കൊല്ലം: തദ്ദേശ തെരഞ്ഞെടുപ്പ് ക്വാര്ട്ടര് ഫൈനലോ, സെമിഫൈനലോ അല്ല, മറിച്ച് കേരളത്തിലെ ബിജെപിക്ക് ഫൈനല് തന്നെയാണെന്ന് സംസ്ഥാന അധ്യക്ഷന് രാജീവ് ചന്ദ്രശേഖര്.
സംസ്ഥാനസമിതിയോഗത്തില് അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. ഇനി നമുക്ക് വിശ്രമമില്ലാത്ത നാളുകളാണ്. രണ്ട് ദിവസം മുമ്പ് നാം ഗൃഹസമ്പര്ക്കയജ്ഞത്തിന് തുടക്കമിട്ടു. ഇനിയുള്ള 35 ദിവസം കൊണ്ട് കേരളത്തിലെ അമ്പത് ലക്ഷം വീടുകളില് നമ്മുടെ പ്രവര്ത്തകര് എത്തണം. പാര്ട്ടിയുടെ കാഴ്ചപ്പാടും വികസിത കേരളത്തിന്റെ സന്ദേശവും ബോധ്യപ്പെടുത്തണം. ഒന്നിലധികം തവണ ഇത് തുടരണം. മാറിമാറി ഭരിച്ച സിപിഎമ്മും കോണ്ഗ്രസും എന്തു ചെയ്തുവെന്നും ബിജെപി വന്നാല് എന്തെല്ലാം ചെയ്യുമെന്നും വീടുകളിലെത്തി വോട്ടര്മാരെ അറിയിക്കണം. ഇടതും വലതും ഭരിച്ചുമുടിച്ച നാടാണിത്. നാടിനെ രക്ഷിക്കാന് ബിജെപിക്ക് മാത്രമെ ഇനി സാധിക്കൂ. നാം 100 ശതമാനവും അധ്വാനിക്കണം, കഠിനമായി തന്നെ പ്രവര്ത്തിക്കണം. ഉറപ്പായും വിജയിക്കും. അധികാരം തന്നെയാണ് ആത്യന്തികമായ ലക്ഷ്യം. കേരളജനതയെ രക്ഷിക്കാന് അതെ മാര്ഗമുള്ളൂ.
തദ്ദേശ തെരഞ്ഞെടുപ്പിന് ശേഷം മറ്റൊരു ഫൈനലായി അസംബ്ലി തെരഞ്ഞെടുപ്പിനെയും പാര്ട്ടി അഭിമുഖീകരിക്കും. അഴിമതിയും പ്രീണനവും നയമാക്കിയ സിപിഎമ്മും കോണ്ഗ്രസും അല്ലാതെ കേരളത്തില് മൂന്നാമത് സാധ്യതയായി ബിജെപി ഉണ്ടെന്ന ഉറച്ച ബോധ്യം വോട്ടര്മാരില് സൃഷ്ടിക്കണം. ബിജെപിക്കെതിരെ ശക്തമായ നുണപ്രചാരണമാണ് ഇരുമുന്നണികളും നടത്തുന്നത്. ഇതിനെയെല്ലാം നാം നേരിടും.
ജനങ്ങളെ വിഡ്ഢികളാക്കിയും അവരുടെ ശ്രദ്ധ തിരിച്ചും എക്കാലവും പറ്റിക്കാനാണ് ഇരുമുന്നണികളും നോക്കുന്നതെന്നും അദ്ദേഹം പറഞ്ഞു.
