ജോധ്പുര്‍: കാശി-മഥുര തുടങ്ങിയ വിഷയങ്ങള്‍ക്കുള്ള പരിഹാരം പോരാട്ടമോ പ്രക്ഷോഭമോ അല്ല, മറിച്ച് നിയമപരമായ ഇടപെടലുകളും പരസ്പര സംഭാഷണങ്ങളുമാണ് മാര്‍ഗമെന്ന് ആര്‍എസ്എസ് അഖില ഭാരതീയ പ്രചാര്‍ പ്രമുഖ് സുനില്‍ ആംബേക്കര്‍. ജോധ്പൂരില്‍ ചേര്‍ന്ന ആര്‍എസ്എസ് അഖിലഭാരതീയ സമന്വയ ബൈഠക്കിനെക്കുറിച്ച് വിശദീകരിക്കാന്‍ വിളിച്ച വാര്‍ത്താ സമ്മേളനത്തില്‍ ചോദ്യത്തിന് മറുപടിയായാണ് സംഘത്തിന്റെ നിലപാട് സുനില്‍ ആംബേക്കര്‍ അവതരിപ്പിച്ചത്.
പഞ്ചാബില്‍ വര്‍ദ്ധിക്കുന്ന മതപരിവര്‍ത്തനങ്ങളിലും മയക്കുമരുന്ന് വ്യാപനത്തിലും ബൈഠക്ക് ആശങ്ക പ്രകടിപ്പിച്ചു. ഇവിടെ സേവാ ഭാരതിയും വിദ്യാര്‍ത്ഥി പരിഷത്തും നടത്തുന്ന സാമൂഹിക ജനജാഗരണവും ലഹരിവിമുക്ത പ്രചാരണങ്ങളും കുറച്ചൊക്കെ ഫലം ചെയ്തിട്ടുണ്ട്. ബംഗാളിലെ ഹിന്ദുസമൂഹം നേരിടുന്ന അരക്ഷിതാവസ്ഥ ഇപ്പോഴും തുടരുകയാണ്. ബംഗ്ലാദേശില്‍ നിന്നുള്ള നുഴഞ്ഞുകയറ്റം സൃഷ്ടിക്കുന്നത് ഗുരുതരമായ പ്രതിസന്ധിയാണ്. എന്നാല്‍ ബംഗാള്‍ ഒഴിച്ച് മറ്റ് വടക്കുകിഴക്കന്‍ സംസ്ഥാനങ്ങള്‍ ഏറെക്കുറെ ശാന്തമായി കഴിഞ്ഞു. ആ സംസ്ഥാനങ്ങള്‍ വികസനത്തിന്റെ പാതയില്‍ ഒറ്റക്കെട്ടായി മുന്നേറുന്നു. മണിപ്പൂരിലെ സമീപകാല സംഭവങ്ങളിലെ ആശങ്കകള്‍ പരിഹരിക്കാന്‍ നടത്തിയ സംഭാഷണാധിഷ്ഠിത സമാധാന ശ്രമങ്ങളെ സമന്വയ ബൈഠക്ക് അഭിനന്ദിച്ചു.
വനവാസി മേഖലകളില്‍ നക്സലേറ്റ്, മാവോയിസ്റ്റ് അക്രമങ്ങള്‍ കുറഞ്ഞിട്ടുണ്ട്. എന്നാല്‍ ഇപ്പോഴും സമൂഹത്തെ തെറ്റിദ്ധരിപ്പിക്കാനുള്ള ശ്രമങ്ങള്‍ തുടരുകയാണ്. വനവാസി കല്യാണാശ്രം നടത്തുന്ന ഹോസ്റ്റലുകളും അവകാശപ്രവര്‍ത്തനങ്ങളും നേടുന്ന പിന്തുണ തെളിയിക്കുന്നത് ഭാരതീയ പാരമ്പര്യവും ദേശീയ ആശയങ്ങളും വനവാസി സമൂഹത്തിലേക്ക് എത്തിക്കേണ്ടതിന്റെ ആവശ്യകതയാണെന്ന് സുനില്‍ ആംബേക്കര്‍ ചൂണ്ടിക്കാട്ടി.
സംഘ ശതാബ്ദി കാര്യക്രമങ്ങളും യോഗം വിശദമായി ചര്‍ച്ച ചെയ്തു. പരിസ്ഥിതി സംരക്ഷണം, കുടുംബ പ്രബോധനം, പൗരധര്‍മം തുടങ്ങിയ വിഷയങ്ങളില്‍ പ്രത്യേക പരിപാടികള്‍ നടത്തും. ഒക്ടോബര്‍ രണ്ടിന് നാഗ്പൂരിലെ വിജയദശമി ഉത്സവത്തോടെയാണ് ശതാബ്ദി പ്രവര്‍ത്തനങ്ങള്‍ ഔപചാരികമായി തുടങ്ങുക.
എല്ലാ സംഘടനകളുടെ പ്രധാന ചുമതലകളില്‍ സ്ത്രീപങ്കാളിത്തം കൂടുതലായി ഉണ്ടാകണമെന്ന അഭിപ്രായം ബൈഠക്കിലുയര്‍ന്നു. ക്രീഡാഭാരതി വനിതാകായിക താരങ്ങളില്‍ യോഗാ പരിജ്ഞാനവും പരിശീലനവും പ്രോത്സാഹിപ്പിക്കുന്നുണ്ട്. ഓപ്പറേഷന്‍ സിന്ദൂറിന്റെ പശ്ചാത്തലത്തില്‍ 887 പരിപാടികളാണ് വനിതാ പ്രവര്‍ത്തകര്‍ സംഘടിപ്പിച്ചത്, സുനില്‍ ആംബേക്കര്‍ പറഞ്ഞു.
വാര്‍ത്താസമ്മേളനത്തില്‍, ജോധ്പൂര്‍ പ്രാന്ത സംഘചാലക് ഹര്‍ദയാല്‍ വര്‍മ്മയും പങ്കെടുത്തു
