അമേരിക്കന് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ച തീരുവ വര്ധനയും എച്ച് 1 ബി വിസാ ഫീസ് കൂട്ടലും ഭാരതത്തിന്റെ സമ്പദ്വ്യവസ്ഥയ്ക്കും ഐടി മേഖലയ്ക്കും നേരിട്ടുള്ള തിരിച്ചടിയായി വിലയിരുത്തപ്പെടുന്നു. 50 ശതമാനം വരെ ഉയര്ന്ന തീരുവകള് ഭാരതത്തില് നിന്നുള്ള കയറ്റുമതികള്ക്ക് ചുമത്തുകയും, പുതിയ എച്ച് 1 ബി വിസകള്ക്കായി 1,00,000 ഡോളര് വരെ ഫീസ് അടയ്ക്കേണ്ട സാഹചര്യം സൃഷ്ടിക്കുകയും ചെയ്തിരിക്കുന്നത്, ഭാരതത്തിന്റെ പരമ്പരാഗത കയറ്റുമതി മാര്ഗങ്ങളേയും വിദേശ തൊഴിലവസരങ്ങളേയും ബാധിക്കുമെന്നു വ്യക്തമാക്കപ്പെടുന്നു. ആഭരണങ്ങള്, വസ്ത്രങ്ങള്, ഫര്ണിച്ചര് തുടങ്ങി അമേരിക്കന് വിപണിയെ അധികം ആശ്രയിച്ച മേഖലകള്ക്ക് വില മത്സര ശേഷി നഷ്ടപ്പെടും. ഐ.ടി. പ്രതിഭകളുടെ പ്രവാഹം തടസ്സപ്പെടുമ്പോള്, അമേരിക്കയില് തൊഴില് തേടുന്ന ഭാരതീയരും സ്ഥാപനങ്ങളും പ്രതിസന്ധി നേരിടും.
എങ്കിലും, ചരിത്രപരമായി നോക്കുമ്പോള് ഇത്തരം ആഘാതങ്ങള് പലപ്പോഴും രാജ്യങ്ങള്ക്ക് പുതിയ വഴിത്തിരിവുകള് തുറന്നിട്ടുണ്ട്. കോവിഡ്-19 മഹാമാരിയുടെ ആഘാതം ഭാരതത്തെ വേഗത്തില് ഡിജിറ്റല് സമ്പദ്വ്യവസ്ഥയിലേക്കും ഓണ്ലൈന് അധിഷ്ഠിത ബിസിനസ് മാതൃകകളിലേക്കും കൊണ്ടുപോയത് ഇന്നും വ്യക്തമാണ്. അതുപോലെ, ട്രംപിന്റെ തീരുമാനങ്ങള് ഭാരതത്തെ തന്നെ സ്വയം ശക്തിപ്പെടുത്തി മുന്നോട്ടുകൊണ്ടുപോകാനിടയുണ്ട്.
ഈ പ്രഖ്യാപനത്തില് നിന്ന് ഭാരത്തിന് ലഭിക്കുന്ന പ്രധാന നേട്ടം പ്രതിഭ നാട്ടില് തന്നെ നിലനിര്ത്തപ്പെടുമെന്നതാണ്. വിദേശത്തേക്ക് പോകാനുള്ള വഴികള് കുറയുമ്പോള്, കഴിവുറ്റ യുവാക്കളും ഗവേഷകരും നാട്ടിലെ സ്റ്റാര്ട്ടപ്പ് രംഗത്തും ആര്ട്ടിഫിഷ്യല് ഇന്റലിജന്സ് (എഐ), റോബോട്ടിക്സ്, ഗവേഷണ-വികസന മേഖലകളിലും പ്രവേശിച്ച് ആഭ്യന്തര നവോത്ഥാനത്തിന് കരുത്തേകും. ലോകം സാധാരണ കോഡിങ്ങില് നിന്ന് ആശയാവിഷ്കാരത്തിലേക്കും ഡിസൈന്-പാറ്റന്റ് വികസനത്തിലേക്കും നീങ്ങുമ്പോള്, ഭാരതം ”കോഡിങ് ഫാക്ടറി”യില് നിന്ന് ”ഇന്നോവേഷന് ഹബ്” ആയി മാറാനുള്ള സാധ്യത ഇപ്പോഴാണ് ഏറ്റവും ശക്തമായി ഉയര്ന്നിരിക്കുന്നത്.
വ്യാപാര മേഖലയില് ആശ്രിതാവസ്ഥ കുറയ്ക്കാനുള്ള അവസരവും ഇതിലൂടെ ലഭിക്കുന്നു. അമേരിക്കയിലേക്കുള്ള കയറ്റുമതിയില് ആശ്രയിച്ചിരുന്ന ഭാരതം, യൂറോപ്പ്, മിഡില് ഈസ്റ്റ്, ലാറ്റിന് അമേരിക്ക, ആസിയാന് മേഖലകളിലേക്കുള്ള വിപണി വൈവിധ്യം ഉറപ്പാക്കാന് നിര്ബന്ധിതമാകും. ഇതിലൂടെ സാമ്പത്തിക അപകടസാധ്യത കുറയുകയും, പുതിയ വിപണികളില് ഭാരതീയ ഉത്പന്നങ്ങള് സ്ഥാനം നേടുകയും ചെയ്യും. ആഭ്യന്തര തലത്തില് ”മേക് ഇന് ഇന്ത്യ” പദ്ധതികള്ക്ക് ശക്തമായ ഉണര്വ് ലഭിക്കും. ഇറക്കുമതി തടസങ്ങള് ഉയര്ന്നാല് ആഭ്യന്തര നിര്മിതികള്ക്ക് കൂടുതല് ആവശ്യകത ഉണ്ടായിരിക്കുമെന്നും, ഇതുവഴി സ്വദേശ വ്യവസായങ്ങള്ക്ക് പുതുജീവന് ലഭിക്കുമെന്നും ഉറപ്പാണ്.
