ന്യൂദല്‍ഹി: പ്രധാനമന്ത്രി നരേന്ദ്രമോദി ഇന്നും നാളെയും ഗുജറാത്ത് സന്ദര്‍ശിക്കും. ഇന്ന് വൈകിട്ട് ആറിന് അഹമ്മദാബാദിലെ ഖോഡല്‍ധാം മൈതാനത്ത് 5400 കോടി രൂപയുടെ വിവിധ വികസന പദ്ധതികള്‍ അദ്ദേഹം ഉദ്ഘാടനം ചെയ്യുകയും തറക്കല്ലിടുകയും രാഷ്‌ട്രത്തിന് സമര്‍പ്പിക്കുകയും ചെയ്യും.
1400 കോടിയിലധികം രൂപയുടെ വിവിധ റെയില്‍വേ പദ്ധതികള്‍, റോഡ് പദ്ധതികള്‍, ഉത്തര്‍ഗുജറാത്ത് വിജ് കമ്പനി ലിമിറ്റഡിന് കീഴില്‍ അഹമ്മദാബാദ്, മെഹ്സാന, ഗാന്ധിനഗര്‍ എന്നിവിടങ്ങളിലെ വൈദ്യുതി വിതരണ പദ്ധതികള്‍, നഗര അടിസ്ഥാനസൗകര്യ പദ്ധതികള്‍ എന്നിവയ്‌ക്കാണ് പ്രധാനമന്ത്രി തുടക്കം കുറിക്കുക.
നാളെ രാവിലെ 10.30ന് അഹമ്മദാബാദിലെ ഹന്‍സല്‍പുരിലെ സുസുക്കി മോട്ടോര്‍ പ്ലാന്റില്‍ നടക്കുന്ന ചടങ്ങില്‍ ഹൈബ്രിഡ് ബാറ്ററി ഇലക്ട്രോഡുകളുടെ പ്രാദേശിക ഉല്‍പ്പാദനവും നൂറ് രാജ്യങ്ങളിലേക്കുള്ള ബാറ്ററി ഇലക്ട്രിക് വാഹന കയറ്റുമതിയും പ്രധാനമന്ത്രി ഉദ്ഘാടനം ചെയ്യും. മെയ്‌ക്ക് ഇന്‍ ഇന്ത്യയുടെ ഭാഗമായി, സുസുക്കിയുടെ ആദ്യത്തെ ആഗോള
തന്ത്രപ്രധാന ബാറ്ററി ഇലക്ട്രിക് വെഹിക്കിള്‍ ഇ വിറ്റാരയുടെ ഉദ്ഘാടനവും ഫ്ളാഗ്ഓഫുമാണ് പ്രധാനമന്ത്രി നിര്‍വഹിക്കുക. യൂറോപ്പ്, ജപ്പാന്‍ തുടങ്ങിയ വികസിത വിപണികള്‍ ഉള്‍പ്പെടെ നൂറിലധികം രാജ്യങ്ങളിലേക്ക് ഭാരതത്തില്‍ നിര്‍മ്മിച്ച ബിഇവികള്‍ കയറ്റുമതി ചെയ്യും. ഇലക്ട്രിക് വാഹനങ്ങള്‍ക്കായുള്ള സുസുക്കിയുടെ ആഗോള നിര്‍മാണകേന്ദ്രമായി ഭാരതം മാറും. ടിഡിഎസ് ലിഥിയം-അയണ്‍ ബാറ്ററി പ്ലാന്റിലാണ് ഹൈബ്രിഡ് ബാറ്ററി ഇലക്ട്രോഡുകളുടെ പ്രാദേശിക ഉല്‍പ്പാദനം ആരംഭിക്കുന്നത്. തോഷിബ, ഡെന്‍സോ, സുസുക്കി എന്നിവയുടെ സംയുക്ത സംരംഭമാണ് ഈ പ്ലാന്റ്.
