കോഴിക്കോട്: പി.പി. മുകുന്ദനെ പോലുള്ളവര് കാട്ടിത്തന്ന വഴികളും ശീലങ്ങളുമാണ് ബിജെപിയുടെ കരുത്തെന്ന് സി. സദാനന്ദന് മാസ്റ്റര് എംപി. പി.പി. മുകുന്ദന് അനുസ്മരണ സമിതിയുടെ നേതൃത്വത്തില് അദ്ദേഹത്തിന്റെ രണ്ടാം ചരമവാര്ഷികത്തിന്റെ ഭാഗമായി നടന്ന ‘വന്ദേമുകുന്ദം’ അനുസ്മരണ പരിപാടി ഉദ്ഘാടനം ചെയ്യുകയായിരുന്നു അദ്ദേഹം. പ്രവര്ത്തകരെ സൃഷ്ടിക്കാനും അവരില് ആശയപ്രപഞ്ചം തീര്ക്കാനും പ്രാപ്തിയുള്ളയാളായിരുന്നു മുകുന്ദേട്ടനെന്നും അദ്ദേഹം പറഞ്ഞു.
അനുസ്മരണ സമിതി ചെയര്മാന് എം.ടി. രമേശ് അധ്യക്ഷത വഹിച്ചു. ഹിന്ദു ഐക്യവേദി സംസ്ഥാന വര്ക്കിങ് പ്രസിഡന്റ് വത്സന് തില്ലങ്കേരി അനുസ്മരണ പ്രഭാഷണം നടത്തി. പി.പി. മുകുന്ദന് സേവാ പുരസ്കാരം ഡോ. എം.എസ്. സുനിലിന് സി. സദാനന്ദന് മാസ്റ്റര് സമര്പ്പിച്ചു. നിര്ധനരായ 360 പേര്ക്ക് വീടുകള് നിര്മിച്ചു നല്കിയ ഇവരുടെ സേവന പ്രവര്ത്തനങ്ങള് പരിഗണിച്ചാണ് അവാര്ഡ്. അഡ്വ. വി.കെ. സജീവന് എം.എസ്. സുനിലിനെ പരിചയപ്പെടുത്തി. അഡ്വ. കെ.വി. സുധീര് സ്വാഗതം പറഞ്ഞു.
