തിരുവനന്തപുരം : മുന് എക്സൈസ് കമ്മീഷണറായിരുന്ന മഹിപാല് യാദവ് ഈ മാസം 30ന് വിരമിക്കാനിരിക്കെയാണ് മരണത്തിനു കീഴടങ്ങിയത്. ചികില്സയ്ക്കായി ലീവെടുത്ത് സ്വന്തം നാട്ടിലേക്കു മടങ്ങിയെങ്കിലും ഓണ്ലൈനായി യാത്രയയപ്പു നല്കാന് സഹപ്രവര്ത്തകര് തയാറെടുക്കുന്നതിനിടെയാണ് അദ്ദേഹത്തിന്റെ മരണവാര്ത്ത ബന്ധുക്കള് അറിയിച്ചത്. ബ്രയിന്ടൂമര് ബാധിച്ചതിനെ തുടര്ന്നായിരുന്നു അന്ത്യം.
എഡിജിപി റാങ്കിലുള്ള ഉദ്യോഗസ്ഥനായ മഹിപാല് യാദവ് ജൂണിലാണ് എക്സൈസ് കമ്മിഷണറായത്. ചുമതലയേറ്റ ശേഷം ബ്രെയിന് ട്യൂമര് സ്ഥിരീകരിച്ചതോടെ കഴിഞ്ഞമാസം അവസാനം അദ്ദേഹം അവധിയില് പ്രവേശിച്ചു.
വിരമിക്കുന്ന ഐപിഎസ് ഉദ്യോഗസ്ഥര്ക്ക് ആചാരപരമായ യാത്രയയപ്പ് നല്കാറുണ്ട്. എന്നാല് മഹിപാല് യാദവ് രാജസ്ഥാനില് ചികിത്സയിലായിരുന്നതിനാല് നേരിട്ട് എത്താന് കഴിയുമായിരുന്നില്ല. അതിനാലാണ് ഓണ്ലൈനായി യാത്രയയപ്പു നല്കാന് തീരുമാനിച്ചത്. ബുധനാഴ്ച വൈകുന്നേരം നാലു മണിക്കാണ് യോഗം നിശ്ചയിച്ചിരുന്നത്. മാഹിപാല് യാദവ് ജയ്പൂരില് നിന്നും സൂം മീറ്റിങ്ങില് പങ്കെടുക്കുമെന്നാണ് അറിയിച്ചിരുന്നത്. ഒരുക്കങ്ങള് പൂര്ത്തിയാക്കുകയും മീറ്റിങ് ഐഡി ഉദ്യോഗസ്ഥര്ക്ക് കൈമാറുകയും ചെയ്തിരുന്നു. ഇതിനിടെയാണ് ബന്ധുക്കള് മരണ വിവരം അറിയിച്ചത് .
മാഹിപാല് യാദവ് 2013ല് വിശിഷ്ട സേവനത്തിനുള്ള രാഷ്ട്രപതിയുടെ മെഡല് നേടിയിട്ടുണ്ട്. എറണാകുളം റേഞ്ച് ഐജി, ബിവറേജസ് കോര്പറേഷന് എംഡി തുടങ്ങിയ പദവികളും വഹിച്ചു.