അമേരിക്കയില് വിസാ ഫീസ് വര്ധനവിലൂടെ വിദേശത്തേക്ക് പോയി ജോലി ചെയ്യുന്നത് ചെലവേറിയതാകുമ്പോള്, ആഗോള കമ്പനികള് ഭാരതത്തിലെ പ്രതിഭകളുമായി റിമോട്ട് രീതിയില് പ്രവര്ത്തിക്കാന് താല്പര്യപ്പെടും. ഇതുവഴി വിദേശ കറന്സിയും തൊഴിലും നാട്ടില് നിലനിര്ത്താനാകും. ഗ്ലോബല് വിപണിയിലെ ”റിമോട്ട് ഓഫീസ് തലസ്ഥാനം” എന്ന നിലയില് ഭാരതം ഉയര്ന്നുവരാനുള്ള അവസരം ഇതിലൂടെ തുറക്കപ്പെടുന്നു.
താഴ്ന്ന ചെലവിലെ തൊഴിലാളി മാതൃകയില് നിന്ന് മാറേണ്ട സാഹചര്യം, ഭാരതത്തെ എഐ, ഓട്ടോമേഷന്, ഹൈടെക് മേഖലകളിലേക്ക് വേഗത്തില് നയിക്കും. ദീര്ഘകാലത്തില് ലോകം സഞ്ചരിക്കുന്ന ദിശയിലേക്കുള്ള ഭാരതത്തിന്റെ സഞ്ചാരം വേഗത്തിലാകും. ഇതിനൊപ്പം, ആഭ്യന്തര പരിഷ്കാരങ്ങള് വേഗത്തിലാക്കേണ്ടതും ഉണ്ടായിരിക്കും. നിയന്ത്രണങ്ങള് ലളിതമാക്കല്, റെഡ് ടേപ്പ് കുറയ്ക്കല്, സ്റ്റാര്ട്ടപ്പ് സൗഹൃദ നിയമങ്ങള് നടപ്പാക്കല് എന്നിവ ഭാരതീയ വ്യവസായാന്തരീക്ഷത്തെ കൂടുതല് മത്സരാധിഷ്ഠിതമാക്കും.
ഭാരതത്തിന്റെ ദീര്ഘകാല തന്ത്രം വ്യക്തവും കൃത്യവുമായിരിക്കണം. ലോകോത്തര നിലവാരത്തിലുള്ള ഇന്നോവേഷന് ഹബുകള് സ്ഥാപിച്ച്, എഐ ഹൈടെക് മേഖലകളില് ഭാരതത്തെ മുന് നിലയിലേക്ക് ഉയര്ത്തണം. വിദ്യാഭ്യാസ രംഗത്ത് ആശയാവിഷ്കാരം, എഐ ഡിസൈന്, അന്തര്വിഷയ പഠനം എന്നിവയ്ക്ക് മുന്ഗണന ലഭിക്കണം. ആഭ്യന്തര നിര്മാണ ശൃംഖലകളെ ശക്തിപ്പെടുത്തി സെമികണ്ടക്ടര്, ഇലക്ട്രോണിക്സ്, ഹരിത ഊര്ജ്ജം, പ്രതിരോധ മേഖലകളില് സ്വയംപര്യാപ്തത ഉറപ്പാക്കണം. വ്യാപാര കരാറുകളുടെ വൈവിധ്യം യൂറോപ്യന് യൂണിയന്, മിഡില് ഈസ്റ്റ്, ആസിയാന് രാജ്യങ്ങളുമായി ഉറപ്പാക്കണം. വിദേശത്തുള്ള പ്രതിഭകളെ മടങ്ങിവരാനും നാട്ടില് തുടരാനും പ്രോത്സാഹിപ്പിക്കുന്നതിനായി പ്രത്യേക വിസകളും നിക്ഷേപ പ്രോത്സാഹനങ്ങളും ഒരുക്കണം.
ട്രംപിന്റെ തീരുവകളും വിസാ ഫീസ് വര്ധനയും ഭാരതത്തിന്റെ നേട്ടങ്ങളെ ദുര്ബലപ്പെടുത്താനാണ് ലക്ഷ്യമിട്ടത്. എന്നാല്, അത് പ്രത്യാഘാതമായി മാറാന് സാധ്യത കൂടുതലാണ്. രാജ്യത്തെ യുവ പ്രതിഭകള് നാട്ടില് തുടരും, സ്വദേശ വ്യവസായം ശക്തിപ്പെടും, എഎഐ, ഡിജിറ്റല് മേഖലകളില് ഭാരതം ഉയര്ച്ച കൈവരിക്കും. ഇന്നത്തെ വെല്ലുവിളി നാളത്തെ മത്സര നേട്ടമായി മാറ്റാന് ഭാരതത്തിന് കഴിയും. ഭീതിയോടെ അല്ല, ദീര്ഘവീക്ഷണത്തോടും നിക്ഷേപത്തോടും പരിഷ്കാരങ്ങളോടും കൂടി പ്രതികരിക്കുമ്പോള്, ഈ പ്രതിസന്ധി രാജ്യത്തിന്റെ ഏറ്റവും വലിയ ശക്തിയായി മാറും. ലോകസമ്പദ്വ്യവസ്ഥയില് ഭാരതത്തിന്റെ സ്ഥാനം മാറ്റിമറിക്കാന് ട്രംപിന്റെ വെല്ലുവിളി തന്നെ അവസരമായി മാറിയേക്കും.
ജന്മഭൂമി ഓണ്ലൈന്