ന്യൂദല്ഹി: സെമികണ്ടക്ടര് സ്വാശ്രയത്വത്തിലേക്ക് സുപ്രധാന ചുവടുവെപ്പ് നടത്തി ഭാരതം. ഭാരതം പൂര്ണമായും തദ്ദേശീയമായി നിര്മിച്ച 32 ബിറ്റ് മൈക്രോപ്രൊസസര് വിക്രം 3201 ഔദ്യോഗികമായി പുറത്തിറക്കി. ഐഎസ്ആര്ഒ, ചണ്ഡീഗഢ് ആസ്ഥാനമായുള്ള സെമികണ്ടക്ടര് ലബോര്ട്ടറി (എസ്സിഎല്) എന്നിവയുമായി സഹകരിച്ചാണ് പ്രോസസര് വികസിപ്പിച്ചെടുത്തത്. സെമികോണ് ഇന്ത്യാ 2025 സമ്മേളനത്തില്, കേന്ദ്ര ഇലക്ട്രോണിക്സ്-ഐടി മന്ത്രി അശ്വിനി വൈഷ്ണവ് പ്രധാനമന്ത്രി നരേന്ദ്ര മോദിയുടെ മുന്നില് വിക്രം 3201 അവതരിപ്പിച്ചു.
ബഹിരാകാശ ദൗത്യങ്ങളുടെ കഠിനമായ സാഹചര്യങ്ങളില് പ്രവര്ത്തിക്കാന് പ്രത്യേകം രൂപകല്പന ചെയ്ത 32 ബിറ്റ് മൈക്രോപ്രോസസ്സറാണിത്. മൈനസ് 55 ഡിഗ്രി സെല്ഷ്യസ് മുതല് +125 ഡിഗ്രി സെല്ഷ്യസ് വരെയുള്ള താപനിലയെ നേരിടാനുള്ള കഴിവ് ഇതിനെ വളരെയധികം ശക്തമാക്കുന്നു. റോക്കറ്റുകളിലും വിക്ഷേപണ വാഹനങ്ങളിലും നാവിഗേഷന്, നിയന്ത്രണം എന്നിവ കൈകാര്യം ചെയ്യുന്നതിന് ഇവ സഹായിക്കുന്നു. റേഡിയേഷന് വൈബ്രേഷന് തുടങ്ങിയ ബുദ്ധിമുട്ടുള്ള സാഹചര്യങ്ങളില് പോലും തുടര്ന്ന് പ്രവര്ത്തിക്കുന്നതിന് സൈനിക് ഗ്രേഡ് മാനദണ്ഡങ്ങള്ക്ക് അനുസൃതമായാണ് ഇവ രൂപകല്പന ചെയ്തിരിക്കുന്നത്.
