കൊല്ലം: ഷാര്ജയില് ജീവനൊടുക്കിയ മലയാളി യുവതി അതുല്യയെ ഭര്ത്താവ് സതീഷ് ഭീഷണിപ്പെടുത്തുന്നതിന്റെ കൂടുതല് ദൃശ്യങ്ങള് പുറത്തുവന്നു. ‘നിന്നെ കൊന്ന് കൊലവിളിച്ചിട്ട് ജയിലില് പോകും’ എന്ന് സതീഷ് പറയുന്ന വീഡിയോയാണ് പുറത്തുവന്നത്.
സതീഷ് ശങ്കര് മദ്യലഹരിയിൽ അതുല്യയെ കൊല്ലുമെന്ന് ഭീഷണിപ്പെടുത്തുന്നതാണ് ദൃശ്യങ്ങളിലുള്ളത്. നിന്നെ ഞാന് എവിടെയും വിടില്ല. കുത്തി മലര്ത്തി സതീഷ് ജയിലില് പോയി കിടക്കും. ഞാനില്ലാതെ നിനക്ക് ജീവിക്കാനാകില്ല. ജീവിക്കാന് സമ്മതിക്കില്ല. ക്വട്ടേഷന് നല്കിയാണെങ്കിലും നിന്നെ കൊല്ലും. അതിന് എന്റെ ഒരു മാസത്തെ ശമ്പളം പോലും വേണ്ട- സതീഷ് പറയുന്നു.
ഫോണില് ദൃശ്യങ്ങൾ റിക്കാർഡ് ചെയ്യുന്നുവെന്ന് മനസിലായ സതീഷ് അതുല്യക്കരികിലേക്ക് പാഞ്ഞു വരുന്നതും ഉപദ്രവിക്കുന്നതും ദൃശ്യങ്ങളിലുണ്ട്. കൂടാതെ പത്ത് വര്ഷമായി പീഡനം സഹിക്കുന്നുവെന്നും ഇനി സാധിക്കില്ലെന്നും അതുല്യ പറയുമ്പോള് സതീഷ് ക്രൂരമായി ഉപദ്രവിക്കുകയാണ്. തൊട്ടുപിന്നാലെ അതുല്യ വേദനകൊണ്ട് അലറിക്കരയുന്നതും കേള്ക്കാം. പത്ത് വര്ഷമായി പീഡനം സഹിക്കുന്നുവെന്ന് അതുല്യ പറയുന്നതും ദൃശ്യങ്ങളിലുണ്ട്.
അതുല്യയുടെ കുടുംബമാണ് ജില്ലാ പ്രിന്സിപ്പല് സെഷന്സ് കോടതിയില് ദൃശ്യങ്ങള് സമര്പ്പിച്ചത്. ദൃശ്യങ്ങളുടെ ഫോറന്സിക് പരിശോധന നടത്താന് കോടതി നിര്ദേശിച്ചു.
ജൂലായ് 19നാണ് കൊല്ലം ചവറ തെക്കുംഭാഗം കോയിവിള സ്വദേശിനി അതുല്യ(30)യെ ഷാര്ജയിലെ ഫ്ളാറ്റില് മരിച്ചനിലയില് കണ്ടെത്തിയത്. അതുല്യയുടെ കുടുംബത്തിന്റെ പരാതിയില് ഭര്ത്താവ് സതീഷിനെതിരെ പോലീസ് കേസെടുത്തിരുന്നു. ഷാര്ജയിലെ നടപടികള്ക്ക് ശേഷം നാട്ടിലേക്ക് തിരിച്ച സതീഷിനെ വിമാനത്താവളത്തില് വച്ച് വലിയതുറ പോലീസ് അറസ്റ്റ് ചെയ്യുകയും ജാമ്യത്തില് വിടുകയും ചെയ്തു.
