ഝാര്സുഗുഡ(ഒഡീഷ): കണക്ടിവിറ്റി രംഗത്ത്, തദ്ദേശീയ സാങ്കേതികവിദ്യ ഉപയോഗിച്ച് 37,000 കോടിയോളം രൂപ ചെലവില് നിര്മ്മിച്ച 97,500-ല് അധികം മൊബൈല് 4ജി ടവറുകളാണ് പ്രധാനമന്ത്രി നരേന്ദ്ര മോദി ശനിയാഴ്ച രാഷ്ട്രത്തിന് സമര്പ്പിച്ചത്. ഇതില് ബി.എസ്.എന്.എല് കമ്മീഷന് ചെയ്ത 92,600-ല് അധികം 4ജി ടെക്നോളജി സൈറ്റുകള് ഉള്പ്പെടുന്നു.
ഡിജിറ്റല് ഭാരത് നിധിക്ക് കീഴില് ധനസഹായം ലഭിച്ച 18,900-ല് അധികം 4ജി സൈറ്റുകള് വിദൂര, അതിര്ത്തി, ഇടതു തീവ്രവാദ ബാധിത പ്രദേശങ്ങളിലെ 26,700 ഓളം ഗ്രാമങ്ങളെ ബന്ധിപ്പിക്കുകയും 20 ലക്ഷത്തിലധികം പുതിയ വരിക്കാര്ക്ക് സേവനം ലഭ്യമാക്കുകയും ചെയ്യും. സൗരോര്ജ്ജത്തില് പ്രവര്ത്തിക്കുന്ന ഈ ടവറുകള് ഇന്ത്യയിലെ ഏറ്റവും വലിയ ഹരിത ടെലികോം സൈറ്റുകളുടെ സമൂഹമായി മാറുകയാണ്.
ദേശീയതലത്തില് കണക്റ്റിവിറ്റിയും പ്രാദേശിക വളര്ച്ചയും വര്ദ്ധിപ്പിക്കുന്ന സുപ്രധാന റെയില്വേ പദ്ധതികള്ക്ക് പ്രധാനമന്ത്രി തറക്കല്ലിടുകയും രാജ്യത്തിന് സമര്പ്പിക്കുകയും ചെയ്തു. ഇവയില് സാംബല്പൂര്-സര്ലയിലെ റെയില് മേല്പ്പാലത്തിനുള്ള തറക്കല്ലിടല്, ഇരട്ടിപ്പിച്ച കോരാപുട്ട്ബൈഗുഡ, മനാബര്കോരാപുട്ട്ഗോരാപൂര് പാതകള് രാജ്യത്തിന് സമര്പ്പിക്കല് എന്നിവയും ഉള്പ്പെടുന്നു.
ഈ പദ്ധതികള് ഒഡീഷയിലെയും അയല് സംസ്ഥാനങ്ങളിലെയും ചരക്ക് നീക്കം, യാത്രാസൗകര്യങ്ങള് എന്നിവ ഗണ്യമായി മെച്ചപ്പെടുത്തുകയും പ്രാദേശിക വ്യവസായങ്ങളെയും വ്യാപാരത്തെയും ശക്തിപ്പെടുത്തുകയും ചെയ്യും. ബെര്ഹാംപൂര്, ഉദ്ന (സൂറത്ത്) എന്നിവയ്ക്കിടയിലുള്ള അമൃത് ഭാരത് എക്സ്പ്രസ് പ്രധാനമന്ത്രി ഫ്ലാഗ് ഓഫ് ചെയ്തു. ഇത് സംസ്ഥാനങ്ങളിലുടനീളം താങ്ങാനാവുന്നതും സൗകര്യപ്രദവുമായ ഗതാഗത ബന്ധം സാധ്യമാക്കുകയും, വിനോദസഞ്ചാരത്തെ പിന്തുണയ്ക്കുകയും, തൊഴിലവസരങ്ങള് സൃഷ്ടിക്കുകയും, സാമ്പത്തിക പ്രാധാന്യമുള്ള ജില്ലകളെ ബന്ധിപ്പിക്കുകയും ചെയ്യും.
