട്ട് ഗാര്ഗിന്റെ ഭാര്യ ഗരിമ സൈകിയ ഗാര്ഗ്, സഹോദരിയുടെ ഭര്ത്താവ് പാമി ബര്താക്കൂര്, ബന്ധുവായ മനോജ് ബര്താക്കൂര് എന്നിവരാണ് പരാതി നല്കി. ശ്യാംകനു മഹന്ത, സിദ്ധാര്ത്ഥ ശര്മ്മ എന്നിവര് പാര്ട്ടിയുമായി ബന്ധപ്പെട്ട് സുരക്ഷ ഒരുക്കുന്നതില് അലംഭാവം കാണിച്ചതായി പരാതിയില് കുടുംബം ആരോപിച്ചു.
സപ്തംബര് 19ന് സിംഗപ്പൂരില് സ്കൂബാ ഡൈവിങ്ങിനിടെയുണ്ടായ അപകടത്തിലാണ് 52-കാരനായ സുബീന് ഗാര്ഗ് മരിച്ചത്.
