ലഖ്നൗ : സമാജ്വാദി പാർട്ടിയിൽ നിന്ന് (എസ്പി) അടുത്തിടെ പുറത്താക്കപ്പെട്ട എംഎൽഎ പൂജ പാൽ പാർട്ടി മേധാവി അഖിലേഷ് യാദവിന് എഴുതിയ രണ്ട് പേജുള്ള കത്തിൽ ഉന്നയിക്കുന്നത് ഗുരുതര ആരോപണങ്ങൾ. കത്തിൽ തന്റെ വേദനയും പാർട്ടിക്കുള്ളിലെ അതൃപ്തിയും അവർ അറിയിച്ചു. പാർട്ടിക്കുള്ളിലെ അനുഭവം, ജാതി വിവേചനം, ഭീഷണികൾ, പുറത്താക്കൽ എന്നിവയെക്കുറിച്ച് നിരവധി ഗുരുതരമായ ചോദ്യങ്ങൾ അവർ കത്തിൽ ഉന്നയിച്ചിട്ടുണ്ട്.
താൻ ഒരു വിധവയും അനാഥയും വളരെ പിന്നോക്ക വിഭാഗത്തിൽപ്പെട്ട യുവതിയാണെന്നും പ്രതികൂല സാഹചര്യങ്ങളിൽ പോരാടി രണ്ട് തവണ എസ്പിയുടെ സഹായമില്ലാതെ തിരഞ്ഞെടുപ്പിൽ വിജയിച്ചതായും അവർ എഴുതി. മൂന്നാം തവണ എസ്പി ടിക്കറ്റിൽ എംഎൽഎയായി. അഖിലേഷ് യാദവിനെപ്പോലുള്ള നേതാക്കൾക്ക് തന്റെ ഭർത്താവിന്റെ കൊലപാതകികളെ ശിക്ഷിക്കാൻ കഴിയുമെന്ന് വിശ്വസിച്ചതുകൊണ്ടാണ് താൻ പാർട്ടിയിൽ ചേർന്നതെന്ന് അവർ പറഞ്ഞു.
എന്നാൽ ക്രമേണ തന്റെ വിശ്വാസം തകർന്നു. സമാജ്വാദി പാർട്ടിയിൽ പിന്നോക്ക, ദലിതരെ രണ്ടാം തരം പൗരന്മാരായി കണക്കാക്കുന്നുവെന്നും മുസ്ലീങ്ങൾക്ക് അവർ എത്ര ഗുരുതരമായ കുറ്റവാളികളാണെങ്കിലും പ്രത്യേക മുൻഗണന നൽകുന്നുവെന്നും പൂജ ആരോപിച്ചു. കൂടാതെ തന്റെ ഭർത്താവിന്റെ കൊലപാതകികളെ ശിക്ഷിച്ചപ്പോൾ സമാജ്വാദി പാർട്ടിയിലെയും സൈഫായ് കുടുംബത്തിലെയും നിരവധി ആളുകൾ കുറ്റവാളികളെ അനുകൂലിച്ചുവെന്ന് അവർ പറഞ്ഞു.
പിന്നീട് സമാജ്വാദി പാർട്ടിയിൽ നിന്ന് പുറത്താക്കപ്പെട്ടതിന് ശേഷം തനിക്ക് നിരന്തരം ഭീഷണികൾ ലഭിക്കുന്നുണ്ടെന്നും ആളുകൾ സോഷ്യൽ മീഡിയയിൽ തന്നെ അധിക്ഷേപിക്കുന്നുണ്ടെന്നും പൂജ പാൽ പറഞ്ഞു. എന്നാൽ ഇപ്പോൾ മരണത്തെ പോലും താൻ ഭയപ്പെടുന്നില്ല. താൻ കൊല്ലപ്പെട്ടാൽ സമാജ്വാദി പാർട്ടിയും അഖിലേഷ് യാദവും അതിന് ഉത്തരവാദികളായിരിക്കുമെന്ന് അവർ വ്യക്തമായി പറഞ്ഞു.
പാർട്ടി തന്റെ വാക്കു കേൾക്കാതെ തന്നെ പുറത്താക്കിയെന്നും അത് ശരിയല്ലെന്നും അവർ പറഞ്ഞു. തന്റെ കാഴ്ചപ്പാട് അവതരിപ്പിക്കാൻ ഒരു അവസരവും നൽകിയില്ല. ബിജെപി സ്ഥാനാർത്ഥിക്ക് വോട്ട് ചെയ്തതിനാലാണ് പുറത്താക്കപ്പെട്ടതെങ്കിൽ ദൽഹിയിലെ കോൺസ്റ്റിറ്റ്യൂഷണൽ ക്ലബ്ബിന്റെ തിരഞ്ഞെടുപ്പിൽ അഖിലേഷ് യാദവും ഭാര്യയും ബിജെപി സ്ഥാനാർത്ഥിക്ക് വോട്ട് ചെയ്തപ്പോൾ ആ തെറ്റ് എന്തുകൊണ്ട് ആരും ചോദ്യം ചെയ്തില്ലെന്നും അവർ ആരാഞ്ഞു.
ഇതിനു പുറമെ അഖിലേഷ് യാദവ് തന്റെ രാഷ്ട്രീയ താൽപ്പര്യങ്ങൾക്കായി കോൺഗ്രസിനെയും ബിഎസ്പിയെയും പിന്തുണയ്ക്കുകയാണെന്ന് അവർ ആരോപിച്ചു.
