ന്യൂദല്ഹി: ഇന്ത്യ ഇന്ത്യയില് തദ്ദേശീയമായി നിര്മ്മിക്കുന്ന സ്വന്തം വ്യോമപ്രതിരോധ സംവിധാനമായ സുദര്ശന ചക്ര യാഥാര്ത്ഥ്യമാക്കാന് എല്ലാവരും പ്രയത്നിക്കണമെന്ന് പ്രതിരോധമന്ത്രി രാജ് നാഥ് സിങ്ങ്. പ്രധാനമന്ത്രി മോദിയുടെ വലിയൊരു സ്വപ്നമാണിതെന്നും രാജ് നാഥ് സിങ്ങ് പറഞ്ഞു. 2035ല് ഇന്ത്യയ്ക്ക് തദ്ദേശീയമായി സൃഷ്ടിച്ച വ്യോമപ്രതിരോധസംവിധാനം ഉണ്ടാകണമെന്നാണ് മോദിയുടെ ആഗ്രഹം. അക്കാര്യം അദ്ദേഹം സ്വാതന്ത്ര്യദിനപ്രസംഗത്തില് തുറന്നുപറയുകയും ചെയ്തിരുന്നു.
ഇതിനായി ഒരു സമിതിയെ നിയോഗിച്ചിട്ടുണ്ട്. സുദര്ശന ചക്ര വികസിപ്പിക്കാന് അടുത്ത അഞ്ച് വര്ഷത്തേക്ക് ഒരു ഇടക്കാല പദ്ധതി ആസൂത്രണം ചെയ്തിട്ടുണ്ട്. അതുപോലെ തന്നെ ദീര്ഘകാല അടിസ്ഥാനത്തില് പത്ത് വര്ഷത്തേക്ക് ഒരു പ്രവര്ത്തനപദ്ധതിയും ആസൂത്രണം ചെയ്തിട്ടുണ്ട്. വിവിധ സേനാവിഭാഗങ്ങള് തമ്മില് സഹകരണവും ഐക്യവും വേണമെന്നും അദ്ദേഹം പറഞ്ഞു. കൊല്ക്കത്തയില് നടന്ന കംബൈന്ഡ് കമാന്ഡേഴ്സ് കോണ്ഫറന്സ് ഉദ്ഘാടനം ചെയ്യുകയായിരുന്നു അദ്ദേഹം.
കൃഷ്ണഭഗവാന്റെ സുദര്ശനചക്രം പുരാണത്തില് ഏറ്റവും കരുത്തുള്ള ആയുധമാണ്. ഒരു ശക്തിക്കും തടുക്കാന് കഴിയാത്ത ആയുധം. ആ പേരാണ് ഇന്ത്യയുടെ വ്യോമപ്രതിരോധത്തിന് ഇന്ത്യ നല്കിയിരിക്കുന്നത്. ഇപ്പോള് സുദര്ശന ചക്ര എന്ന് പേരിട്ടിരിക്കുന്നത് റഷ്യയില് നിന്നും വാങ്ങിയ എസ് 400 എന്ന വ്യോമപ്രതിരോധ സംവിധാനത്തേയാണ്. പക്ഷെ ഇന്ത്യ അതിന് പുതുക്കിയിരുന്നു. പുതിയ ടെക്നോളജികള് കൂട്ടിച്ചേര്ത്തപ്പോഴാണ് ഇന്ത്യയ്ക്ക് കൃത്യമായി മര്മ്മം ഭേദിക്കാവുന്ന സംഹാരശക്തിയുള്ള വ്യോമപ്രതിരോധ സംവിധാനമായി റഷ്യ നല്കിയ എസ് 400 മാറിയത്. അതായത് നിര്മ്മിത ബുദ്ധി, ഡേറ്റ അനലിറ്റിക്സ്, ജിഐ മാപ്പിംഗ് തുടങ്ങിയ ആധുനിക സങ്കേതങ്ങളെ ഇന്ത്യ എസ് 400 നോട് കൂട്ടിച്ചേര്ത്തിരുന്നു.
പക്ഷെ ഇത് ഒന്നു കൂടി വിപുലമാക്കാനാണ് മോദി ആഗ്രഹിക്കുന്നത്. തന്ത്രപ്രധാനമായ എയര് വ്യോമബേസുകള്, ഇന്ത്യയുടെ സൈനികകേന്ദ്രങ്ങള്, ആയുധസൂക്ഷിപ്പുകേന്ദ്രങ്ങല് എന്നിവ മാത്രമല്ല, സാധാരണ പൗരന്മാര്ക്ക് അത്യാവശ്യമായ ആശുപത്രികള്, റെയില്വേ സ്റ്റേഷനുകള്, ആരാധനലയങ്ങള് എന്നിവ കൂടി ഈ സുദര്ശന ചക്രയ്ക്ക് സംരക്ഷിക്കാനാകണം എന്നതാണ് മോദിയുടെ ആഗ്രഹം.
പുതിയ സുദര്ശനചക്ര ദൗത്യത്തില് എല്ലാ ഭാഗങ്ങളും തദ്ദേശീയമായി വികസിപ്പിക്കാനാണ് മോദി ആഗ്രഹിക്കുന്നത്. ഇതില് എല്ലാവരേയും പങ്കാളികളാക്കാനും മോദി ആഗ്രഹിക്കുന്നു. ഗവേഷണം നടത്തുന്ന ഐഐടി പോലുള്ള സ്ഥാപനങ്ങള്, എച്ച് എഎല്, ഭാരത് ഇലക്ട്രോണിക്സ്, ഭാരത് ഡൈനാമിക്സ്, ഡിആര്ഡിഒ പോലുള്ള പൊതുമേഖലാ ഗവേഷണ സ്ഥാപനങ്ങള്, അതുപോലെ ആയുധനിര്മ്മാണ രംഗത്ത് പ്രവര്ത്തിക്കുന്ന സ്വകാര്യ കമ്പനികള് എന്നിവരെ മുഴുവന് പങ്കാളിയാക്കി അടുത്ത് പത്ത് വര്ഷത്തിനുള്ളില് സൃഷ്ടിക്കാന് പോകുന്ന സുദര്ശനചക്രമാണ് മോദിയുടെ മനസ്സില്. ഇത് ഇസ്രയേലിന്റെ വ്യോമപ്രതിരോധ സംവിധാനമായ അയേണ് ഡോമിനെപ്പോലും വെല്ലുന്നതാകണമെന്ന സ്വപ്നവും മോദിയ്ക്കുണ്ട്. തീവ്രവാദ ആക്രമണത്തെ ചെറുക്കുക മാത്രമല്ല, ആക്രമണത്തിന് മുതിരുന്നവരെ ഇല്ലാതാക്കാന് ഈ സുദര്ശന ചക്രത്തിന് സാധിക്കണമെന്നും മോദി ആഗ്രഹിക്കുന്നു.
