കുമരകം: പുന്നമടക്കായലില് നടക്കുന്ന നെഹ്റു ട്രോഫി മത്സരത്തില് 21 ജലരാജാക്കന്മാര് ഏറ്റുമുട്ടുമ്പോള് ഏഴു ചുണ്ടുനുകളുടേയും ഒന്നാം അമരത്ത് അണിനിരക്കുന്നത് കുമരകത്തെ താരങ്ങള്. കഴിഞ്ഞ അഞ്ചു വര്ഷങ്ങളിലെ ജേതാക്കളായ പള്ളാത്തുരുത്തി ബോട്ട് ക്ലബ് ഇക്കുറി മത്സരിക്കുന്ന മേല്പ്പാടന് ചുണ്ടന്റെ ഒന്നാം അമരത്ത് തുഴയെറിയുന്നത് കുമരകം കല്ലുപുരയ്ക്കല് പ്രസന്നന് ആണ്. കുമരകത്തെ ചെറിയ കളിവള്ളങ്ങളില് തുഴഞ്ഞായിരുന്നു രംഗപ്രവേശനം. കഴിഞ്ഞ വര്ഷം കാരിച്ചാല്ചുണ്ടനില് ക്ലബ് വിജയിച്ചപ്പോഴും ഒന്നാം അമരത്ത് പ്രസന്നന് ആയിരുന്നു
കൈനകരി ബോട്ട്ക്ലബിന്റെ വിയപുരം ചുണ്ടന്റെ ഒന്നാം അമരം കാക്കുന്നത് കുമരകം കായിപ്പുറം രാജീവ് രാജുവാണ്. കഴിഞ്ഞ വര്ഷം മുതലാണ് രാജീവ് ക്ലബിനു വേണ്ടി തുഴയാന് എത്തുന്നത്. അതിനു മുമ്പ് പള്ളാത്തുരുത്തി ബോട്ട് ക്ലബിന്റെ രണ്ടാം അമരക്കാരനായിരുന്നു.തായങ്കരി ഫ്രണ്ട്സ് ബോട്ട് ക്ലബിന്റെ ജവഹര് തായങ്കരി ചുണ്ടന്റെ ഒന്നാം അമരത്ത് നിലയുറപ്പിക്കുന്നത് പൊന്നപ്പന് കരീത്രയാണ്. കുട്ടനാട്ടിലെ നിരവധി ബോട്ട് ക്ലബുകള്ക്കു വേണ്ടി കളിവള്ളങ്ങളില് അമരക്കാനായി സേവനം അനുഷ്ഠിച്ച താരമാണ് പൊന്നപ്പന് കരീത്ര. ചുണ്ടന് വള്ളങ്ങളുടെ അമരക്കാരനായി നില ഉറപ്പിക്കാന് തുടങ്ങിയിട്ട് വര്ഷങ്ങളേറെയായി.
പുന്നമട ബോട്ട് ക്ലബിന്റെ നടുഭാഗം ചുണ്ടനില് ഒന്നാം അമരക്കാരനായ സുരേഷ് നാഷ്ണാന്ത്രയും കൂമരകം നിവാസിയാണ്. കെറ്റിബിസിയില് തുഴഞ്ഞു തുടങ്ങിയ സുരേഷ് അമരക്കാരനായി നില ഉറപ്പിച്ചിട്ട് 17 വര്ഷങ്ങള് പിന്നിടുന്നു.നിരണം ബോട്ട് ക്ലബ് അണിനിരക്കുന്ന നിരണം ചുണ്ടന്റെ ഒന്നാം അമരത്തും രണ്ടാം അമരത്തും പങ്കായം പിടിക്കുന്നത് സഹോദരങ്ങളായ കുമരകം കരിവേലില് സതീഷും സുരേഷുമാണ്. സതീഷാണ് ഒന്നാം പങ്കായക്കാരന്. കുമരകംവേമ്പനാട് ബോട്ട് ക്ലബ് രണ്ടു തവണ കപ്പ് നേടിയപ്പോഴും സതീഷും സുരേഷുമായിരുന്നു അമരത്ത് .
കുമരകം ടൗണ് ബോട്ട് ക്ലബിന്റെ പായിപ്പാടന് ചുണ്ടനില് ഒന്നാം അമരക്കാരന് അനുപ് തട്ടേലാണ്. കേരളാ പോലീസ് ബോട്ട് ക്ലബിന്റെ അമരക്കാരനായിരുന്നു അനുപ്.
ഇക്കുറി പോലീസ് ബോട്ട് ക്ലബ് ചുണ്ടന് തുഴയത്തതിനാല് അനുപ് ടൗണ് ബോട്ട് ക്ലബില് ഒന്നാം അമരത്തെത്തുകയായിരുന്നു. കുമരകത്തിന്റെ സ്വന്തം ചുണ്ടാനായ നടുവിലേപ്പറമ്പന് ചുണ്ടന്റെ ഒന്നാം അമരക്കാരന് വള്ളത്തിന്റെ ഉടമയായ ജിഫി ഫെലിക്സ് നടുവിലേപ്പറമ്പിലാണ് വള്ളംകളിയുടെ ആവേശം മൂത്ത് സ്വന്തമായിചുണ്ടന് വള്ളം വാങ്ങി. ഇല്ലിക്കളംചുണ്ടന് വാങ്ങി പുതുക്കിപണിതിറക്കിയതാണ് നടുവിലേപ്പറമ്പന് ചുണ്ടന്.വള്ളംകളിക്കുന്നതിനായി എല്ലാവര്ഷവും വിദേശത്തു നിന്നും എത്തുകയാണ് ഈ വള്ളംകളി പ്രേമി.
