ന്യൂദല്‍ഹി : 36 സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും മുഖ്യ തെരഞ്ഞെടുപ്പ് ഓഫീസര്‍മാരുടെ ഓഫീസുകളിലെ മീഡിയ നോഡല്‍ ഓഫീസര്‍മാര്‍ക്കും സാമൂഹ്യ മാധ്യമ നോഡല്‍ ഓഫീസര്‍മാര്‍ക്കും വേണ്ടി, സെപ്തംബര്‍ 12-ന് ദല്‍ഹിയില്‍ ഏകദിന ശില്‍പ്പശാല നടത്തുന്നു. തെരഞ്ഞെടുപ്പ് നടപടികള്‍ പഠിപ്പിക്കാനാണിത്. മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ ഉദ്ഘാടനം ചെയ്യും. തെരഞ്ഞെടുപ്പ് കമ്മീഷണര്‍മാരായ ഡോ. സുഖ്ബീര്‍ സിംഗ് സന്ധു, ഡോ. വിവേക് ജോഷി എന്നിവരും പങ്കെടുക്കും.
രാജ്യത്തെ തെരഞ്ഞെടുപ്പുകള്‍ ഭരണഘടന അനുശാസിക്കുംവിധം നടത്തപ്പെടുന്നു എന്നതിന് ഊന്നല്‍ നല്‍കുന്നതാണ് ശില്‍പ്പശാല. സമയബന്ധിതവും ഏകോപിതവുമായ രീതിയില്‍ നിയമപരവും വസ്തുതാപരവുമായ വിവരങ്ങള്‍ പ്രചരിപ്പിക്കാന്‍ സജ്ജമാക്കുന്നതും ശില്‍പ്പശാല ലക്ഷ്യമിടുന്നു.
തെരഞ്ഞെടുപ്പു പ്രക്രിയകളുമായി ബന്ധപ്പെട്ട്, തെറ്റിദ്ധാരണ സൃഷ്ടിക്കുന്നതിനും പൊതുജനങ്ങളില്‍ തെറ്റായ വിവരങ്ങള്‍ പരത്തുന്നതിനുമായി സമൂഹമാധ്യമങ്ങളിലും മറ്റും മോശം പ്രവണതകള്‍ വര്‍ധിക്കുന്നതിന്റെ പശ്ചാത്തലത്തില്‍, സംസ്ഥാനങ്ങളിലും കേന്ദ്രഭരണ പ്രദേശങ്ങളിലും മുഖ്യ തെരഞ്ഞെടുപ്പ് ഓഫീസുകളില്‍ വിവരവിനിമയ സംവിധാനത്തെ ശക്തിപ്പെടുത്തുന്നതും ശില്‍പ്പശാലയുടെ ലക്ഷ്യമാണ്.
ഇത്തരം പ്രവണതകളെ പ്രതിരോധിക്കാന്‍ വസ്തുതാപരമായ മറുപടികള്‍ അടിസ്ഥാനമാക്കി, ശാസ്ത്രീയവും യുക്തിസഹവുമായ സമീപനം ഉറപ്പാക്കാനും ശില്‍പ്പശാല ലക്ഷ്യമിടുന്നു.
