കൊച്ചി : ‘ ആടുജീവിത’ത്തിന് ദേശീയ അവാർഡ് ലഭിക്കാത്തതിൽ പ്രതികരിച്ച് പൃഥ്വിരാജ്. ജൂറിയിലെ പത്തു പേരു കണ്ട് മാർക്കിടുന്നതിലല്ല കാര്യമെന്നാണ് പൃഥ്വിരാജിന്റെ വാദം. സിനിമ എടുക്കുന്നത് പ്രേക്ഷകർക്ക് വേണ്ടിയാണെന്നും ‘ആടുജീവിത’ത്തിന് ഏറ്റവും വലിയ അവാർഡ് പ്രേക്ഷകർ തന്നുകഴിഞ്ഞു എന്നും പൃഥ്വിരാജ് പറഞ്ഞു. ഷാർജയിൽ ഒരു പൊതുപരിപാടിയിൽ പങ്കെടുത്ത് സംസാരിക്കുകയായിരുന്നു പൃഥ്വിരാജ്.
‘സിനിമ എടുക്കുന്നത് ഏതെങ്കിലും ഒരു ജൂറിയോ പത്ത് പേരോ കണ്ട് മാർക്കിടാനോ, ഏതെങ്കിലും രാജ്യാന്തര ഫെസ്റ്റിവെലുകളിൽ പ്രദർശിപ്പിക്കാനോ വേണ്ടിയല്ല. അതൊക്കെ നല്ല കാര്യങ്ങൾ തന്നെയാണ്. അതെല്ലാം കൂടുതൽ റീച്ച് ലഭിക്കാൻ സഹായകമാകും. പക്ഷെ എല്ലാത്തിനും മുകളിൽ സിനിമയെടുക്കുന്നത് പ്രേക്ഷകർക്ക് വേണ്ടിയാണ്. നിങ്ങൾ ആടുജീവിതത്തിന് എനിക്ക് ഏറ്റവും വലിയ അവാർഡ് തന്നു കഴിഞ്ഞു. അതിന് പ്രേക്ഷകർക്ക് നന്ദി. ആടുജീവിതം എനിക്ക് വളരെ സ്പെഷ്യൽ ആയ ഒരു സിനിമയാണ് ‘ എന്നാണ് പൃഥ്വിരാജ് പറഞ്ഞത്.
അതേസമയം താരത്തിന്റെ വാക്കുകളെ പരിഹസിച്ച് നിരവധി പേരാണ് രംഗത്തെത്തിയത് . അവാർഡിന് വേണ്ടെങ്കിൽ പിന്നെ അയക്കുന്നത് എന്തിനു വേണ്ടിയാണെന്നാണ് ചിലർ ചോദിക്കുന്നത് . കിട്ടാത്ത മുന്തിരി പുളിക്കുമെന്നാണ് ബിജെപി നേതാവ് യുവരാജ് ഗോകുൽ അടക്കം പലരും പരിഹസിച്ചത്.
