ജോധ്പൂര്: ദേശീയ വിദ്യാഭ്യാസ നയം നടപ്പാക്കുന്നതിനുതകുന്ന നയപരിപാടികള് ചര്ച്ച ചെയ്ത് ആര്എസ്എസ് അഖിലഭാരതീയ സമന്വയ ബൈഠക്ക്. വിദ്യാഭ്യാസ സമൂഹത്തില് പ്രവര്ത്തിക്കുന്ന സംഘടനകള് ഇത് സംബന്ധിച്ച് നടപ്പാക്കുന്ന പരിപാടികളെക്കുറിച്ച് ബൈഠക്കില് ചര്ച്ച ചെയ്തുവെന്ന് ആര്എസ്എസ് അഖില ഭാരതീയ പ്രചാര് പ്രമുഖ് സുനില് ആംബേക്കര് വാര്ത്താസമ്മേളനത്തില് അറിയിച്ചു.
അഖില ഭാരതീയ രാഷ്ട്രീയ ശിക്ഷക് മഹാസംഘ്, വിദ്യാഭാരതി, ശിക്ഷ സംസ്കൃതി ഉത്ഥാന് ന്യാസ്, ഭാരതീയ ശിക്ഷണ് മണ്ഡല്, അഖില ഭാരതീയ വിദ്യാര്ത്ഥി പരിഷത്ത്, സംസ്കൃത ഭാരതി എന്നിവയുള്പ്പെടെ വിവിധ സംഘടനകള് ചര്ച്ചകളില് പങ്കെടുത്തു.
വിദ്യാഭ്യാസമേഖലയിലെ ഭാരതീയവത്കരണം അനിവാര്യമാണ്. ഭാരതീയ വിജ്ഞാന പാരമ്പര്യം ഉയര്ത്തിപ്പിടിക്കുന്ന പുസ്തകങ്ങളുടെ പുനരാഖ്യാനം ആവശ്യമാണ്. മാതൃഭാഷയിലൂന്നിയുള്ള വിദ്യാഭ്യാസത്തിന് മുന്തൂക്കം വേണം. എല്ലാ ഭാരതീയ ഭാഷകളും രാഷ്ട്രഭാഷകളാണ്. പ്രാഥമിക തലം മുതല് ഉന്നത വിദ്യാഭ്യാസം വരെ എല്ലാ മേഖലയിലും മാതൃഭാഷ മാധ്യമമാകണം. ഇംഗ്ലീഷിനോട് എതിര്പ്പില്ല, പക്ഷേ വിദ്യാഭ്യാസത്തിലും ഭരണത്തിലും ഭാരതീയ ഭാഷകള്ക്ക് ശരിയായ സ്ഥാനം ലഭിക്കണം, ബൈഠക് വിവരങ്ങള് വിശദീകരിച്ച് അദ്ദേഹം പറഞ്ഞു.
ജോധ്പൂരിലെ ലാല്സാഗറില് മൂന്ന് ദിവസമായി നടന്നുവരുന്ന സമന്വയ ബൈഠക്കില് വിദ്യാഭ്യാസ, സാമാജിക, ദേശീയ വിഷയങ്ങളുടെ വിവിധ വശങ്ങള് ചര്ച്ച ചെയ്തു. ആര്എസ്എസിനു പുറമെ സംഘ ആശയത്തില് നിന്ന് പ്രേരണ ഉള്ക്കൊണ്ട് വിവിധ മേഖലകളില് പ്രവര്ത്തിക്കുന്ന 32 സംഘടനകളുടെ പ്രധാന ചുമതലക്കാരും മഹിളാ സമന്വയത്തിന്റെ ഭാരവാഹികളുമടക്കം 320 പേരാണ് ബൈഠക്കില് പങ്കെടുത്തത്.
