തിരുവനന്തപുരം: പൂജപ്പുര സരസ്വതി മണ്ഡപത്തില് നടന്നു വരുന്ന നവരാത്രി മഹോത്സവത്തില് കനകസഭാ ദര്ശനത്തിന് ഭക്തജനതിരക്ക്. രാത്രി 8.30ന് നടക്കുന്ന കനക സഭാ ദര്ശനത്തില് സരസ്വതി ദേവിയുടെ സ്കന്ദ മാതാ ഭാവത്തെ എഴുന്നള്ളിച്ച് സരസ്വതി മണ്ഡപത്തില് കുടിയിരുത്തുകയും തുടര്ന്ന് അഭിഷേകം, ദീപാരാധന എന്നിവ കഴിഞ്ഞ് തിരിച്ചെഴുന്നള്ളുകയും ചെയ്യുന്നു. അഭിഷേകം കണ്ട് തൊഴാന് വന് ഭക്തജനതിരക്കാണ് അനുഭവപ്പെടുന്നത്.
ഇന്നത്തെ സംഗീത സദസ്സില് ഗോകുല് സി.എസ്, ഹരീഷ് ബാബു എന്നിവരുടെ സംഗീത കച്ചേരി നടക്കും. ശ്രീസ്വാതി തിരുനാള് സരസ്വതി മണ്ഡപത്തില് രാവിലെ 8മുതല് വൈകിട്ട് 6.30 വരെ വിവിധ കലാപരിപാടികള്. ശ്രീചിത്തിര തിരുനാള് ആഡിറ്റോറിയത്തില് രാവിലെ 7 മണി മുതല് വൈകിട്ട് 4 വരെ ഭക്തി ഗാനമേള, ഡാന്സ്, തിരുവാതിര തുടങ്ങിയവ ഉണ്ടായിരിക്കും. വൈകിട്ട് 4. 30ന് നവരാത്രി പ്രഭാഷണ പരമ്പരയില് ആദ്ധ്യാത്മിക പ്രഭാഷകന് കാവാലം ശശികുമാറിന്റെ പ്രഭാഷണം. രാത്രി 9. 30ന് നാട്യമന്ദിര് സ്കൂള് ഓഫ് ആര്ട്സ് അവതരിപ്പിക്കുന്ന നൃത്ത കലാവിരുന്ന്, 10.30ന് മന്ത്ര സ്കൂള് ഓഫ് ആര്ട്സ് അവതരിപ്പിക്കുന്ന നൃത്തനൃത്യങ്ങള് എന്നിവയും ഉണ്ടായിരിക്കും.
നവരാത്രിമഹോത്സവത്തിന്റെ ആറാം ഉത്സവ ദിനത്തില് ശ്രീചിത്തിര തിരുനാള് ആഡിറ്റോറിയത്തില് നടക്കുന്ന അന്നദാനത്തിന് മുന്നോടിയായുള്ള കലം നിറയ്ക്കല് ചടങ്ങ് നടന്നു. ക്ഷേത്രത്തിനു മുന്നില് ഒരുക്കിയിട്ടുള്ള പ്രത്യേക ഉരുളിയില് പൂജപ്പുര റോളര് സ്കേറ്റിംഗിലെ നൂറോളം കുട്ടികളാണ് നാളികേരം ഉള്പ്പെടെയുള്ള ദ്രവ്യങ്ങള് ദേവിക്ക് മുന്നില് സമര്പ്പിക്കുന്ന കലം നിറയ്ക്കല് ചടങ്ങ് നടത്തിയത്.
