ഏലൂര്‍: കേന്ദ്ര വ്യവസായ സംരക്ഷണ സേനയിലെ (സിഐഎസ്എഫ്) അംഗങ്ങള്‍ക്ക് കൂടുതല്‍ ആനുകൂല്യങ്ങള്‍ പ്രഖ്യാപിച്ചു. അംഗങ്ങളുടെ അടിയന്തര സാമ്പത്തികാവശ്യങ്ങള്‍ നിറവേറ്റാനും അവരുടെ സമഗ്രമായ ഉന്നമനത്തിനും സൈനികസമ്മേളനങ്ങള്‍ വഴി ലഭിച്ച നിര്‍ദേശങ്ങളുടെ അടിസ്ഥാനത്തിലാണിത്. ഇതുസംബന്ധിച്ച സര്‍ക്കുലര്‍ സിഐഎസ്എഫ് യൂണിറ്റുകള്‍ക്ക് ലഭിച്ചു.
അംഗങ്ങള്‍ക്ക് ഇനി മൂന്ന് ശതമാനം പലിശയില്‍ 15 ലക്ഷം വരെ വായ്‌പ ലഭിക്കും. തിരിച്ചടവ് കാലാവധി മൂന്ന് വര്‍ഷത്തില്‍ നിന്ന് അഞ്ച് വര്‍ഷമായി ഉയര്‍ത്തുകയും ചെയ്തു. ഇതുവരെ ആറ് ശതമാനമായിരുന്നു പലിശ. യൂണിറ്റുകളില്‍ നിന്ന് 50,000 രൂപ വരെ മാത്രമേ വായ്‌പ ലഭിച്ചിരുന്നുള്ളൂ. കൂടുതല്‍ തുക ആവശ്യമുണ്ടെങ്കില്‍ സോണില്‍ അപേക്ഷ നല്‍കേണ്ടിയിരുന്നു. ഇപ്പോള്‍ എല്ലാ അപേക്ഷകളും ഓണ്‍ലൈനായി നല്‍കാനും 15 ദിവസം കൊണ്ട് പണം അക്കൗണ്ടില്‍ വരാനും സൗകര്യമൊരുക്കി.
ചികിത്സാ ആവശ്യത്തിന് രണ്ട് ശതമാനം പലിശ നിരക്കില്‍ വായ്‌പ ലഭിക്കും. വായ്‌പയ്‌ക്കും സ്‌കോളര്‍ഷിപ്പിനുമായി 100 കോടിയാണ് സിഐഎസ്എഫ് വകയിരുത്തിയിട്ടുള്ളത്. ചികിത്സാച്ചെലവുകള്‍ തിരിച്ചുകിട്ടുന്ന പദ്ധതിയും തുടങ്ങിയിട്ടുണ്ട്. 80 ശതമാനത്തിലധികം മാര്‍ക്കുള്ള മക്കള്‍ക്ക് സ്‌കോളര്‍ഷിപ്പ് ലഭിക്കും. വിരമിക്കുന്ന അംഗങ്ങള്‍ക്ക് 1.25 ലക്ഷം രൂപ റിസ്‌ക് സേവിങ് ഫണ്ടില്‍ നിന്ന് നല്‍കാനും തീരുമാനമായി.
കല്യാണത്തിനും വീടുനിര്‍മാണത്തിനുമുള്ള ധനസഹായം മൂന്ന് ലക്ഷത്തില്‍ നിന്ന് അഞ്ച് ലക്ഷമായി വര്‍ദ്ധിപ്പിച്ചതു കൂടാതെ തിരിച്ചടവു കാലാവധി മൂന്ന് വര്‍ഷത്തില്‍ നിന്ന് അഞ്ച് വര്‍ഷമാക്കുകയും ചെയ്തു. ആയുഷ്മാന്‍ പദ്ധതിയിലും ദേശീയ ആരോഗ്യ പദ്ധതിയിലും വരുന്ന സ്വയം ചെലവുകളും തിരിച്ചുകൊടുക്കും. മുന്‍പ് അധിക ചെലവിന്റെ 10 ശതമാനമേ കൊടുത്തിരുന്നുള്ളൂ. ചികിത്സാ അവധിക്ക് ധനസഹായം നല്‍കാനും തീരുമാനമുണ്ട്. നിലവില്‍ 1,60,000 അംഗങ്ങളാണ് സിഐഎസ്എഫിലുള്ളത്.
