സിപിഎം ഭരിക്കുന്ന എംപ്ലോയീസ് സഹകരണ സംഘത്തില്‍ കോടികളുടെ ക്രമക്കേട്

തിരുവനന്തപുരം: സിപിഎം ഭരിക്കുന്ന തിരുവനന്തപുരം താലൂക്ക് കോ-ഓപ്പറേറ്റീവ് എംപ്ലോയീസ് സഹകരണസംഘത്തില്‍ വന്‍ക്രമക്കേട്. വ്യാജ ശമ്പള സര്‍ട്ടിഫിക്കറ്റുകളുടെയും വ്യാജ രേഖകളുടെയും ഈടില്‍ സിപിഎം ഭരണ സമിതി അംഗങ്ങള്‍ക്കു മാത്രം കോടികള്‍ വായ്‌പകള്‍ നല്കി. ഇവയെല്ലാം കുടിശികയായി. ഭരണ സമിതി അംഗങ്ങള്‍ക്ക് ഓരോരുത്തര്‍ക്കും അരക്കോടിയോടടുത്തു വായ്‌പകളും 10 ലക്ഷത്തിന്റെ മുപ്പതോളം ചിട്ടികളുമുണ്ടെന്ന് അസിസ്റ്റന്റ് രജിസ്ട്രാറിന്റെ നേതൃത്വത്തിലുള്ള പരിശോധനയില്‍ കണ്ടെത്തി.

1984ല്‍ ആരംഭിച്ചതു മുതല്‍ സഹകരണ സംഘം സിപിഎമ്മാണു ഭരിക്കുന്നത്. 2022-23ലെ ഓഡിറ്റ് റിപ്പോര്‍ട്ടിലാണു ചിട്ടി തട്ടിപ്പും ക്രമക്കേടുകളും വിവരിച്ചിരിക്കുന്നത്. ഭരണ സമിതി അംഗങ്ങള്‍ക്ക് അനുവദിക്കാവുന്ന പരമാവധി വായ്‌പയുടെയും ചിട്ടിയുടെയും ഇരട്ടിയിലധികം നല്കി. ഭരണ സമിതി അംഗവും കേരള കോ-ഓപ്പറേറ്റീവ് എംപ്ലോയീസ് യൂണിയന്‍ (കെസിഇയു) തിരുവനന്തപുരം ജില്ലാ സെക്രട്ടറിയും സിപിഎം നേമം ഏരിയ കമ്മിറ്റി അംഗവുമായ വി.എന്‍. വിനോദ്കുമാറിന് 11 തവണ സ്വന്തം ശമ്പള സര്‍ട്ടിഫിക്കറ്റില്‍ ചിട്ടി അനുവദിച്ചു. ഒന്‍പതു തവണ ശമ്പള സര്‍ട്ടിഫിക്കറ്റ് പകര്‍പ്പുവച്ചു തുക നല്കി. തീയതി പോലുംവയ്‌ക്കാതെയാണ് സാലറി സര്‍ട്ടിഫിക്കറ്റ് കൊടുത്തത്. വിനോദ്കുമാറിന് 18.26 ലക്ഷം വായ്‌പക്കുടിശികയും 20.30 ലക്ഷം ചിട്ടിക്കുടിശികയും ഉള്‍പ്പെടെ 38.56 ലക്ഷം ബാധ്യതയുണ്ട്.

ഓഡിറ്റ് സമയത്തെ സംഘം പ്രസിഡന്റ് കെസിഇയു സംസ്ഥാന സെക്രട്ടറി ബി. അനില്‍കുമാറിനു മാത്രം 64.30 ലക്ഷം രൂപ ബാധ്യതയാണ്. ഇതില്‍ 34.05 ലക്ഷം വായ്‌പക്കുടിശികയും 30.25 ലക്ഷം ചിട്ടിക്കുടിശികയുമാണ്. സാലറി സര്‍ട്ടിഫിക്കറ്റുകളുടെ പകര്‍പ്പുവച്ചാണ് ബി. അനില്‍കുമാറിന്റെ വായ്‌പയും ചിട്ടിയും.

മറ്റൊരു ഭരണ സമിതി അംഗം കെസിഇയു ജില്ലാ വൈസ് പ്രസിഡന്റ് ടി.ഐ. സജീവിനു വായ്‌പകളിലായി 14.93 ലക്ഷവും ചിട്ടികളിലായി 23.28 ലക്ഷവും ബാധ്യതയുണ്ട്. കെസിഇയു തിരുവനന്തപുരം ജില്ലാ വൈസ് പ്രസിഡന്റ് സി.ആര്‍. നീന സ്വന്തം പേരിലും ജാമ്യമായും ഒന്‍പതു ചിട്ടിയിലൂടെ പണമെടുത്തു. ഇതിനുള്ള അഞ്ചു സാലറി സര്‍ട്ടിഫിക്കറ്റിലും തീയതി വച്ചിട്ടില്ല, നേരത്തത്തേ സാലറി സര്‍ട്ടിഫിക്കറ്റ് പകര്‍പ്പാണു കൊടുത്തത്. ബൈലോയിലില്ലാത്ത വായ്‌പകളും മുന്‍കൂര്‍ അനുമതി വാങ്ങാത്ത ചിട്ടികളുമാണ് ഇവരെടുത്തത്.

സാലറി സര്‍ട്ടിഫിക്കറ്റില്‍ ക്രമക്കേടു നടത്തിയാണ് ഭൂരിഭാഗം ചിട്ടികളും വായ്‌പകളും അനുവദിച്ചതെന്നും ഇതു കുറ്റകരമാണെന്നും റിപ്പോര്‍ട്ടില്‍ പറയുന്നു. എംഡിഎസ് ചിട്ടി ഇടപാടുകളെക്കുറിച്ചും ചിട്ടി അനുവദിച്ച ഈടിനെപ്പറ്റിയും വിശദമായി പരിശോധിക്കണമെന്നും റിപ്പോര്‍ട്ടിലുണ്ട്. സിപിഎം ജില്ലാ നേതൃത്വം ഇടപെട്ടു റിപ്പോര്‍ട്ടിലെ നടപടികള്‍ മരവിപ്പിച്ചു. വീഴ്ചകള്‍ സഹ. സംഘ നിലനില്‍പ്പിനെത്തന്നെ ബാധിക്കുമെന്നും റിപ്പോര്‍ട്ടിലുണ്ട്.